Sukta 4

4.1

11 vasushruta atreyah, agnih, trishtup

त्वाम॑ग्ने॒ वसु॑पतिं॒ वसू॑नाम॒भि प्र म॑न्दे अध्व॒रेषु॑ राजन् ।
त्वया॒ वाजं॑ वाज॒यन्तो॑ जयेमा॒ऽभि ष्या॑म पृत्सु॒तीर्मर्त्या॑नाम् ॥१॥

Tvamagne vasupatim vasunamabhi pra mande adhvareshu rajan
Tvaya vajam vajayanto jayemabhi shyama pritsutirmartyanam

ह॒व्य॒वाळ॒ग्निर॒जर॑ः पि॒ता नो॑ वि॒भुर्वि॒भावा॑ सु॒दृशी॑को अ॒स्मे ।
सु॒गा॒र्ह॒प॒त्याः समिषो॑ दिदीह्यस्म॒द्र्य१क् सं मि॑मीहि॒ श्रवां॑सि ॥२॥

Havyavalagnirajarah pita no vibhurvibhava sudrishiko asme
Sugarhapatyah samisho didihyasmadrya1k sam mimihi shravansi

वि॒शां क॒विं वि॒श्पतिं॒ मानु॑षीणां॒ शुचिं॑ पाव॒कं घृ॒तपृ॑ष्ठम॒ग्निम् ।
नि होता॑रं विश्व॒विदं॑ दधिध्वे॒ स दे॒वेषु॑ वनते॒ वार्या॑णि ॥३॥

Visham kavim vishpatim manushinam shuchim pavakam ghritaprishthamagnim
Ni hotaram vishvavidam dadhidhve sa deveshu vanate varyani

जु॒षस्वा॑ग्न॒ इळ॑या स॒जोषा॒ यत॑मानो र॒श्मिभि॒ः सूर्य॑स्य ।
जु॒षस्व॑ नः स॒मिधं॑ जातवेद॒ आ च॑ दे॒वान् ह॑वि॒रद्या॑य वक्षि ॥४॥

Jushasvagna ilaya sajosha yatamano rashmibhih suryasya
Jushasva nah samidham jataveda a cha devan haviradyaya vakshi

जुष्टो॒ दमू॑ना॒ अति॑थिर्दुरो॒ण इ॒मं नो॑ य॒ज्ञमुप॑ याहि वि॒द्वान् ।
विश्वा॑ अग्ने अभि॒युजो॑ वि॒हत्या॑ शत्रूय॒तामा भ॑रा॒ भोज॑नानि ॥५॥

Jushto damuna atithirdurona imam no yagyamupa yahi vidvan
Vishva agne abhiyujo vihatya shatruyatama bhara bhojanani

व॒धेन॒ दस्युं॒ प्र हि चा॒तय॑स्व॒ वय॑ः कृण्वा॒नस्त॒न्वे॒३ स्वायै॑ ।
पिप॑र्षि॒ यत् स॑हसस्पुत्र दे॒वान् त्सो अ॑ग्ने पाहि नृतम॒ वाजे॑ अ॒स्मान् ॥६॥

Vadhena dasyum pra hi chatayasva vayah krinvanastanve3 svayai
Piparshi yat sahasasputra devan tso agne pahi nritama vaje asman

व॒यं ते॑ अग्न उ॒क्थैर्वि॑धेम व॒यं ह॒व्यैः पा॑वक भद्रशोचे ।
अ॒स्मे र॒यिं वि॒श्ववा॑रं॒ समि॑न्वा॒स्मे विश्वा॑नि॒ द्रवि॑णानि धेहि ॥७॥

Vayam te agna ukthairvidhema vayam havyaih pavaka bhadrashoche
Asme rayim vishvavaram saminvasme vishvani dravinani dhehi

अ॒स्माक॑मग्ने अध्व॒रं जु॑षस्व॒ सह॑सः सूनो त्रिषधस्थ ह॒व्यम् ।
व॒यं दे॒वेषु॑ सु॒कृत॑ः स्याम॒ शर्म॑णा नस्त्रि॒वरू॑थेन पाहि ॥८॥

Asmakamagne adhvaram jushasva sahasah suno trishadhastha havyam
Vayam deveshu sukritah syama sharmana nastrivaruthena pahi

विश्वा॑नि नो दु॒र्गहा॑ जातवेद॒ः सिन्धुं॒ न ना॒वा दु॑रि॒ताति॑ पर्षि ।
अग्ने॑ अत्रि॒वन्नम॑सा गृणा॒नो॒३ऽस्माकं॑ बोध्यवि॒ता त॒नूना॑म् ॥९॥

Vishvani no durgaha jatavedah sindhum na nava duritati parshi
Agne atrivannamasa grinano3smakam bodhyavita tanunam

यस्त्वा॑ हृ॒दा की॒रिणा॒ मन्य॑मा॒नोऽम॑र्त्यं॒ मर्त्यो॒ जोह॑वीमि ।
जात॑वेदो॒ यशो॑ अ॒स्मासु॑ धेहि प्र॒जाभि॑रग्ने अमृत॒त्वम॑श्याम् ॥१०॥

Yastva hrida kirina manyamanomartyam martyo johavimi
Jatavedo yasho asmasu dhehi prajabhiragne amritatvamashyam

यस्मै॒ त्वं सु॒कृते॑ जातवेद उ लो॒कम॑ग्ने कृ॒णव॑ः स्यो॒नम् ।
अ॒श्विनं॒ स पु॒त्रिणं॑ वी॒रव॑न्तं॒ गोम॑न्तं र॒यिं न॑शते स्व॒स्ति ॥११॥

Yasmai tvam sukrite jataveda u lokamagne krinavah syonam
Ashvinam sa putrinam viravantam gomantam rayim nashate svasti