Sukta 10

10.1

7 barhaspatyo bharadvajah, agni :, trishtup ; 7 dvipada virat

पु॒रो वो॑ म॒न्द्रं दि॒व्यं सु॑वृ॒क्तिं प्र॑य॒ति य॒ज्ञे अ॒ग्निम॑ध्व॒रे द॑धिध्वम् ।
पु॒र उ॒क्थेभि॒ः स हि नो॑ वि॒भावा॑ स्वध्व॒रा क॑रति जा॒तवे॑दाः ॥१॥

Puro vo mandram divyam suvriktim prayati yagye agnimadhvare dadhidhvam
Pura ukthebhih sa hi no vibhava svadhvara karati jatavedah

10.2

तमु॑ द्युमः पुर्वणीक होत॒रग्ने॑ अ॒ग्निभि॒र्मनु॑ष इधा॒नः ।
स्तोमं॒ यम॑स्मै म॒मते॑व शू॒षं घृ॒तं न शुचि॑ म॒तय॑ः पवन्ते ॥२॥

Tamu dyumah purvanika hotaragne agnibhirmanusha idhanah
Stomam yamasmai mamateva shusham ghritam na shuchi matayah pavante

10.3

पी॒पाय॒ स श्रव॑सा॒ मर्त्ये॑षु॒ यो अ॒ग्नये॑ द॒दाश॒ विप्र॑ उ॒क्थैः ।
चि॒त्राभि॒स्तमू॒तिभि॑श्चि॒त्रशो॑चिर्व्र॒जस्य॑ सा॒ता गोम॑तो दधाति ॥३॥

Pipaya sa shravasa martyeshu yo agnaye dadasha vipra ukthaih
Chitrabhistamutibhishchitrashochirvrajasya sata gomato dadhati

10.4

आ यः प॒प्रौ जाय॑मान उ॒र्वी दू॑रे॒दृशा॑ भा॒सा कृ॒ष्णाध्वा॑ ।
अध॑ ब॒हु चि॒त् तम॒ ऊर्म्या॑यास्ति॒रः शो॒चिषा॑ ददृशे पाव॒कः ॥४॥

A yah paprau jayamana urvi duredrisha bhasa krishnadhva
Adha bahu chit tama urmyayastirah shochisha dadrishe pavakah

10.5

नू न॑श्चि॒त्रं पु॑रु॒वाजा॑भिरू॒ती अग्ने॑ र॒यिं म॒घव॑द्भ्यश्च धेहि ।
ये राध॑सा॒ श्रव॑सा॒ चात्य॒न्यान् त्सु॒वीर्ये॑भिश्चा॒भि सन्ति॒ जना॑न् ॥५॥

Nu nashchitram puruvajabhiruti agne rayim maghavadbhyashcha dhehi
Ye radhasa shravasa chatyanyan tsuviryebhishchabhi santi janan

10.6

इ॒मं य॒ज्ञं चनो॑ धा अग्न उ॒शन् यं त॑ आसा॒नो जु॑हु॒ते ह॒विष्मा॑न् ।
भ॒रद्वा॑जेषु दधिषे सुवृ॒क्तिमवी॒र्वाज॑स्य॒ गध्य॑स्य सा॒तौ ॥६॥

Imam yagyam chano dha agna ushan yam ta asano juhute havishman
Bharadvajeshu dadhishe suvriktimavirvajasya gadhyasya satau

10.7

वि द्वेषां॑सीनु॒हि व॒र्धयेळां॒ मदे॑म श॒तहि॑माः सु॒वीरा॑ः ॥७॥

Vi dveshansinuhi vardhayelam madema shatahimah suvirah