Sukta 50

50.1

15 rijishva bharadvajah, vishve devah, trishtup

हु॒वे वो॑ दे॒वीमदि॑तिं॒ नमो॑भिर्मृळी॒काय॒ वरु॑णं मि॒त्रम॒ग्निम् ।
अ॒भि॒क्ष॒दाम॑र्य॒मणं॑ सु॒शेवं॑ त्रा॒तॄन्दे॒वान्त्स॑वि॒तारं॒ भगं॑ च ॥१॥

Huve vo devimaditim namobhirmrilikaya varunam mitramagnim
Abhikshadamaryamanam sushevam tratrindevantsavitaram bhagam cha

50.2

सु॒ज्योति॑षः सूर्य॒ दक्ष॑पितॄननागा॒स्त्वे सु॑महो वीहि दे॒वान् ।
द्वि॒जन्मा॑नो॒ य ऋ॑त॒साप॑ः स॒त्याः स्व॑र्वन्तो यज॒ता अ॑ग्निजि॒ह्वाः ॥२॥

Sujyotishah surya dakshapitrinanagastve sumaho vihi devan
Dvijanmano ya ritasapah satyah svarvanto yajata agnijihvah

50.3

उ॒त द्या॑वापृथिवी क्ष॒त्रमु॒रु बृ॒हद्रो॑दसी शर॒णं सु॑षुम्ने ।
म॒हस्क॑रथो॒ वरि॑वो॒ यथा॑ नो॒ऽस्मे क्षया॑य धिषणे अने॒हः ॥३॥

Uta dyavaprithivi kshatramuru brihadrodasi sharanam sushumne
Mahaskaratho varivo yatha nosme kshayaya dhishane anehah

50.4

आ नो॑ रु॒द्रस्य॑ सू॒नवो॑ नमन्ताम॒द्या हू॒तासो॒ वस॒वोऽधृ॑ष्टाः ।
यदी॒मर्भे॑ मह॒ति वा॑ हि॒तासो॑ बा॒धे म॒रुतो॒ अह्वा॑म दे॒वान् ॥४॥

A no rudrasya sunavo namantamadya hutaso vasavodhrishtah
Yadimarbhe mahati va hitaso badhe maruto ahvama devan

50.5

मि॒म्यक्ष॒ येषु॑ रोद॒सी नु दे॒वी सिष॑क्ति पू॒षा अ॑भ्यर्ध॒यज्वा॑ ।
श्रु॒त्वा हवं॑ मरुतो॒ यद्ध॑ या॒थ भूमा॑ रेजन्ते॒ अध्व॑नि॒ प्रवि॑क्ते ॥५॥

Mimyaksha yeshu rodasi nu devi sishakti pusha abhyardhayajva
Shrutva havam maruto yaddha yatha bhuma rejante adhvani pravikte

50.6

अ॒भि त्यं वी॒रं गिर्व॑णसम॒र्चेन्द्रं॒ ब्रह्म॑णा जरित॒र्नवे॑न ।
श्रव॒दिद्धव॒मुप॑ च॒ स्तवा॑नो॒ रास॒द्वाजाँ॒ उप॑ म॒हो गृ॑णा॒नः ॥६॥

Abhi tyam viram girvanasamarchendram brahmana jaritarnavena
Shravadiddhavamupa cha stavano rasadvajam upa maho grinanah

50.7

ओ॒मान॑मापो मानुषी॒रमृ॑क्तं॒ धात॑ तो॒काय॒ तन॑याय॒ शं योः ।
यू॒यं हि ष्ठा भि॒षजो॑ मा॒तृत॑मा॒ विश्व॑स्य स्था॒तुर्जग॑तो॒ जनि॑त्रीः ॥७॥

Omanamapo manushiramriktam dhata tokaya tanayaya sham yoh
Yuyam hi shtha bhishajo matritama vishvasya sthaturjagato janitrih

50.8

आ नो॑ दे॒वः स॑वि॒ता त्राय॑माणो॒ हिर॑ण्यपाणिर्यज॒तो ज॑गम्यात् ।
यो दत्र॑वाँ उ॒षसो॒ न प्रती॑कं व्यूर्णु॒ते दा॒शुषे॒ वार्या॑णि ॥८॥

