Sukta 13

13.1

6 barhaspatyo bharadvajah, agni :, trishtup

त्वद् विश्वा॑ सुभग॒ सौभ॑गा॒न्यग्ने॒ वि य॑न्ति व॒निनो॒ न व॒याः ।
श्रु॒ष्टी र॒यिर्वाजो॑ वृत्र॒तूर्ये॑ दि॒वो वृ॒ष्टिरीड्यो॑ री॒तिर॒पाम् ॥१॥

Tvad vishva subhaga saubhaganyagne vi yanti vanino na vayah
Shrushti rayirvajo vritraturye divo vrishtiridyo ritirapam

त्वं भगो॑ न॒ आ हि रत्न॑मि॒षे परि॑ज्मेव क्षयसि द॒स्मव॑र्चाः ।
अग्ने॑ मि॒त्रो न बृ॑ह॒त ऋ॒तस्याऽसि॑ क्ष॒त्ता वा॒मस्य॑ देव॒ भूरे॑ः ॥२॥

Tvam bhago na a hi ratnamishe parijmeva kshayasi dasmavarchah
Agne mitro na brihata ritasyasi kshatta vamasya deva bhureh

स सत्प॑ति॒ः शव॑सा हन्ति वृ॒त्रमग्ने॒ विप्रो॒ वि प॒णेर्भ॑र्ति॒ वाज॑म् ।
यं त्वं प्र॑चेत ऋतजात रा॒या स॒जोषा॒ नप्त्रा॒पां हि॒नोषि॑ ॥३॥

Sa satpatih shavasa hanti vritramagne vipro vi panerbharti vajam
Yam tvam pracheta ritajata raya sajosha naptrapam hinoshi

यस्ते॑ सूनो सहसो गी॒र्भिरु॒क्थैर्य॒ज्ञैर्मर्तो॒ निशि॑तिं वे॒द्यान॑ट् ।
विश्वं॒ स दे॑व॒ प्रति॒ वार॑मग्ने ध॒त्ते धा॒न्यं१ पत्य॑ते वस॒व्यै॑ः ॥४॥

Yaste suno sahaso girbhirukthairyagyairmarto nishitim vedyanat
Vishvam sa deva prati varamagne dhatte dhanyan1 patyate vasavyaih

ता नृभ्य॒ आ सौ॑श्रव॒सा सु॒वीरा ऽग्ने॑ सूनो सहसः पु॒ष्यसे॑ धाः ।
कृ॒णोषि॒ यच्छव॑सा॒ भूरि॑ प॒श्वो वयो॒ वृका॑या॒रये॒ जसु॑रये ॥५॥

Ta nribhya a saushravasa suvira gne suno sahasah pushyase dhah
Krinoshi yachchhavasa bhuri pashvo vayo vrikayaraye jasuraye

व॒द्मा सू॑नो सहसो नो॒ विहा॑या॒ अग्ने॑ तो॒कं तन॑यं वा॒जि नो॑ दाः ।
विश्वा॑भिर्गी॒र्भिर॒भि पू॒र्तिम॑श्यां॒ मदे॑म श॒तहि॑माः सु॒वीरा॑ः ॥६॥

Vadma suno sahaso no vihaya agne tokam tanayam vaji no dah
Vishvabhirgirbhirabhi purtimashyam madema shatahimah suvirah