সূক্ত 69

69.1

৮ বার্হস্পত্যো ভরদ্বাজঃ । ইন্দ্রাবিষ্ণূ। ত্রিষ্টুপ্ ।

সং বাং কর্মণা সমিষা হিনোমীন্দ্রাবিষ্ণূ অপসস্পারে অস্য ।
জুষেথাং যজ্ঞং দ্রবিণং চ ধত্তমরিষ্টৈর্নঃ পথিভিঃ পারয়ন্তা ॥১॥

69.2

যা বিশ্বাসাং জনিতারা মতীনামিন্দ্রাবিষ্ণূ কলশা সোমধানা ।
প্র বাং গিরঃ শস্যমানা অবন্তু প্র স্তোমাসো গীয়মানাসো অর্কৈঃ ॥২॥

69.3

ইন্দ্রাবিষ্ণূ মদপতী মদানামা সোমং যাতং দ্রবিণো দধানা ।
সং বামঞ্জন্ত্বক্তুভির্মতীনাং সং স্তোমাসঃ শস্যমানাস উক্থৈঃ ॥৩॥

69.4

আ বামশ্বাসো অভিমাতিষাহ ইন্দ্রাবিষ্ণূ সধমাদো বহন্তু ।
জুষেথাং বিশ্বা হবনা মতীনামুপ ব্রহ্মাণি শৃণুতং গিরো মে ॥৪॥

69.5

ইন্দ্রাবিষ্ণূ তত্পনয়ায্যং বাং সোমস্য মদ উরু চক্রমাথে ।
অকৃণুতমন্তরিক্ষং বরীয়োঽপ্রথতং জীবসে নো রজাংসি ॥৫॥

69.6

ইন্দ্রাবিষ্ণূ হবিষা বাবৃধানাঽগ্রাদ্বানা নমসা রাতহব্যা ।
ঘৃতাসুতী দ্রবিণং ধত্তমস্মে সমুদ্রঃ স্থঃ কলশঃ সোমধানঃ ॥৬॥

69.7

ইন্দ্রাবিষ্ণূ পিবতং মধ্বো অস্য সোমস্য দস্রা জঠরং পৃণেথাম্ ।
আ বামন্ধাংসি মদিরাণ্যগ্মন্নুপ ব্রহ্মাণি শৃণুতং হবং মে ॥৭॥

69.8

উভা জিগ্যথুর্ন পরা জয়েথে ন পরা জিগ্যে কতরশ্চনৈনোঃ ।
ইন্দ্রশ্চ বিষ্ণো যদপস্পৃধেথাং ত্রেধা সহস্রং বি তদৈরয়েথাম্ ॥৮॥