Sukta 3

3.1

12 vasushruta atreyah, agnih, 3 marudrudravishnavah, trishtup, 1 virat

त्वम॑ग्ने॒ वरु॑णो॒ जाय॑से॒ यत्त्वं मि॒त्रो भ॑वसि॒ यत्समि॑द्धः ।
त्वे विश्वे॑ सहसस्पुत्र दे॒वास्त्वमिन्द्रो॑ दा॒शुषे॒ मर्त्या॑य ॥१॥

Tvamagne varuno jayase yattvam mitro bhavasi yatsamiddhah
Tve vishve sahasasputra devastvamindro dashushe martyaya

त्वम॑र्य॒मा भ॑वसि॒ यत् क॒नीनां॒ नाम॑ स्वधाव॒न् गुह्यं॑ बिभर्षि ।
अ॒ञ्जन्ति॑ मि॒त्रं सुधि॑तं॒ न गोभि॒र्यद् दम्प॑ती॒ सम॑नसा कृ॒णोषि॑ ॥२॥

Tvamaryama bhavasi yat kaninam nama svadhavan guhyam bibharshi
Anjanti mitram sudhitam na gobhiryad dampati samanasa krinoshi

तव॑ श्रि॒ये म॒रुतो॑ मर्जयन्त॒ रुद्र॒ यत् ते॒ जनि॑म॒ चारु॑ चि॒त्रम् ।
प॒दं यद् विष्णो॑रुप॒मं नि॒धायि॒ तेन॑ पासि॒ गुह्यं॒ नाम॒ गोना॑म् ॥३॥

Tava shriye maruto marjayanta rudra yat te janima charu chitram
Padam yad vishnorupamam nidhayi tena pasi guhyam nama gonam

तव॑ श्रि॒या सु॒दृशो॑ देव दे॒वाः पु॒रू दधा॑ना अ॒मृतं॑ सपन्त ।
होता॑रम॒ग्निं मनु॑षो॒ नि षे॑दुर्दश॒स्यन्त॑ उ॒शिज॒ः शंस॑मा॒योः ॥४॥

Tava shriya sudrisho deva devah puru dadhana amritam sapanta
Hotaramagnim manusho ni shedurdashasyanta ushijah shansamayoh

न त्वद्धोता॒ पूर्वो॑ अग्ने॒ यजी॑या॒न् न काव्यै॑ः प॒रो अ॑स्ति स्वधावः ।
वि॒शश्च॒ यस्या॒ अति॑थि॒र्भवा॑सि॒ स य॒ज्ञेन॑ वनवद् देव॒ मर्ता॑न् ॥५॥

Na tvaddhota purvo agne yajiyan na kavyaih paro asti svadhavah
Vishashcha yasya atithirbhavasi sa yagyena vanavad deva martan

व॒यम॑ग्ने वनुयाम॒ त्वोता॑ वसू॒यवो॑ ह॒विषा॒ बुध्य॑मानाः ।
व॒यं स॑म॒र्ये वि॒दथे॒ष्वह्नां॑ व॒यं रा॒या स॑हसस्पुत्र॒ मर्ता॑न् ॥६॥

Vayamagne vanuyama tvota vasuyavo havisha budhyamanah
Vayam samarye vidatheshvahnam vayam raya sahasasputra martan

यो न॒ आगो॑ अ॒भ्येनो॒ भरा॒त्यधीद॒घम॒घशं॑से दधात ।
ज॒ही चि॑कित्वो अ॒भिश॑स्तिमे॒तामग्ने॒ यो नो॑ म॒र्चय॑ति द्व॒येन॑ ॥७॥

Yo na ago abhyeno bharatyadhidaghamaghashanse dadhata
Jahi chikitvo abhishastimetamagne yo no marchayati dvayena

त्वाम॒स्या व्युषि॑ देव॒ पूर्वे॑ दू॒तं कृ॑ण्वा॒ना अ॑यजन्त ह॒व्यैः ।
सं॒स्थे यद॑ग्न॒ ईय॑से रयी॒णां दे॒वो मर्तै॒र्वसु॑भिरि॒ध्यमा॑नः ॥८॥

Tvamasya vyushi deva purve dutam krinvana ayajanta havyaih
Sansthe yadagna iyase rayinam devo martairvasubhiridhyamanah

अव॑ स्पृधि पि॒तरं॒ योधि॑ वि॒द्वान् पु॒त्रो यस्ते॑ सहसः सून ऊ॒हे ।
क॒दा चि॑कित्वो अ॒भि च॑क्षसे॒ नोऽग्ने॑ क॒दाँ ऋ॑त॒चिद् या॑तयासे ॥९॥

Ava spridhi pitaram yodhi vidvan putro yaste sahasah suna uhe
Kada chikitvo abhi chakshase nogne kadam ritachid yatayase

भूरि॒ नाम॒ वन्द॑मानो दधाति पि॒ता व॑सो॒ यदि॒ तज्जो॒षया॑से ।
कु॒विद् दे॒वस्य॒ सह॑सा चका॒नः सु॒म्नम॒ग्निर्व॑नते वावृधा॒नः ॥१०॥

Bhuri nama vandamano dadhati pita vaso yadi tajjoshayase
Kuvid devasya sahasa chakanah sumnamagnirvanate vavridhanah

त्वम॒ङ्ग ज॑रि॒तारं॑ यविष्ठ॒ विश्वा॑न्यग्ने दुरि॒ताति॑ पर्षि ।
स्ते॒ना अ॑दृश्रन् रि॒पवो॒ जना॒सोऽज्ञा॑तकेता वृजि॒ना अ॑भूवन् ॥११॥

Tvamanga jaritaram yavishtha vishvanyagne duritati parshi
Stena adrishran ripavo janasogyataketa vrijina abhuvan

इ॒मे यामा॑सस्त्व॒द्रिग॑भूव॒न् वस॑वे वा॒ तदिदागो॑ अवाचि ।
नाहा॒यम॒ग्निर॒भिश॑स्तये नो॒ न रीष॑ते वावृधा॒नः परा॑ दात् ॥१२॥

Ime yamasastvadrigabhuvan vasave va tadidago avachi
Nahayamagnirabhishastaye no na rishate vavridhanah para dat