Sukta 53

53.1

10 barhaspatyo bharadvajah, pusha, gayatri, 8 anushtup

व॒यमु॑ त्वा पथस्पते॒ रथं॒ न वाज॑सातये । धि॒ये पू॑षन्नयुज्महि ॥१॥

Vayamu tva pathaspate ratham na vajasataye, dhiye pushannayujmahi

अ॒भि नो॒ नर्यं॒ वसु॑ वी॒रं प्रय॑तदक्षिणम् । वा॒मं गृ॒हप॑तिं नय ॥२॥

Abhi no naryam vasu viram prayatadakshinam, vamam grihapatim naya

अदि॑त्सन्तं चिदाघृणे॒ पूष॒न्दाना॑य चोदय । प॒णेश्चि॒द्वि म्र॑दा॒ मन॑ः ॥३॥

Aditsantam chidaghrine pushandanaya chodaya, paneshchidvi mrada manah

वि प॒थो वाज॑सातये चिनु॒हि वि मृधो॑ जहि । साध॑न्तामुग्र नो॒ धिय॑ः ॥४॥

Vi patho vajasataye chinuhi vi mridho jahi, sadhantamugra no dhiyah

परि॑ तृन्धि पणी॒नामार॑या॒ हृद॑या कवे । अथे॑म॒स्मभ्यं॑ रन्धय ॥५॥

Pari trindhi paninamaraya hridaya kave, athemasmabhyam randhaya

वि पू॑ष॒न्नार॑या तुद प॒णेरि॑च्छ हृ॒दि प्रि॒यम् । अथे॑म॒स्मभ्यं॑ रन्धय ॥६॥

Vi pushannaraya tuda panerichchha hridi priyam, athemasmabhyam randhaya

आ रि॑ख किकि॒रा कृ॑णु पणी॒नां हृद॑या कवे । अथे॑म॒स्मभ्यं॑ रन्धय ॥७॥

A rikha kikira krinu paninam hridaya kave, athemasmabhyam randhaya

यां पू॑षन्ब्रह्म॒चोद॑नी॒मारां॒ बिभ॑र्ष्याघृणे । तया॑ समस्य॒ हृद॑य॒मा रि॑ख किकि॒रा कृ॑णु ॥८॥

Yam pushanbrahmachodanimaram bibharshyaghrine, taya samasya hridayama rikha kikira krinu

या ते॒ अष्ट्रा॒ गोओ॑प॒शाऽऽघृ॑णे पशु॒साध॑नी । तस्या॑स्ते सु॒म्नमी॑महे ॥९॥

Ya te ashtra goopashaghrine pashusadhani, tasyaste sumnamimahe

उ॒त नो॑ गो॒षणिं॒ धिय॑मश्व॒सां वा॑ज॒सामु॒त । नृ॒वत्कृ॑णुहि वी॒तये॑ ॥१०॥

Uta no goshanim dhiyamashvasam vajasamuta, nrivatkrinuhi vitaye