Sukta 2

2.1

11maitravarunirvasishthah, aprisuktam= (1 idhmah samiddhognirva, 2 narashansah, 3 ila :, 4 barhih, 5 devirdvarah, 6 ushasanakta, 7 daivyo hotarau prachetaso, 8 tisro devyah sarasvatilabharatyah, 9 tvashta, 10 vanaspati :, 11 svahakritayah }, trishtup

जु॒षस्व॑ नः स॒मिध॑मग्ने अ॒द्य शोचा॑ बृ॒हद्य॑ज॒तं धू॒ममृ॒ण्वन् ।
उप॑ स्पृश दि॒व्यं सानु॒ स्तूपै॒ः सं र॒श्मिभि॑स्ततन॒ः सूर्य॑स्य ॥१॥

Jushasva nah samidhamagne adya shocha brihadyajatam dhumamrinvan
Upa sprisha divyam sanu stupaih sam rashmibhistatanah suryasya

2.2

नरा॒शंस॑स्य महि॒मान॑मेषा॒मुप॑ स्तोषाम यज॒तस्य॑ य॒ज्ञैः ।
ये सु॒क्रत॑व॒ः शुच॑यो धियं॒धाः स्वद॑न्ति दे॒वा उ॒भया॑नि ह॒व्या ॥२॥

Narashansasya mahimanameshamupa stoshama yajatasya yagyaih
Ye sukratavah shuchayo dhiyandhah svadanti deva ubhayani havya

2.3

ई॒ळेन्यं॑ वो॒ असु॑रं सु॒दक्ष॑म॒न्तर्दू॒तं रोद॑सी सत्य॒वाच॑म् ।
म॒नु॒ष्वद॒ग्निं मनु॑ना॒ समि॑द्धं॒ सम॑ध्व॒राय॒ सद॒मिन्म॑हेम ॥३॥

Ilenyam vo asuram sudakshamantardutam rodasi satyavacham
Manushvadagnim manuna samiddham samadhvaraya sadaminmahema

2.4

स॒प॒र्यवो॒ भर॑माणा अभि॒ज्ञु प्र वृ॑ञ्जते॒ नम॑सा ब॒र्हिर॒ग्नौ ।
आ॒जुह्वा॑ना घृ॒तपृ॑ष्ठं॒ पृष॑द्व॒दध्व॑र्यवो ह॒विषा॑ मर्जयध्वम् ॥४॥

Saparyavo bharamana abhigyu pra vrinjate namasa barhiragnau
Ajuhvana ghritaprishtham prishadvadadhvaryavo havisha marjayadhvam

2.5

स्वा॒ध्यो॒३ वि दुरो॑ देव॒यन्तोऽशि॑श्रयू रथ॒युर्दे॒वता॑ता ।
पू॒र्वी शिशुं॒ न मा॒तरा॑ रिहा॒णे सम॒ग्रुवो॒ न सम॑नेष्वञ्जन् ॥५॥

Svadhyo3 vi duro devayantoshishrayu rathayurdevatata
Purvi shishum na matara rihane samagruvo na samaneshvanjan

2.6

उ॒त योष॑णे दि॒व्ये म॒ही न॑ उ॒षासा॒नक्ता॑ सु॒दुघे॑व धे॒नुः ।
ब॒र्हि॒षदा॑ पुरुहू॒ते म॒घोनी॒ आ य॒ज्ञिये॑ सुवि॒ताय॑ श्रयेताम् ॥६॥

Uta yoshane divye mahi na ushasanakta sudugheva dhenuh
Barhishada puruhute maghoni a yagyiye suvitaya shrayetam

2.7

विप्रा॑ य॒ज्ञेषु॒ मानु॑षेषु का॒रू मन्ये॑ वां जा॒तवे॑दसा॒ यज॑ध्यै ।
ऊ॒र्ध्वं नो॑ अध्व॒रं कृ॑तं॒ हवे॑षु॒ ता दे॒वेषु॑ वनथो॒ वार्या॑णि ॥७॥

Vipra yagyeshu manusheshu karu manye vam jatavedasa yajadhyai
Urdhvam no adhvaram kritam haveshu ta deveshu vanatho varyani

2.8

आ भार॑ती॒ भार॑तीभिः स॒जोषा॒ इळा॑ दे॒वैर्म॑नु॒ष्ये॑भिर॒ग्निः ।
सर॑स्वती सारस्व॒तेभि॑र॒र्वाक्ति॒स्रो दे॒वीर्ब॒र्हिरेदं स॑दन्तु ॥८॥

A bharati bharatibhih sajosha ila devairmanushyebhiragnih
Sarasvati sarasvatebhirarvaktisro devirbarhiredam sadantu

2.9

तन्न॑स्तु॒रीप॒मध॑ पोषयि॒त्नु देव॑ त्वष्ट॒र्वि र॑रा॒णः स्य॑स्व ।
यतो॑ वी॒रः क॑र्म॒ण्य॑ः सु॒दक्षो॑ यु॒क्तग्रा॑वा॒ जाय॑ते दे॒वका॑मः ॥९॥

Tannasturipamadha poshayitnu deva tvashtarvi raranah syasva
Yato virah karmanyah sudaksho yuktagrava jayate devakamah

2.10

वन॑स्प॒तेऽव॑ सृ॒जोप॑ दे॒वान॒ग्निर्ह॒विः श॑मि॒ता सू॑दयाति ।
सेदु॒ होता॑ स॒त्यत॑रो यजाति॒ यथा॑ दे॒वानां॒ जनि॑मानि॒ वेद॑ ॥१०॥

Vanaspateva srijopa devanagnirhavih shamita sudayati
Sedu hota satyataro yajati yatha devanam janimani veda

2.11

आ या॑ह्यग्ने समिधा॒नो अ॒र्वाङिन्द्रे॑ण दे॒वैः स॒रथं॑ तु॒रेभि॑ः ।
ब॒र्हिर्न॑ आस्ता॒मदि॑तिः सुपु॒त्रा स्वाहा॑ दे॒वा अ॒मृता॑ मादयन्ताम् ॥११॥

A yahyagne samidhano arvangindrena devaih saratham turebhih
Barhirna astamaditih suputra svaha deva amrita madayantam