Sukta 72

72.1

5 barhaspatyo bharadvajah, indrasomau, trishtup

इन्द्रा॑सोमा॒ महि॒ तद्वां॑ महि॒त्वं यु॒वं म॒हानि॑ प्रथ॒मानि॑ चक्रथुः ।
यु॒वं सूर्यं॑ विवि॒दथु॑र्यु॒वं स्व१र्विश्वा॒ तमां॑स्यहतं नि॒दश्च॑ ॥१॥

Indrasoma mahi tadvam mahitvam yuvam mahani prathamani chakrathuh
Yuvam suryam vividathuryuvam sva1rvishva tamansyahatam nidashcha

72.2

इन्द्रा॑सोमा वा॒सय॑थ उ॒षास॒मुत्सूर्यं॑ नयथो॒ ज्योति॑षा स॒ह ।
उप॒ द्यां स्क॒म्भथु॒ः स्कम्भ॑ने॒नाप्र॑थतं पृथि॒वीं मा॒तरं॒ वि ॥२॥

Indrasoma vasayatha ushasamutsuryam nayatho jyotisha saha
Upa dyam skambhathuh skambhanenaprathatam prithivim mataram vi

72.3

इन्द्रा॑सोमा॒वहि॑म॒पः प॑रि॒ष्ठां ह॒थो वृ॒त्रमनु॑ वां॒ द्यौर॑मन्यत ।
प्रार्णां॑स्यैरयतं न॒दीना॒मा स॑मु॒द्राणि॑ पप्रथुः पु॒रूणि॑ ॥३॥

Indrasomavahimapah parishtham hatho vritramanu vam dyauramanyata
Prarnansyairayatam nadinama samudrani paprathuh puruni

72.4

इन्द्रा॑सोमा प॒क्वमा॒मास्व॒न्तर्नि गवा॒मिद्द॑धथुर्व॒क्षणा॑सु ।
ज॒गृ॒भथु॒रन॑पिनद्धमासु॒ रुश॑च्चि॒त्रासु॒ जग॑तीष्व॒न्तः ॥४॥

Indrasoma pakvamamasvantarni gavamiddadhathurvakshanasu
Jagribhathuranapinaddhamasu rushachchitrasu jagatishvantah

72.5

इन्द्रा॑सोमा यु॒वम॒ङ्ग तरु॑त्रमपत्य॒साचं॒ श्रुत्यं॑ रराथे ।
यु॒वं शुष्मं॒ नर्यं॑ चर्ष॒णिभ्य॒ः सं वि॑व्यथुः पृतना॒षाह॑मुग्रा ॥५॥

Indrasoma yuvamanga tarutramapatyasacham shrutyam rarathe
Yuvam shushmam naryam charshanibhyah sam vivyathuh pritanashahamugra