Sukta 52

52.1

17 rijishva bharadvajah, vishve devah, trishtup, 7-12 gayatri, 14 jagati

न तद्दि॒वा न पृ॑थि॒व्यानु॑ मन्ये॒ न य॒ज्ञेन॒ नोत शमी॑भिरा॒भिः ।
उ॒ब्जन्तु॒ तं सु॒भ्व१ः पर्व॑तासो॒ नि ही॑यतामतिया॒जस्य॑ य॒ष्टा ॥१॥

Na taddiva na prithivyanu manye na yagyena nota shamibhirabhih
Ubjantu tam subhva1h parvataso ni hiyatamatiyajasya yashta

52.2

अति॑ वा॒ यो म॑रुतो॒ मन्य॑ते नो॒ ब्रह्म॑ वा॒ यः क्रि॒यमा॑णं॒ निनि॑त्सात् ।
तपूं॑षि॒ तस्मै॑ वृजि॒नानि॑ सन्तु ब्रह्म॒द्विष॑म॒भि तं शो॑चतु॒ द्यौः ॥२॥

Ati va yo maruto manyate no brahma va yah kriyamanam ninitsat
Tapunshi tasmai vrijinani santu brahmadvishamabhi tam shochatu dyauh

52.3

किम॒ङ्ग त्वा॒ ब्रह्म॑णः सोम गो॒पां किम॒ङ्ग त्वा॑हुरभिशस्ति॒पां न॑ः ।
किम॒ङ्ग न॑ः पश्यसि नि॒द्यमा॑नान्ब्रह्म॒द्विषे॒ तपु॑षिं हे॒तिम॑स्य ॥३॥

Kimanga tva brahmanah soma gopam kimanga tvahurabhishastipam nah
Kimanga nah pashyasi nidyamananbrahmadvishe tapushim hetimasya

52.4

अव॑न्तु॒ मामु॒षसो॒ जाय॑माना॒ अव॑न्तु मा॒ सिन्ध॑व॒ः पिन्व॑मानाः ।
अव॑न्तु मा॒ पर्व॑तासो ध्रु॒वासोऽव॑न्तु मा पि॒तरो॑ दे॒वहू॑तौ ॥४॥

Avantu mamushaso jayamana avantu ma sindhavah pinvamanah
Avantu ma parvataso dhruvasovantu ma pitaro devahutau

52.5

वि॒श्व॒दानीं॑ सु॒मन॑सः स्याम॒ पश्ये॑म॒ नु सूर्य॑मु॒च्चर॑न्तम् ।
तथा॑ कर॒द्वसु॑पति॒र्वसू॑नां दे॒वाँ ओहा॒नोऽव॒साग॑मिष्ठः ॥५॥

Vishvadanim sumanasah syama pashyema nu suryamuchcharantam
Tatha karadvasupatirvasunam devam ohanovasagamishthah

52.6

इन्द्रो॒ नेदि॑ष्ठ॒मव॒साग॑मिष्ठ॒ः सर॑स्वती॒ सिन्धु॑भि॒ः पिन्व॑माना ।
प॒र्जन्यो॑ न॒ ओष॑धीभिर्मयो॒भुर॒ग्निः सु॒शंस॑ः सु॒हव॑ः पि॒तेव॑ ॥६॥

Indro nedishthamavasagamishthah sarasvati sindhubhih pinvamana
Parjanyo na oshadhibhirmayobhuragnih sushansah suhavah piteva