A no devah savita trayamano hiranyapaniryajato jagamyat
Yo datravam ushaso na pratikam vyurnute dashushe varyani

50.9

उ॒त त्वं सू॑नो सहसो नो अ॒द्या दे॒वाँ अ॒स्मिन्न॑ध्व॒रे व॑वृत्याः ।
स्याम॒हं ते॒ सद॒मिद्रा॒तौ तव॑ स्याम॒ग्नेऽव॑सा सु॒वीर॑ः ॥९॥

Uta tvam suno sahaso no adya devam asminnadhvare vavrityah
Syamaham te sadamidratau tava syamagnevasa suvirah

50.10

उ॒त त्या मे॒ हव॒मा ज॑ग्म्यातं॒ नास॑त्या धी॒भिर्यु॒वम॒ङ्ग वि॑प्रा ।
अत्रिं॒ न म॒हस्तम॑सोऽमुमुक्तं॒ तूर्व॑तं नरा दुरि॒ताद॒भीके॑ ॥१०॥

Uta tya me havama jagmyatam nasatya dhibhiryuvamanga vipra
Atrim na mahastamasomumuktam turvatam nara duritadabhike

50.11

ते नो॑ रा॒यो द्यु॒मतो॒ वाज॑वतो दा॒तारो॑ भूत नृ॒वत॑ः पुरु॒क्षोः ।
द॒श॒स्यन्तो॑ दि॒व्याः पार्थि॑वासो॒ गोजा॑ता॒ अप्या॑ मृ॒ळता॑ च देवाः ॥११॥

Te no rayo dyumato vajavato dataro bhuta nrivatah purukshoh
Dashasyanto divyah parthivaso gojata apya mrilata cha devah

50.12

ते नो॑ रु॒द्रः सर॑स्वती स॒जोषा॑ मी॒ळ्हुष्म॑न्तो॒ विष्णु॑र्मृळन्तु वा॒युः ।
ऋ॒भु॒क्षा वाजो॒ दैव्यो॑ विधा॒ता प॒र्जन्या॒वाता॑ पिप्यता॒मिषं॑ नः ॥१२॥

Te no rudrah sarasvati sajosha milhushmanto vishnurmrilantu vayuh
Ribhuksha vajo daivyo vidhata parjanyavata pipyatamisham nah

50.13

उ॒त स्य दे॒वः स॑वि॒ता भगो॑ नो॒ऽपां नपा॑दवतु॒ दानु॒ पप्रि॑ः ।
त्वष्टा॑ दे॒वेभि॒र्जनि॑भिः स॒जोषा॒ द्यौर्दे॒वेभि॑ः पृथि॒वी स॑मु॒द्रैः ॥१३॥

Uta sya devah savita bhago nopam napadavatu danu paprih
Tvashta devebhirjanibhih sajosha dyaurdevebhih prithivi samudraih

50.14

उ॒त नोऽहि॑र्बु॒ध्न्य॑ः शृणोत्व॒ज एक॑पात्पृथि॒वी स॑मु॒द्रः ।
विश्वे॑ दे॒वा ऋ॑ता॒वृधो॑ हुवा॒नाः स्तु॒ता मन्त्रा॑ः कविश॒स्ता अ॑वन्तु ॥१४॥

Uta nohirbudhnyah shrinotvaja ekapatprithivi samudrah
Vishve deva ritavridho huvanah stuta mantrah kavishasta avantu

50.15

ए॒वा नपा॑तो॒ मम॒ तस्य॑ धी॒भिर्भ॒रद्वा॑जा अ॒भ्य॑र्चन्त्य॒र्कैः ।
ग्ना हु॒तासो॒ वस॒वोऽधृ॑ष्टा॒ विश्वे॑ स्तु॒तासो॑ भूता यजत्राः ॥१५॥

Eva napato mama tasya dhibhirbharadvaja abhyarchantyarkaih
Gna hutaso vasavodhrishta vishve stutaso bhuta yajatrah