Sukta 71

71.1

6 barhaspatyo bharadvajah, savita, jagati, 4-6 trishtup

उदु॒ ष्य दे॒वः स॑वि॒ता हि॑र॒ण्यया॑ बा॒हू अ॑यंस्त॒ सव॑नाय सु॒क्रतु॑ः ।
घृ॒तेन॑ पा॒णी अ॒भि प्रु॑ष्णुते म॒खो युवा॑ सु॒दक्षो॒ रज॑सो॒ विध॑र्मणि ॥१॥

Udu shya devah savita hiranyaya bahu ayansta savanaya sukratuh
Ghritena pani abhi prushnute makho yuva sudaksho rajaso vidharmani

71.2

दे॒वस्य॑ व॒यं स॑वि॒तुः सवी॑मनि॒ श्रेष्ठे॑ स्याम॒ वसु॑नश्च दा॒वने॑ ।
यो विश्व॑स्य द्वि॒पदो॒ यश्चतु॑ष्पदो नि॒वेश॑ने प्रस॒वे चासि॒ भूम॑नः ॥२॥

Devasya vayam savituh savimani shreshthe syama vasunashcha davane
Yo vishvasya dvipado yashchatushpado niveshane prasave chasi bhumanah

71.3

अद॑ब्धेभिः सवितः पा॒युभि॒ष्ट्वं शि॒वेभि॑र॒द्य परि॑ पाहि नो॒ गय॑म् ।
हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घशं॑स ईशत ॥३॥

Adabdhebhih savitah payubhishtvam shivebhiradya pari pahi no gayam
Hiranyajihvah suvitaya navyase raksha makirno aghashansa ishata

71.4

उदु॒ ष्य दे॒वः स॑वि॒ता दमू॑ना॒ हिर॑ण्यपाणिः प्रतिदो॒षम॑स्थात् ।
अयो॑हनुर्यज॒तो म॒न्द्रजि॑ह्व॒ आ दा॒शुषे॑ सुवति॒ भूरि॑ वा॒मम् ॥४॥

Udu shya devah savita damuna hiranyapanih pratidoshamasthat
Ayohanuryajato mandrajihva a dashushe suvati bhuri vamam

71.5

उदू॑ अयाँ उपव॒क्तेव॑ बा॒हू हि॑र॒ण्यया॑ सवि॒ता सु॒प्रती॑का ।
दि॒वो रोहां॑स्यरुहत्पृथि॒व्या अरी॑रमत्प॒तय॒त्कच्चि॒दभ्व॑म् ॥५॥

Udu ayam upavakteva bahu hiranyaya savita supratika
Divo rohansyaruhatprithivya ariramatpatayatkachchidabhvam

71.6

वा॒मम॒द्य स॑वितर्वा॒ममु॒ श्वो दि॒वेदि॑वे वा॒मम॒स्मभ्यं॑ सावीः ।
वा॒मस्य॒ हि क्षय॑स्य देव॒ भूरे॑र॒या धि॒या वा॑म॒भाज॑ः स्याम ॥६॥

Vamamadya savitarvamamu shvo divedive vamamasmabhyam savih
Vamasya hi kshayasya deva bhureraya dhiya vamabhajah syama