Sukta 51

51.1

16 rijishva bharadvajah, vishve devah, trishtup, 13 – 15 ushnik, 16 anushtup

उदु॒ त्यच्चक्षु॒र्महि॑ मि॒त्रयो॒राँ एति॑ प्रि॒यं वरु॑णयो॒रद॑ब्धम् ।
ऋ॒तस्य॒ शुचि॑ दर्श॒तमनी॑कं रु॒क्मो न दि॒व उदि॑ता॒ व्य॑द्यौत् ॥१॥

Udu tyachchakshurmahi mitrayoram eti priyam varunayoradabdham
Ritasya shuchi darshatamanikam rukmo na diva udita vyadyaut

51.2

वेद॒ यस्त्रीणि॑ वि॒दथा॑न्येषां दे॒वानां॒ जन्म॑ सनु॒तरा च॒ विप्र॑ः ।
ऋ॒जु मर्ते॑षु वृजि॒ना च॒ पश्य॑न्न॒भि च॑ष्टे॒ सूरो॑ अ॒र्य एवा॑न् ॥२॥

Veda yastrini vidathanyesham devanam janma sanutara cha viprah
Riju marteshu vrijina cha pashyannabhi chashte suro arya evan

51.3

स्तु॒ष उ॑ वो म॒ह ऋ॒तस्य॑ गो॒पानदि॑तिं मि॒त्रं वरु॑णं सुजा॒तान् ।
अ॒र्य॒मणं॒ भग॒मद॑ब्धधीती॒नच्छा॑ वोचे सध॒न्य॑ः पाव॒कान् ॥३॥

Stusha u vo maha ritasya gopanaditim mitram varunam sujatan
Aryamanam bhagamadabdhadhitinachchha voche sadhanyah pavakan

51.4

रि॒शाद॑स॒ः सत्प॑तीँ॒रद॑ब्धान्म॒हो राज्ञ॑ः सुवस॒नस्य॑ दा॒तॄन् ।
यून॑ः सुक्ष॒त्रान्क्षय॑तो दि॒वो नॄना॑दि॒त्यान्या॒म्यदि॑तिं दुवो॒यु ॥४॥

Rishadasah satpatinradabdhanmaho ragyah suvasanasya datrin
Yunah sukshatrankshayato divo nrinadityanyamyaditim duvoyu

51.5

द्यौ॒३ष्पित॒ः पृथि॑वि॒ मात॒रध्रु॒गग्ने॑ भ्रातर्वसवो मृ॒ळता॑ नः ।
विश्व॑ आदित्या अदिते स॒जोषा॑ अ॒स्मभ्यं॒ शर्म॑ बहु॒लं वि य॑न्त ॥५॥

Dyau3shpitah prithivi mataradhrugagne bhratarvasavo mrilata nah
Vishva aditya adite sajosha asmabhyam sharma bahulam vi yanta

51.6

मा नो॒ वृका॑य वृ॒क्ये॑ समस्मा अघाय॒ते री॑रधता यजत्राः ।
यू॒यं हि ष्ठा र॒थ्यो॑ नस्त॒नूनां॑ यू॒यं दक्ष॑स्य॒ वच॑सो बभू॒व ॥६॥

Ma no vrikaya vrikye samasma aghayate riradhata yajatrah
Yuyam hi shtha rathyo nastanunam yuyam dakshasya vachaso babhuva

51.7

मा व॒ एनो॑ अ॒न्यकृ॑तं भुजेम॒ मा तत्क॑र्म वसवो॒ यच्चय॑ध्वे ।
विश्व॑स्य॒ हि क्षय॑थ विश्वदेवाः स्व॒यं रि॒पुस्त॒न्वं॑ रीरिषीष्ट ॥७॥

Ma va eno anyakritam bhujema ma tatkarma vasavo yachchayadhve
Vishvasya hi kshayatha vishvadevah svayam ripustanvam ririshishta

