সূক্ত 3

3.1

১২ বসুশ্রুত আত্রেয়ঃ। অগ্নিঃ, ৩ মরুদ্রুদ্রবিষ্ণবঃ। ত্রিষ্টুপ্, ১ বিরাট্।

ত্বমগ্নে বরুণো জায়সে যত্ত্বং মিত্রো ভবসি যত্সমিদ্ধঃ ।
ত্বে বিশ্বে সহসস্পুত্র দেবাস্ত্বমিন্দ্রো দাশুষে মর্ত্যায় ॥১॥

ত্বমর্যমা ভবসি যৎ কনীনাং নাম স্বধাবন্ গুহ্যং বিভর্ষি ।
অঞ্জন্তি মিত্রং সুধিতং ন গোভির্যদ্ দম্পতী সমনসা কৃণোষি ॥২॥

তব শ্রিয়ে মরুতো মর্জয়ন্ত রুদ্র যৎ তে জনিম চারু চিত্রম্ ।
পদং যদ্ বিষ্ণোরুপমং নিধায়ি তেন পাসি গুহ্যং নাম গোনাম্ ॥৩॥

তব শ্রিয়া সুদৃশো দেব দেবাঃ পুরূ দধানা অমৃতং সপন্ত ।
হোতারমগ্নিং মনুষো নি ষেদুর্দশস্যন্ত উশিজঃ শংসমায়োঃ ॥৪॥

ন ত্বদ্ধোতা পূর্বো অগ্নে যজীয়ান্ ন কাব্যৈঃ পরো অস্তি স্বধাবঃ ।
বিশশ্চ যস্যা অতিথির্ভবাসি স যজ্ঞেন বনবদ্ দেব মর্তান্ ॥৫॥

বয়মগ্নে বনুয়াম ত্বোতা বসূয়বো হবিষা বুধ্যমানাঃ ।
বয়ং সমর্যে বিদথেষ্বহ্নাং বয়ং রায়া সহসস্পুত্র মর্তান্ ॥৬॥

যো ন আগো অভ্যেনো ভরাত্যধীদঘমঘশংসে দধাত ।
জহী চিকিত্বো অভিশস্তিমেতামগ্নে যো নো মর্চয়তি দ্বয়েন ॥৭॥

ত্বামস্যা ব্যুষি দেব পূর্বে দূতং কৃণ্বানা অয়জন্ত হব্যৈঃ ।
সংস্থে যদগ্ন ঈয়সে রয়ীণাং দেবো মর্তৈর্বসুভিরিধ্যমানঃ ॥৮॥

অব স্পৃধি পিতরং যোধি বিদ্বান্ পুত্রো যস্তে সহসঃ সূন ঊহে ।
কদা চিকিত্বো অভি চক্ষসে নোঽগ্নে কদাঁ ঋতচিদ্ যাতয়াসে ॥৯॥

ভূরি নাম বন্দমানো দধাতি পিতা বসো যদি তজ্জোষয়াসে ।
কুবিদ্ দেবস্য সহসা চকানঃ সুম্নমগ্নির্বনতে বাবৃধানঃ ॥১০॥

ত্বমঙ্গ জরিতারং যবিষ্ঠ বিশ্বান্যগ্নে দুরিতাতি পর্ষি ।
স্তেনা অদৃশ্রন্ রিপবো জনাসোঽজ্ঞাতকেতা বৃজিনা অভূবন্ ॥১১॥

ইমে যামাসস্ত্বদ্রিগভূবন্ বসবে বা তদিদাগো অবাচি ।
নাহায়মগ্নিরভিশস্তয়ে নো ন রীষতে বাবৃধানঃ পরা দাৎ ॥১২॥