52.7

विश्वे॑ देवास॒ आ ग॑त शृणु॒ता म॑ इ॒मं हव॑म् । एदं ब॒र्हिर्नि षी॑दत ॥७॥

Vishve devasa a gata shrinuta ma imam havam, edam barhirni shidata

52.8

यो वो॑ देवा घृ॒तस्नु॑ना ह॒व्येन॑ प्रति॒भूष॑ति । तं विश्व॒ उप॑ गच्छथ ॥८॥

Yo vo deva ghritasnuna havyena pratibhushati, tam vishva upa gachchhatha

52.9

उप॑ नः सू॒नवो॒ गिर॑ः शृ॒ण्वन्त्व॒मृत॑स्य॒ ये । सु॒मृ॒ळी॒का भ॑वन्तु नः ॥९॥

Upa nah sunavo girah shrinvantvamritasya ye, sumrilika bhavantu nah

52.10

विश्वे॑ दे॒वा ऋ॑ता॒वृध॑ ऋ॒तुभि॑र्हवन॒श्रुत॑ः । जु॒षन्तां॒ युज्यं॒ पय॑ः ॥१०॥

Vishve deva ritavridha ritubhirhavanashrutah, jushantam yujyam payah

52.11

स्तो॒त्रमिन्द्रो॑ म॒रुद्ग॑ण॒स्त्वष्टृ॑मान्मि॒त्रो अ॑र्य॒मा । इ॒मा ह॒व्या जु॑षन्त नः ॥११॥

Stotramindro marudganastvashtrimanmitro aryama, ima havya jushanta nah

52.12

इ॒मं नो॑ अग्ने अध्व॒रं होत॑र्वयुन॒शो य॑ज । चि॒कि॒त्वान्दैव्यं॒ जन॑म् ॥१२॥

Imam no agne adhvaram hotarvayunasho yaja, chikitvandaivyam janam

52.13

विश्वे॑ देवाः शृणु॒तेमं हवं॑ मे॒ ये अ॒न्तरि॑क्षे॒ य उप॒ द्यवि॒ ष्ठ ।
ये अ॑ग्निजि॒ह्वा उ॒त वा॒ यज॑त्रा आ॒सद्या॒स्मिन्ब॒र्हिषि॑ मादयध्वम् ॥१३॥

Vishve devah shrinutemam havam me ye antarikshe ya upa dyavi shtha
Ye agnijihva uta va yajatra asadyasminbarhishi madayadhvam

52.14

विश्वे॑ दे॒वा मम॑ शृण्वन्तु य॒ज्ञिया॑ उ॒भे रोद॑सी अ॒पां नपा॑च्च॒ मन्म॑ ।
मा वो॒ वचां॑सि परि॒चक्ष्या॑णि वोचं सु॒म्नेष्विद्वो॒ अन्त॑मा मदेम ॥१४॥

Vishve deva mama shrinvantu yagyiya ubhe rodasi apam napachcha manma
Ma vo vachansi parichakshyani vocham sumneshvidvo antama madema

52.15

ये के च॒ ज्मा म॒हिनो॒ अहि॑माया दि॒वो ज॑ज्ञि॒रे अ॒पां स॒धस्थे॑ ।
ते अ॒स्मभ्य॑मि॒षये॒ विश्व॒मायु॒ः क्षप॑ उ॒स्रा व॑रिवस्यन्तु दे॒वाः ॥१५॥

Ye ke cha jma mahino ahimaya divo jagyire apam sadhasthe
Te asmabhyamishaye vishvamayuh kshapa usra varivasyantu devah

52.16

अग्नी॑पर्जन्या॒वव॑तं॒ धियं॑ मे॒ऽस्मिन्हवे॑ सुहवा सुष्टु॒तिं न॑ः ।
इळा॑म॒न्यो ज॒नय॒द्गर्भ॑म॒न्यः प्र॒जाव॑ती॒रिष॒ आ ध॑त्तम॒स्मे ॥१६॥

Agniparjanyavavatam dhiyam mesminhave suhava sushtutim nah
Ilamanyo janayadgarbhamanyah prajavatirisha a dhattamasme

52.17

स्ती॒र्णे ब॒र्हिषि॑ समिधा॒ने अ॒ग्नौ सू॒क्तेन॑ म॒हा नम॒सा वि॑वासे ।
अ॒स्मिन्नो॑ अ॒द्य वि॒दथे॑ यजत्रा॒ विश्वे॑ देवा ह॒विषि॑ मादयध्वम् ॥१७॥

Stirne barhishi samidhane agnau suktena maha namasa vivase
Asminno adya vidathe yajatra vishve deva havishi madayadhvam