51.8

नम॒ इदु॒ग्रं नम॒ आ वि॑वासे॒ नमो॑ दाधार पृथि॒वीमु॒त द्याम् ।
नमो॑ दे॒वेभ्यो॒ नम॑ ईश एषां कृ॒तं चि॒देनो॒ नम॒सा वि॑वासे ॥८॥

Nama idugram nama a vivase namo dadhara prithivimuta dyam
Namo devebhyo nama isha esham kritam chideno namasa vivase

51.9

ऋ॒तस्य॑ वो र॒थ्य॑ः पू॒तद॑क्षानृ॒तस्य॑ पस्त्य॒सदो॒ अद॑ब्धान् ।
ताँ आ नमो॑भिरुरु॒चक्ष॑सो॒ नॄन्विश्वा॑न्व॒ आ न॑मे म॒हो य॑जत्राः ॥९॥

Ritasya vo rathyah putadakshanritasya pastyasado adabdhan
Tam a namobhiruruchakshaso nrinvishvanva a name maho yajatrah

51.10

ते हि श्रेष्ठ॑वर्चस॒स्त उ॑ नस्ति॒रो विश्वा॑नि दुरि॒ता नय॑न्ति ।
सु॒क्ष॒त्रासो॒ वरु॑णो मि॒त्रो अ॒ग्निॠ॒तधी॑तयो वक्म॒राज॑सत्याः ॥१०॥

Te hi shreshthavarchasasta u nastiro vishvani durita nayanti
Sukshatraso varuno mitro agniritadhitayo vakmarajasatyah

51.11

ते न॒ इन्द्र॑ः पृथि॒वी क्षाम॑ वर्धन्पू॒षा भगो॒ अदि॑ति॒ः पञ्च॒ जना॑ः ।
सु॒शर्मा॑ण॒ः स्वव॑सः सुनी॒था भव॑न्तु नः सुत्रा॒त्रास॑ः सुगो॒पाः ॥११॥

Te na indrah prithivi kshama vardhanpusha bhago aditih pancha janah
Susharmanah svavasah sunitha bhavantu nah sutratrasah sugopah

51.12

नू स॒द्मानं॑ दि॒व्यं नंशि॑ देवा॒ भार॑द्वाजः सुम॒तिं या॑ति॒ होता॑ ।
आ॒सा॒नेभि॒र्यज॑मानो मि॒येधै॑र्दे॒वानां॒ जन्म॑ वसू॒युर्व॑वन्द ॥१२॥

Nu sadmanam divyam nanshi deva bharadvajah sumatim yati hota
Asanebhiryajamano miyedhairdevanam janma vasuyurvavanda

51.13

अप॒ त्यं वृ॑जि॒नं रि॒पुं स्ते॒नम॑ग्ने दुरा॒ध्य॑म् । द॒वि॒ष्ठम॑स्य सत्पते कृ॒धी सु॒गम् ॥१३॥

Apa tyam vrijinam ripum stenamagne duradhyam, davishthamasya satpate kridhi sugam

51.14

ग्रावा॑णः सोम नो॒ हि कं॑ सखित्व॒नाय॑ वाव॒शुः । ज॒ही न्य१त्रिणं॑ प॒णिं वृको॒ हि षः ॥१४॥

Gravanah soma no hi kam sakhitvanaya vavashuh, jahi nya1trinam panim vriko hi shah

51.15

यू॒यं हि ष्ठा सु॑दानव॒ इन्द्र॑ज्येष्ठा अ॒भिद्य॑वः । कर्ता॑ नो॒ अध्व॒न्ना सु॒गं गो॒पा अ॒मा ॥१५॥

Yuyam hi shtha sudanava indrajyeshtha abhidyavah, karta no adhvanna sugam gopa ama

51.16

अपि॒ पन्था॑मगन्महि स्वस्ति॒गाम॑ने॒हस॑म् । येन॒ विश्वा॒ः परि॒ द्विषो॑ वृ॒णक्ति॑ वि॒न्दते॒ वसु॑ ॥१६॥

Api panthamaganmahi svastigamanehasam, yena vishvah pari dvisho vrinakti vindate vasu