Sukta 1

1.1

25 maitravarunirvasishthah, agnih, virat, 19-25 trishtup

अ॒ग्निं नरो॒ दीधि॑तिभिर॒रण्यो॒र्हस्त॑च्युती जनयन्त प्रश॒स्तम् ।
दू॒रे॒दृशं॑ गृ॒हप॑तिमथ॒र्युम् ॥१॥

Agnim naro didhitibhiraranyorhastachyuti janayanta prashastam
Duredrisham grihapatimatharyum

1.2

तम॒ग्निमस्ते॒ वस॑वो॒ न्यृ॑ण्वन्त्सुप्रति॒चक्ष॒मव॑से॒ कुत॑श्चित् ।
द॒क्षाय्यो॒ यो दम॒ आस॒ नित्य॑ः ॥२॥

Tamagnimaste vasavo nyrinvantsupratichakshamavase kutashchit
Dakshayyo yo dama asa nityah

1.3

प्रेद्धो॑ अग्ने दीदिहि पु॒रो नोऽज॑स्रया सू॒र्म्या॑ यविष्ठ ।
त्वां शश्व॑न्त॒ उप॑ यन्ति॒ वाजा॑ः ॥३॥

Preddho agne didihi puro nojasraya surmya yavishtha
Tvam shashvanta upa yanti vajah

1.4

प्र ते अ॒ग्नयो॒ऽग्निभ्यो॒ वरं॒ निः सु॒वीरा॑सः शोशुचन्त द्यु॒मन्त॑ः ।
यत्रा॒ नर॑ः स॒मास॑ते सुजा॒ताः ॥४॥

Pra te agnayognibhyo varam nih suvirasah shoshuchanta dyumantah
Yatra narah samasate sujatah

1.5

दा नो॑ अग्ने धि॒या र॒यिं सु॒वीरं॑ स्वप॒त्यं स॑हस्य प्रश॒स्तम् ।
न यं यावा॒ तर॑ति यातु॒मावा॑न् ॥५॥

Da no agne dhiya rayim suviram svapatyam sahasya prashastam
Na yam yava tarati yatumavan

1.6

उप॒ यमेति॑ युव॒तिः सु॒दक्षं॑ दो॒षा वस्तो॑र्ह॒विष्म॑ती घृ॒ताची॑ ।
उप॒ स्वैन॑म॒रम॑तिर्वसू॒युः ॥६॥

Upa yameti yuvatih sudaksham dosha vastorhavishmati ghritachi
Upa svainamaramatirvasuyuh

1.7

विश्वा॑ अ॒ग्नेऽप॑ द॒हारा॑ती॒र्येभि॒स्तपो॑भि॒रद॑हो॒ जरू॑थम् ।
प्र नि॑स्व॒रं चा॑तय॒स्वामी॑वाम् ॥७॥

Vishva agnepa daharatiryebhistapobhiradaho jarutham
Pra nisvaram chatayasvamivam

1.8

आ यस्ते॑ अग्न इध॒ते अनी॑कं॒ वसि॑ष्ठ॒ शुक्र॒ दीदि॑व॒ः पाव॑क ।
उ॒तो न॑ ए॒भिः स्त॒वथै॑रि॒ह स्या॑ः ॥८॥

A yaste agna idhate anikam vasishtha shukra didivah pavaka
Uto na ebhih stavathairiha syah

1.9

वि ये ते॑ अग्ने भेजि॒रे अनी॑कं॒ मर्ता॒ नर॒ः पित्र्या॑सः पुरु॒त्रा ।
उ॒तो न॑ ए॒भिः सु॒मना॑ इ॒ह स्या॑ः ॥९॥

Vi ye te agne bhejire anikam marta narah pitryasah purutra
Uto na ebhih sumana iha syah

1.10

इ॒मे नरो॑ वृत्र॒हत्ये॑षु॒ शूरा॒ विश्वा॒ अदे॑वीर॒भि स॑न्तु मा॒याः ।
ये मे॒ धियं॑ प॒नय॑न्त प्रश॒स्ताम् ॥१०॥

Ime naro vritrahatyeshu shura vishva adevirabhi santu mayah
Ye me dhiyam panayanta prashastam

1.11

मा शूने॑ अग्ने॒ नि ष॑दाम नृ॒णां माशेष॑सो॒ऽवीर॑ता॒ परि॑ त्वा ।
प्र॒जाव॑तीषु॒ दुर्या॑सु दुर्य ॥११॥

Ma shune agne ni shadama nrinam masheshasovirata pari tva
Prajavatishu duryasu durya

1.12

यम॒श्वी नित्य॑मुप॒याति॑ य॒ज्ञं प्र॒जाव॑न्तं स्वप॒त्यं क्षयं॑ नः ।
स्वज॑न्मना॒ शेष॑सा वावृधा॒नम् ॥१२॥

Yamashvi nityamupayati yagyam prajavantam svapatyam kshayam nah
Svajanmana sheshasa vavridhanam

1.13

पा॒हि नो॑ अग्ने र॒क्षसो॒ अजु॑ष्टात्पा॒हि धू॒र्तेरर॑रुषो अघा॒योः ।
त्वा यु॒जा पृ॑तना॒यूँर॒भि ष्या॑म् ॥१३॥

Pahi no agne rakshaso ajushtatpahi dhurterararusho aghayoh
Tva yuja pritanayunrabhi shyam

1.14

सेद॒ग्निर॒ग्नीँरत्य॑स्त्व॒न्यान्यत्र॑ वा॒जी तन॑यो वी॒ळुपा॑णिः ।
स॒हस्र॑पाथा अ॒क्षरा॑ स॒मेति॑ ॥१४॥

