Sukta 54

54.1

10 barhaspatyo bharadvajah, pusha, gayatri

सं पू॑षन्वि॒दुषा॑ नय॒ यो अञ्ज॑सानु॒शास॑ति । य ए॒वेदमिति॒ ब्रव॑त् ॥१॥

Sam pushanvidusha naya yo anjasanushasati, ya evedamiti bravat

समु॑ पू॒ष्णा ग॑मेमहि॒ यो गृ॒हाँ अ॑भि॒शास॑ति । इ॒म ए॒वेति॑ च॒ ब्रव॑त् ॥२॥

Samu pushna gamemahi yo griham abhishasati, ima eveti cha bravat

पू॒ष्णश्च॒क्रं न रि॑ष्यति॒ न कोशोऽव॑ पद्यते । नो अ॑स्य व्यथते प॒विः ॥३॥

Pushnashchakram na rishyati na koshova padyate, no asya vyathate pavih

यो अ॑स्मै ह॒विषावि॑ध॒न्न तं पू॒षापि॑ मृष्यते । प्र॒थ॒मो वि॑न्दते॒ वसु॑ ॥४॥

Yo asmai havishavidhanna tam pushapi mrishyate, prathamo vindate vasu

पू॒षा गा अन्वे॑तु नः पू॒षा र॑क्ष॒त्वर्वतः । पू॒षा वाजं॑ सनोतु नः ॥५॥

Pusha ga anvetu nah pusha rakshatvarvatah, pusha vajam sanotu nah

पूष॒न्ननु॒ प्र गा इ॑हि॒ यज॑मानस्य सुन्व॒तः । अ॒स्माकं॑ स्तुव॒तामु॒त ॥६॥

Pushannanu pra ga ihi yajamanasya sunvatah, asmakam stuvatamuta

माकि॑र्नेश॒न्माकीं॑ रिष॒न्माकीं॒ सं शा॑रि॒ केव॑टे । अथारि॑ष्टाभि॒रा ग॑हि ॥७॥

Makirneshanmakim rishanmakim sam shari kevate, atharishtabhira gahi

शृ॒ण्वन्तं॑ पू॒षणं॑ व॒यमिर्य॒मन॑ष्टवेदसम् । ईशा॑नं रा॒य ई॑महे ॥८॥

Shrinvantam pushanam vayamiryamanashtavedasam, ishanam raya imahe

पूष॒न्तव॑ व्र॒ते व॒यं न रि॑ष्येम॒ कदा॑ च॒न । स्तो॒तार॑स्त इ॒ह स्म॑सि ॥९॥

Pushantava vrate vayam na rishyema kada chana, stotarasta iha smasi

परि॑ पू॒षा प॒रस्ता॒द्धस्तं॑ दधातु॒ दक्षि॑णम् । पुन॑र्नो न॒ष्टमाज॑तु ॥१०॥

Pari pusha parastaddhastam dadhatu dakshinam, punarno nashtamajatu