Sukta 9

9.1

7 barhaspatyo bharadvajah, vaishvanarosgni :, trishtup, [ 7 prastarapanktirva ]

अह॑श्च कृ॒ष्णमह॒रर्जु॑नं च॒ वि व॑र्तेते॒ रज॑सी वे॒द्याभि॑ः ।
वै॒श्वा॒न॒रो जाय॑मानो॒ न राजा ऽवा॑तिर॒ज्ज्योति॑षा॒ग्निस्तमां॑सि ॥१॥

Ahashcha krishnamahararjunam cha vi vartete rajasi vedyabhih
Vaishvanaro jayamano na raja vatirajjyotishagnistamansi

नाहं तन्तुं॒ न वि जा॑ना॒म्योतुं॒ न यं वय॑न्ति सम॒रेऽत॑मानाः ।
कस्य॑ स्वित् पु॒त्र इ॒ह वक्त्वा॑नि प॒रो व॑दा॒त्यव॑रेण पि॒त्रा ॥२॥

Naham tantum na vi janamyotum na yam vayanti samaretamanah
Kasya svit putra iha vaktvani paro vadatyavarena pitra

स इत् तन्तुं॒ स वि जा॑ना॒त्योतुं॒ स वक्त्वा॑न्यृतु॒था व॑दाति ।
य ईं॒ चिके॑तद॒मृत॑स्य गो॒पा अ॒वश्चर॑न् प॒रो अ॒न्येन॒ पश्य॑न् ॥३॥

Sa it tantum sa vi janatyotum sa vaktvanyritutha vadati
Ya im chiketadamritasya gopa avashcharan paro anyena pashyan

अ॒यं होता॑ प्रथ॒मः पश्य॑ते॒ममि॒दं ज्योति॑र॒मृतं॒ मर्त्ये॑षु ।
अ॒यं स ज॑ज्ञे ध्रु॒व आ निष॒त्तो ऽम॑र्त्यस्त॒न्वा॒३ वर्ध॑मानः ॥४॥

Ayam hota prathamah pashyatemamidam jyotiramritam martyeshu
Ayam sa jagye dhruva a nishatto martyastanva3 vardhamanah

ध्रु॒वं ज्योति॒र्निहि॑तं दृ॒शये॒ कं मनो॒ जवि॑ष्ठं प॒तय॑त्स्व॒न्तः ।
विश्वे॑ दे॒वाः सम॑नस॒ः सके॑ता॒ एकं॒ क्रतु॑म॒भि वि य॑न्ति सा॒धु ॥५॥

Dhruvam jyotirnihitam drishaye kam mano javishtham patayatsvantah
Vishve devah samanasah saketa ekam kratumabhi vi yanti sadhu

वि मे॒ कर्णा॑ पतयतो॒ वि चक्षु॒र्वी॒३दं ज्योति॒र्हृद॑य॒ आहि॑तं॒ यत् ।
वि मे॒ मन॑श्चरति दू॒रआ॑धी॒ः किं स्वि॑द् व॒क्ष्यामि॒ किमु॒ नू म॑निष्ये ॥६॥

Vi me karna patayato vi chakshurvi3dam jyotirhridaya ahitam yat
Vi me manashcharati duraadhih kim svid vakshyami kimu nu manishye

विश्वे॑ दे॒वा अ॑नमस्यन्भिया॒नास्त्वाम॑ग्ने॒ तम॑सि तस्थि॒वांस॑म् ।
वै॒श्वा॒न॒रो॑ऽवतू॒तये॒ नो ऽम॑र्त्योऽवतू॒तये॑ नः ॥७॥

Vishve deva anamasyanbhiyanastvamagne tamasi tasthivansam
Vaishvanarovatutaye no martyovatutaye nah