Sedagniragninratyastvanyanyatra vaji tanayo vilupanih
Sahasrapatha akshara sameti

1.15

सेद॒ग्निर्यो व॑नुष्य॒तो नि॒पाति॑ समे॒द्धार॒मंह॑स उरु॒ष्यात् ।
सु॒जा॒तास॒ः परि॑ चरन्ति वी॒राः ॥१५॥

Sedagniryo vanushyato nipati sameddharamanhasa urushyat
Sujatasah pari charanti virah

1.16

अ॒यं सो अ॒ग्निराहु॑तः पुरु॒त्रा यमीशा॑न॒ः समिदि॒न्धे ह॒विष्मा॑न् ।
परि॒ यमेत्य॑ध्व॒रेषु॒ होता॑ ॥१६॥

Ayam so agnirahutah purutra yamishanah samidindhe havishman
Pari yametyadhvareshu hota

1.17

त्वे अ॑ग्न आ॒हव॑नानि॒ भूरी॑शा॒नास॒ आ जु॑हुयाम॒ नित्या॑ । उ॒भा कृ॒ण्वन्तो॑ वह॒तू मि॒येधे॑ ॥१७॥

Tve agna ahavanani bhurishanasa a juhuyama nitya, ubha krinvanto vahatu miyedhe

1.18

इ॒मो अ॑ग्ने वी॒तत॑मानि ह॒व्या ऽज॑स्रो वक्षि दे॒वता॑ति॒मच्छ॑ । प्रति॑ न ईं सुर॒भीणि॑ व्यन्तु ॥१८॥

Imo agne vitatamani havya jasro vakshi devatatimachchha, prati na im surabhini vyantu

1.19

मा नो॑ अग्ने॒ऽवीर॑ते॒ परा॑ दा दु॒र्वास॒सेऽम॑तये॒ मा नो॑ अ॒स्यै ।
मा न॑ः क्षु॒धे मा र॒क्षस॑ ऋतावो॒ मा नो॒ दमे॒ मा वन॒ आ जु॑हूर्थाः ॥१९॥

Ma no agnevirate para da durvasasemataye ma no asyai
Ma nah kshudhe ma rakshasa ritavo ma no dame ma vana a juhurthah

1.20

नू मे॒ ब्रह्मा॑ण्यग्न॒ उच्छ॑शाधि॒ त्वं दे॑व म॒घव॑द्भ्यः सुषूदः ।
रा॒तौ स्या॑मो॒भया॑स॒ आ ते॑ यू॒यं पा॑त स्व॒स्तिभि॒ः सदा॑ नः ॥२०॥

Nu me brahmanyagna uchchhashadhi tvam deva maghavadbhyah sushudah
Ratau syamobhayasa a te yuyam pata svastibhih sada nah

1.21

त्वम॑ग्ने सु॒हवो॑ र॒ण्वसं॑दृक्सुदी॒ती सू॑नो सहसो दिदीहि ।
मा त्वे सचा॒ तन॑ये॒ नित्य॒ आ ध॒ङ्मा वी॒रो अ॒स्मन्नर्यो॒ वि दा॑सीत् ॥२१॥

Tvamagne suhavo ranvasandriksuditi suno sahaso didihi
Ma tve sacha tanaye nitya a dhanma viro asmannaryo vi dasit

1.22

मा नो॑ अग्ने दुर्भृ॒तये॒ सचै॒षु दे॒वेद्धे॑ष्व॒ग्निषु॒ प्र वो॑चः ।
मा ते॑ अ॒स्मान्दु॑र्म॒तयो॑ भृ॒माच्चि॑द्दे॒वस्य॑ सूनो सहसो नशन्त ॥२२॥

Ma no agne durbhritaye sachaishu deveddheshvagnishu pra vochah
Ma te asmandurmatayo bhrimachchiddevasya suno sahaso nashanta

1.23

स मर्तो॑ अग्ने स्वनीक रे॒वानम॑र्त्ये॒ य आ॑जु॒होति॑ ह॒व्यम् ।
स दे॒वता॑ वसु॒वनिं॑ दधाति॒ यं सू॒रिर॒र्थी पृ॒च्छमा॑न॒ एति॑ ॥२३॥

Sa marto agne svanika revanamartye ya ajuhoti havyam
Sa devata vasuvanim dadhati yam surirarthi prichchhamana eti

1.24

म॒हो नो॑ अग्ने सुवि॒तस्य॑ वि॒द्वान्र॒यिं सू॒रिभ्य॒ आ व॑हा बृ॒हन्त॑म् ।
येन॑ व॒यं स॑हसाव॒न्मदे॒माऽवि॑क्षितास॒ आयु॑षा सु॒वीरा॑ः ॥२४॥

Maho no agne suvitasya vidvanrayim suribhya a vaha brihantam
Yena vayam sahasavanmademavikshitasa ayusha suvirah

1.25

नू मे॒ ब्रह्मा॑ण्यग्न॒ उच्छ॑शाधि॒ त्वं दे॑व म॒घव॑द्भ्यः सुषूदः ।
रा॒तौ स्या॑मो॒भया॑स॒ आ ते॑ यू॒यं पा॑त स्व॒स्तिभि॒ः सदा॑ नः ॥२५॥

Nu me brahmanyagna uchchhashadhi tvam deva maghavadbhyah sushudah
Ratau syamobhayasa a te yuyam pata svastibhih sada nah