Sukta 69

69.1

8 barhaspatyo bharadvajah, indravishnu, trishtup

सं वां॒ कर्म॑णा॒ समि॒षा हि॑नो॒मीन्द्रा॑विष्णू॒ अप॑सस्पा॒रे अ॒स्य ।
जु॒षेथां॑ य॒ज्ञं द्रवि॑णं च धत्त॒मरि॑ष्टैर्नः प॒थिभि॑ः पा॒रय॑न्ता ॥१॥

Sam vam karmana samisha hinomindravishnu apasaspare asya
Jushetham yagyam dravinam cha dhattamarishtairnah pathibhih parayanta

69.2

या विश्वा॑सां जनि॒तारा॑ मती॒नामिन्द्रा॒विष्णू॑ क॒लशा॑ सोम॒धाना॑ ।
प्र वां॒ गिर॑ः श॒स्यमा॑ना अवन्तु॒ प्र स्तोमा॑सो गी॒यमा॑नासो अ॒र्कैः ॥२॥

Ya vishvasam janitara matinamindravishnu kalasha somadhana
Pra vam girah shasyamana avantu pra stomaso giyamanaso arkaih

69.3

इन्द्रा॑विष्णू मदपती मदाना॒मा सोमं॑ यातं॒ द्रवि॑णो॒ दधा॑ना ।
सं वा॑मञ्जन्त्व॒क्तुभि॑र्मती॒नां सं स्तोमा॑सः श॒स्यमा॑नास उ॒क्थैः ॥३॥

Indravishnu madapati madanama somam yatam dravino dadhana
Sam vamanjantvaktubhirmatinam sam stomasah shasyamanasa ukthaih

69.4

आ वा॒मश्वा॑सो अभिमाति॒षाह॒ इन्द्रा॑विष्णू सध॒मादो॑ वहन्तु ।
जु॒षेथां॒ विश्वा॒ हव॑ना मती॒नामुप॒ ब्रह्मा॑णि शृणुतं॒ गिरो॑ मे ॥४॥

A vamashvaso abhimatishaha indravishnu sadhamado vahantu
Jushetham vishva havana matinamupa brahmani shrinutam giro me

69.5

इन्द्रा॑विष्णू॒ तत्प॑न॒याय्यं॑ वां॒ सोम॑स्य॒ मद॑ उ॒रु च॑क्रमाथे ।
अकृ॑णुतम॒न्तरि॑क्षं॒ वरी॒योऽप्र॑थतं जी॒वसे॑ नो॒ रजां॑सि ॥५॥

Indravishnu tatpanayayyam vam somasya mada uru chakramathe
Akrinutamantariksham variyoprathatam jivase no rajansi

69.6

इन्द्रा॑विष्णू ह॒विषा॑ वावृधा॒नाऽग्रा॑द्वाना॒ नम॑सा रातहव्या ।
घृता॑सुती॒ द्रवि॑णं धत्तम॒स्मे स॑मु॒द्रः स्थ॑ः क॒लश॑ः सोम॒धान॑ः ॥६॥

Indravishnu havisha vavridhanagradvana namasa ratahavya
Ghritasuti dravinam dhattamasme samudrah sthah kalashah somadhanah

69.7

इन्द्रा॑विष्णू॒ पिब॑तं॒ मध्वो॑ अ॒स्य सोम॑स्य दस्रा ज॒ठरं॑ पृणेथाम् ।
आ वा॒मन्धां॑सि मदि॒राण्य॑ग्म॒न्नुप॒ ब्रह्मा॑णि शृणुतं॒ हवं॑ मे ॥७॥

Indravishnu pibatam madhvo asya somasya dasra jatharam prinetham
A vamandhansi madiranyagmannupa brahmani shrinutam havam me

69.8

उ॒भा जि॑ग्यथु॒र्न परा॑ जयेथे॒ न परा॑ जिग्ये कत॒रश्च॒नैनो॑ः ।
इन्द्र॑श्च विष्णो॒ यदप॑स्पृधेथां त्रे॒धा स॒हस्रं॒ वि तदै॑रयेथाम् ॥८॥

Ubha jigyathurna para jayethe na para jigye katarashchanainoh
Indrashcha vishno yadapaspridhetham tredha sahasram vi tadairayetham