Sukta 70

70.1

6 barhaspatyo bharadvajah, dyavaprithivi, jagati

घृ॒तव॑ती॒ भुव॑नानामभि॒श्रियो॒र्वी पृ॒थ्वी म॑धु॒दुघे॑ सु॒पेश॑सा ।
द्यावा॑पृथि॒वी वरु॑णस्य॒ धर्म॑णा॒ विष्क॑भिते अ॒जरे॒ भूरि॑रेतसा ॥१॥

Ghritavati bhuvananamabhishriyorvi prithvi madhudughe supeshasa
Dyavaprithivi varunasya dharmana vishkabhite ajare bhuriretasa

70.2

अस॑श्चन्ती॒ भूरि॑धारे॒ पय॑स्वती घृ॒तं दु॑हाते सु॒कृते॒ शुचि॑व्रते ।
राज॑न्ती अ॒स्य भुव॑नस्य रोदसी अ॒स्मे रेत॑ः सिञ्चतं॒ यन्मनु॑र्हितम् ॥२॥

Asashchanti bhuridhare payasvati ghritam duhate sukrite shuchivrate
Rajanti asya bhuvanasya rodasi asme retah sinchatam yanmanurhitam

70.3

यो वा॑मृ॒जवे॒ क्रम॑णाय रोदसी॒ मर्तो॑ द॒दाश॑ धिषणे॒ स सा॑धति ।
प्र प्र॒जाभि॑र्जायते॒ धर्म॑ण॒स्परि॑ यु॒वोः सि॒क्ता विषु॑रूपाणि॒ सव्र॑ता ॥३॥

Yo vamrijave kramanaya rodasi marto dadasha dhishane sa sadhati
Pra prajabhirjayate dharmanaspari yuvoh sikta vishurupani savrata

70.4

घृ॒तेन॒ द्यावा॑पृथि॒वी अ॒भीवृ॑ते घृत॒श्रिया॑ घृत॒पृचा॑ घृता॒वृधा॑ ।
उ॒र्वी पृ॒थ्वी हो॑तृ॒वूर्ये॑ पु॒रोहि॑ते॒ ते इद्विप्रा॑ ईळते सु॒म्नमि॒ष्टये॑ ॥४॥

Ghritena dyavaprithivi abhivrite ghritashriya ghritapricha ghritavridha
Urvi prithvi hotrivurye purohite te idvipra ilate sumnamishtaye

70.5

मधु॑ नो॒ द्यावा॑पृथि॒वी मि॑मिक्षतां मधु॒श्चुता॑ मधु॒दुघे॒ मधु॑व्रते ।
दधा॑ने य॒ज्ञं द्रवि॑णं च दे॒वता॒ महि॒ श्रवो॒ वाज॑म॒स्मे सु॒वीर्य॑म् ॥५॥

Madhu no dyavaprithivi mimikshatam madhushchuta madhudughe madhuvrate
Dadhane yagyam dravinam cha devata mahi shravo vajamasme suviryam

70.6

ऊर्जं॑ नो॒ द्यौश्च॑ पृथि॒वी च॑ पिन्वतां पि॒ता मा॒ता वि॑श्व॒विदा॑ सु॒दंस॑सा ।
सं॒र॒रा॒णे रोद॑सी वि॒श्वश॑म्भुवा स॒निं वाजं॑ र॒यिम॒स्मे समि॑न्वताम् ॥६॥

Urjam no dyaushcha prithivi cha pinvatam pita mata vishvavida sudansasa
Sanrarane rodasi vishvashambhuva sanim vajam rayimasme saminvatam