Sukta 3

3.1

10 maitravarunirvasishthah, agnih, trishtup

अ॒ग्निं वो॑ दे॒वम॒ग्निभि॑ः स॒जोषा॒ यजि॑ष्ठं दू॒तम॑ध्व॒रे कृ॑णुध्वम् ।
यो मर्त्ये॑षु॒ निध्रु॑विॠ॒तावा॒ तपु॑र्मूर्धा घृ॒तान्न॑ः पाव॒कः ॥१॥

Agnim vo devamagnibhih sajosha yajishtham dutamadhvare krinudhvam
Yo martyeshu nidhruviritava tapurmurdha ghritannah pavakah

3.2

प्रोथ॒दश्वो॒ न यव॑सेऽवि॒ष्यन्य॒दा म॒हः सं॒वर॑णा॒द्व्यस्था॑त् ।
आद॑स्य॒ वातो॒ अनु॑ वाति शो॒चिरध॑ स्म ते॒ व्रज॑नं कृ॒ष्णम॑स्ति ॥२॥

Prothadashvo na yavasevishyanyada mahah sanvaranadvyasthat
Adasya vato anu vati shochiradha sma te vrajanam krishnamasti

3.3

उद्यस्य॑ ते॒ नव॑जातस्य॒ वृष्णोऽग्ने॒ चर॑न्त्य॒जरा॑ इधा॒नाः ।
अच्छा॒ द्याम॑रु॒षो धू॒म ए॑ति॒ सं दू॒तो अ॑ग्न॒ ईय॑से॒ हि दे॒वान् ॥३॥

Udyasya te navajatasya vrishnogne charantyajara idhanah
Achchha dyamarusho dhuma eti sam duto agna iyase hi devan

3.4

वि यस्य॑ ते पृथि॒व्यां पाजो॒ अश्रे॑त्तृ॒षु यदन्ना॑ स॒मवृ॑क्त॒ जम्भै॑ः ।
सेने॑व सृ॒ष्टा प्रसि॑तिष्ट एति॒ यवं॒ न द॑स्म जु॒ह्वा॑ विवेक्षि ॥४॥

Vi yasya te prithivyam pajo ashrettrishu yadanna samavrikta jambhaih
Seneva srishta prasitishta eti yavam na dasma juhva vivekshi

3.5

तमिद्दो॒षा तमु॒षसि॒ यवि॑ष्ठम॒ग्निमत्यं॒ न म॑र्जयन्त॒ नर॑ः ।
नि॒शिशा॑ना॒ अति॑थिमस्य॒ योनौ॑ दी॒दाय॑ शो॒चिराहु॑तस्य॒ वृष्ण॑ः ॥५॥

Tamiddosha tamushasi yavishthamagnimatyam na marjayanta narah
Nishishana atithimasya yonau didaya shochirahutasya vrishnah

3.6

सु॒सं॒दृक्ते॑ स्वनीक॒ प्रती॑कं॒ वि यद्रु॒क्मो न रोच॑स उपा॒के ।
दि॒वो न ते॑ तन्य॒तुरे॑ति॒ शुष्म॑श्चि॒त्रो न सूर॒ः प्रति॑ चक्षि भा॒नुम् ॥६॥

Susandrikte svanika pratikam vi yadrukmo na rochasa upake
Divo na te tanyatureti shushmashchitro na surah prati chakshi bhanum

3.7

यथा॑ व॒ः स्वाहा॒ग्नये॒ दाशे॑म॒ परीळा॑भिर्घृ॒तव॑द्भिश्च ह॒व्यैः ।
तेभि॑र्नो अग्ने॒ अमि॑तै॒र्महो॑भिः श॒तं पू॒र्भिराय॑सीभि॒र्नि पा॑हि ॥७॥

Yatha vah svahagnaye dashema parilabhirghritavadbhishcha havyaih
Tebhirno agne amitairmahobhih shatam purbhirayasibhirni pahi

3.8

या वा॑ ते॒ सन्ति॑ दा॒शुषे॒ अधृ॑ष्टा॒ गिरो॑ वा॒ याभि॑र्नृ॒वती॑रुरु॒ष्याः ।
ताभि॑र्नः सूनो सहसो॒ नि पा॑हि॒ स्मत्सू॒रीञ्ज॑रि॒तॄञ्जा॑तवेदः ॥८॥

Ya va te santi dashushe adhrishta giro va yabhirnrivatirurushyah
Tabhirnah suno sahaso ni pahi smatsurinjaritrinjatavedah

3.9

निर्यत्पू॒तेव॒ स्वधि॑ति॒ः शुचि॒र्गात्स्वया॑ कृ॒पा त॒न्वा॒३ रोच॑मानः ।
आ यो मा॒त्रोरु॒शेन्यो॒ जनि॑ष्ट देव॒यज्या॑य सु॒क्रतु॑ः पाव॒कः ॥९॥

Niryatputeva svadhitih shuchirgatsvaya kripa tanva3 rochamanah
A yo matrorushenyo janishta devayajyaya sukratuh pavakah

3.10

ए॒ता नो॑ अग्ने॒ सौभ॑गा दिदी॒ह्यपि॒ क्रतुं॑ सु॒चेत॑सं वतेम ।
विश्वा॑ स्तो॒तृभ्यो॑ गृण॒ते च॑ सन्तु यू॒यं पा॑त स्व॒स्तिभि॒ः सदा॑ नः ॥१०॥

Eta no agne saubhaga didihyapi kratum suchetasam vatema
Vishva stotribhyo grinate cha santu yuyam pata svastibhih sada nah