Sukta 2

2.1

12 kumara atreyah, vrisho va janah, ubhau va, 2, 9 vrisho janah, agnih, trishtup, 12 shakvari

कु॒मा॒रं मा॒ता यु॑व॒तिः समु॑ब्धं॒ गुहा॑ बिभर्ति॒ न द॑दाति पि॒त्रे ।
अनी॑कमस्य॒ न मि॒नज्जना॑सः पु॒रः प॑श्यन्ति॒ निहि॑तमर॒तौ ॥१॥

Kumaram mata yuvatih samubdham guha bibharti na dadati pitre
Anikamasya na minajjanasah purah pashyanti nihitamaratau

2.2

कमे॒तं त्वं यु॑वते कुमा॒रं पेषी॑ बिभर्षि॒ महि॑षी जजान ।
पू॒र्वीर्हि गर्भ॑ः श॒रदो॑ व॒वर्धाऽप॑श्यं जा॒तं यदसू॑त मा॒ता ॥२॥

Kametam tvam yuvate kumaram peshi bibharshi mahishi jajana
Purvirhi garbhah sharado vavardhapashyam jatam yadasuta mata

2.3

हिर॑ण्यदन्तं॒ शुचि॑वर्णमा॒रात् क्षेत्रा॑दपश्य॒मायु॑धा॒ मिमा॑नम् ।
द॒दा॒नो अ॑स्मा अ॒मृतं॑ वि॒पृक्व॒त् किं माम॑नि॒न्द्राः कृ॑णवन्ननु॒क्थाः ॥३॥

Hiranyadantam shuchivarnamarat kshetradapashyamayudha mimanam
Dadano asma amritam viprikvat kim mamanindrah krinavannanukthah

2.4

क्षेत्रा॑दपश्यं सनु॒तश्चर॑न्तं सु॒मद् यू॒थं न पु॒रु शोभ॑मानम् ।
न ता अ॑गृभ्र॒न्नज॑निष्ट॒ हि षः पलि॑क्नी॒रिद् यु॑व॒तयो॑ भवन्ति ॥४॥

Kshetradapashyam sanutashcharantam sumad yutham na puru shobhamanam
Na ta agribhrannajanishta hi shah paliknirid yuvatayo bhavanti

2.5

के मे॑ मर्य॒कं वि य॑वन्त॒ गोभि॒र्न येषां॑ गो॒पा अर॑णश्चि॒दास॑ ।
य ईं॑ जगृ॒भुरव॒ ते सृ॑ज॒न्त्वाजा॑ति प॒श्व उप॑ नश्चिकि॒त्वान् ॥५॥

Ke me maryakam vi yavanta gobhirna yesham gopa aranashchidasa
Ya im jagribhurava te srijantvajati pashva upa nashchikitvan

2.6

व॒सां राजा॑नं वस॒तिं जना॑ना॒मरा॑तयो॒ नि द॑धु॒र्मर्त्ये॑षु ।
ब्रह्मा॒ण्यत्रे॒रव॒ तं सृ॑जन्तु निन्दि॒तारो॒ निन्द्या॑सो भवन्तु ॥६॥

Vasam rajanam vasatim jananamaratayo ni dadhurmartyeshu
Brahmanyatrerava tam srijantu ninditaro nindyaso bhavantu

2.7

शुन॑श्चि॒च्छेपं॒ निदि॑तं स॒हस्रा॒द् यूपा॑दमुञ्चो॒ अश॑मिष्ट॒ हि षः ।
ए॒वास्मद॑ग्ने॒ वि मु॑मुग्धि॒ पाशा॒न् होत॑श्चिकित्व इ॒ह तू नि॒षद्य॑ ॥७॥

Shunashchichchhepam niditam sahasrad yupadamuncho ashamishta hi shah
Evasmadagne vi mumugdhi pashan hotashchikitva iha tu nishadya

2.8

हृ॒णी॒यमा॑नो॒ अप॒ हि मदैये॒ः प्र मे॑ दे॒वानां॑ व्रत॒पा उ॑वाच ।
इन्द्रो॑ वि॒द्वाँ अनु॒ हि त्वा॑ च॒चक्ष॒ तेना॒हम॑ग्ने॒ अनु॑शिष्ट॒ आगा॑म् ॥८॥

Hriniyamano apa hi madaiyeh pra me devanam vratapa uvacha
Indro vidvam anu hi tva chachaksha tenahamagne anushishta agam

2.9

वि ज्योति॑षा बृह॒ता भा॑त्य॒ग्निरा॒विर्विश्वा॑नि कृणुते महि॒त्वा ।
प्रादे॑वीर्मा॒याः स॑हते दु॒रेवा॒ः शिशी॑ते॒ शृङ्गे॒ रक्ष॑से वि॒निक्षे॑ ॥९॥

Vi jyotisha brihata bhatyagniravirvishvani krinute mahitva
Pradevirmayah sahate durevah shishite shringe rakshase vinikshe

2.10

उ॒त स्वा॒नासो॑ दि॒वि ष॑न्त्व॒ग्नेस्ति॒ग्मायु॑धा॒ रक्ष॑से॒ हन्त॒वा उ॑ ।
मदे॑ चिदस्य॒ प्र रु॑जन्ति॒ भामा॒ न व॑रन्ते परि॒बाधो॒ अदे॑वीः ॥१०॥

Uta svanaso divi shantvagnestigmayudha rakshase hantava u
Made chidasya pra rujanti bhama na varante paribadho adevih

2.11

ए॒तं ते॒ स्तोमं॑ तुविजात॒ विप्रो॒ रथं॒ न धीर॒ः स्वपा॑ अतक्षम् ।
यदीद॑ग्ने॒ प्रति॒ त्वं दे॑व॒ हर्या॒ः स्व॑र्वतीर॒प ए॑ना जयेम ॥११॥

Etam te stomam tuvijata vipro ratham na dhirah svapa ataksham
Yadidagne prati tvam deva haryah svarvatirapa ena jayema

2.12

तु॒वि॒ग्रीवो॑ वृष॒भो वा॑वृधा॒नो॑ऽश॒त्र्व१र्यः सम॑जाति॒ वेद॑ः ।
इती॒मम॒ग्निम॒मृता॑ अवोचन् ब॒र्हिष्म॑ते॒ मन॑वे॒ शर्म॑ यंसद्ध॒विष्म॑ते॒ मन॑वे॒ शर्म॑ यंसत् ॥१२॥

Tuvigrivo vrishabho vavridhanoshatrva1ryah samajati vedah
Itimamagnimamrita avochan barhishmate manave sharma yansaddhavishmate manave sharma yansat