Sukta 11

11.1

6 barhaspatyo bharadvajah, agni :, trishtup

यज॑स्व होतरिषि॒तो यजी॑या॒नग्ने॒ बाधो॑ म॒रुतां॒ न प्रयु॑क्ति ।
आ नो॑ मि॒त्रावरु॑णा॒ नास॑त्या॒ द्यावा॑ हो॒त्राय॑ पृथि॒वी व॑वृत्याः ॥१॥

Yajasva hotarishito yajiyanagne badho marutam na prayukti
A no mitravaruna nasatya dyava hotraya prithivi vavrityah

त्वं होता॑ म॒न्द्रत॑मो नो अ॒ध्रुग॒न्तर्दे॒वो वि॒दथा॒ मर्त्ये॑षु ।
पा॒व॒कया॑ जु॒ह्वा॒३ वह्नि॑रा॒सा ऽग्ने॒ यज॑स्व त॒न्वं१ तव॒ स्वाम् ॥२॥

Tvam hota mandratamo no adhrugantardevo vidatha martyeshu
Pavakaya juhva3 vahnirasa gne yajasva tanvan1 tava svam

धन्या॑ चि॒द्धि त्वे धि॒षणा॒ वष्टि॒ प्र दे॒वाञ्जन्म॑ गृण॒ते यज॑ध्यै ।
वेपि॑ष्ठो॒ अङ्गि॑रसां॒ यद्ध॒ विप्रो॒ मधु॑ च्छ॒न्दो भन॑ति रे॒भ इ॒ष्टौ ॥३॥

Dhanya chiddhi tve dhishana vashti pra devanjanma grinate yajadhyai
Vepishtho angirasam yaddha vipro madhu chchhando bhanati rebha ishtau

अदि॑द्युत॒त् स्वपा॑को वि॒भावा ऽग्ने॒ यज॑स्व॒ रोद॑सी उरू॒ची ।
आ॒युं न यं नम॑सा रा॒तह॑व्या अ॒ञ्जन्ति॑ सुप्र॒यसं॒ पञ्च॒ जना॑ः ॥४॥

Adidyutat svapako vibhava gne yajasva rodasi uruchi
Ayum na yam namasa ratahavya anjanti suprayasam pancha janah

वृ॒ञ्जे ह॒ यन्नम॑सा ब॒र्हिर॒ग्नावया॑मि॒ स्रुग्घृ॒तव॑ती सुवृ॒क्तिः ।
अम्य॑क्षि॒ सद्म॒ सद॑ने पृथि॒व्या अश्रा॑यि य॒ज्ञः सूर्ये॒ न चक्षु॑ः ॥५॥

Vrinje ha yannamasa barhiragnavayami srugghritavati suvriktih
Amyakshi sadma sadane prithivya ashrayi yagyah surye na chakshuh

द॒श॒स्या न॑ः पुर्वणीक होतर्दे॒वेभि॑रग्ने अ॒ग्निभि॑रिधा॒नः ।
रा॒यः सू॑नो सहसो वावसा॒ना अति॑ स्रसेम वृ॒जनं॒ नांह॑ः ॥६॥

Dashasya nah purvanika hotardevebhiragne agnibhiridhanah
Rayah suno sahaso vavasana ati srasema vrijanam nanhah