Sukta 12

12.1

6 barhaspatyo bharadvajah, agni :, trishtup [ 6 purastajjyotirva ]

मध्ये॒ होता॑ दुरो॒णे ब॒र्हिषो॒ राळ॒ग्निस्तो॒दस्य॒ रोद॑सी॒ यज॑ध्यै ।
अ॒यं स सू॒नुः सह॑स ऋ॒तावा॑ दू॒रात् सूर्यो॒ न शो॒चिषा॑ ततान ॥१॥

Madhye hota durone barhisho ralagnistodasya rodasi yajadhyai
Ayam sa sunuh sahasa ritava durat suryo na shochisha tatana

आ यस्मि॒न् त्वे स्वपा॑के यजत्र॒ यक्ष॑द् राजन् त्स॒र्वता॑तेव॒ नु द्यौः ।
त्रि॒ष॒धस्थ॑स्तत॒रुषो॒ न जंहो॑ ह॒व्या म॒घानि॒ मानु॑षा॒ यज॑ध्यै ॥२॥

A yasmin tve svapake yajatra yakshad rajan tsarvatateva nu dyauh
Trishadhasthastatarusho na janho havya maghani manusha yajadhyai

तेजि॑ष्ठा॒ यस्या॑र॒तिर्व॑ने॒राट् तो॒दो अध्व॒न् न वृ॑धसा॒नो अ॑द्यौत् ।
अ॒द्रो॒घो न द्र॑वि॒ता चे॑तति॒ त्मन्नम॑र्त्योऽव॒र्त्र ओष॑धीषु ॥३॥

Tejishtha yasyaratirvanerat todo adhvan na vridhasano adyaut
Adrogho na dravita chetati tmannamartyovartra oshadhishu

सास्माके॑भिरे॒तरी॒ न शू॒षैर॒ग्निः ष्ट॑वे॒ दम॒ आ जा॒तवे॑दाः ।
द्र्व॑न्नो व॒न्वन् क्रत्वा॒ नार्वो॒स्रः पि॒तेव॑ जार॒यायि॑ य॒ज्ञैः ॥४॥

Sasmakebhiretari na shushairagnih shtave dama a jatavedah
Drvanno vanvan kratva narvosrah piteva jarayayi yagyaih

अध॑ स्मास्य पनयन्ति॒ भासो॒ वृथा॒ यत् तक्ष॑दनु॒याति॑ पृ॒थ्वीम् ।
स॒द्यो यः स्प॒न्द्रो विषि॑तो॒ धवी॑यानृ॒णो न ता॒युरति॒ धन्वा॑ राट् ॥५॥

Adha smasya panayanti bhaso vritha yat takshadanuyati prithvim
Sadyo yah spandro vishito dhaviyanrino na tayurati dhanva rat

स त्वं नो॑ अर्व॒न् निदा॑या॒ विश्वे॑भिरग्ने अ॒ग्निभि॑रिधा॒नः ।
वेषि॑ रा॒यो वि या॑सि दु॒च्छुना॒ मदे॑म श॒तहि॑माः सु॒वीरा॑ः ॥६॥

Sa tvam no arvan nidaya vishvebhiragne agnibhiridhanah
Veshi rayo vi yasi duchchhuna madema shatahimah suvirah