সূক্ত 4

4.1

১১ বসুশ্রুত আত্রেয়ঃ। অগ্নিঃ। ত্রিষ্টুপ্।

ত্বামগ্নে বসুপতিং বসূনামভি প্র মন্দে অধ্বরেষু রাজন্ ।
ত্বয়া বাজং বাজয়ন্তো জয়েমাঽভি ষ্যাম পৃত্সুতীর্মর্ত্যানাম্ ॥১॥

4.2

হব্যবালগ্নিরজরঃ পিতা নো বিভুর্বিভাবা সুদৃশীকো অস্মে ।
সুগার্হপত্যাঃ সমিষো দিদীহ্যস্মদ্র্য১ক্ সং মিমীহি শ্রবাংসি ॥২॥

4.3

বিশাং কবিং বিশ্পতিং মানুষীণাং শুচিং পাবকং ঘৃতপৃষ্ঠমগ্নিম্ ।
নি হোতারং বিশ্ববিদং দধিধ্বে স দেবেষু বনতে বার্যাণি ॥৩॥

4.4

জুষস্বাগ্ন ইলয়া সজোষা যতমানো রশ্মিভিঃ সূর্যস্য ।
জুষস্ব নঃ সমিধং জাতবেদ আ চ দেবান্ হবিরদ্যায় বক্ষি ॥৪॥

4.5

জুষ্টো দমূনা অতিথির্দুরোণ ইমং নো যজ্ঞমুপ যাহি বিদ্বান্ ।
বিশ্বা অগ্নে অভিয়ুজো বিহত্যা শত্রূয়তামা ভরা ভোজনানি ॥৫॥

4.6

বধেন দস্যুং প্র হি চাতয়স্ব বয়ঃ কৃণ্বানস্তন্বে৩ স্বায়ৈ ।
পিপর্ষি যৎ সহসস্পুত্র দেবান্ ত্সো অগ্নে পাহি নৃতম বাজে অস্মান্ ॥৬॥

4.7

বয়ং তে অগ্ন উক্থৈর্বিধেম বয়ং হব্যৈঃ পাবক ভদ্রশোচে ।
অস্মে রয়িং বিশ্ববারং সমিন্বাস্মে বিশ্বানি দ্রবিণানি ধেহি ॥৭॥

4.8

অস্মাকমগ্নে অধ্বরং জুষস্ব সহসঃ সূনো ত্রিষধস্থ হব্যম্ ।
বয়ং দেবেষু সুকৃতঃ স্যাম শর্মণা নস্ত্রিবরূথেন পাহি ॥৮॥

4.9

বিশ্বানি নো দুর্গহা জাতবেদঃ সিন্ধুং ন নাবা দুরিতাতি পর্ষি ।
অগ্নে অত্রিবন্নমসা গৃণানো৩ঽস্মাকং বোধ্যবিতা তনূনাম্ ॥৯॥

4.10

যস্ত্বা হৃদা কীরিণা মন্যমানোঽমর্ত্যং মর্ত্যো জোহবীমি ।
জাতবেদো যশো অস্মাসু ধেহি প্রজাভিরগ্নে অমৃতত্বমশ্যাম্ ॥১০॥

4.11

যস্মৈ ত্বং সুকৃতে জাতবেদ উ লোকমগ্নে কৃণবঃ স্যোনম্ ।
অশ্বিনং স পুত্রিণং বীরবন্তং গোমন্তং রয়িং নশতে স্বস্তি ॥১১॥