UtshovSukta 1
1.1
१२ बुधगविष्ठिरावात्रेयौ। अग्निः। त्रिष्टुप्।अबो॑ध्य॒ग्निः स॒मिधा॒ जना॑नां॒ प्रति॑ धे॒नुमि॑वाय॒तीमु॒षास॑म् । य॒ह्वा इ॑व॒ प्र व॒यामु॒ज्जिहा॑ना॒ः प्र भा॒नव॑ः सिस्रते॒ नाक॒मच्छ॑ ॥१॥
12 budhagavishthiravatreyau, agnih, trishtup, abodhyagnih samidha jananam prati dhenumivayatimushasam, yahva iva pra vayamujjihanah pra bhanavah sisrate nakamachchha
1.2
अबो॑धि॒ होता॑ य॒जथा॑य दे॒वानू॒र्ध्वो अ॒ग्निः सु॒मना॑ः प्रा॒तर॑स्थात् । समि॑द्धस्य॒ रुश॑ददर्शि॒ पाजो॑ म॒हान् दे॒वस्तम॑सो॒ निर॑मोचि ॥२॥
Abodhi hota yajathaya devanurdhvo agnih sumanah pratarasthat, samiddhasya rushadadarshi pajo mahan devastamaso niramochi
1.3
यदीं॑ ग॒णस्य॑ रश॒नामजी॑ग॒ः शुचि॑रङ्क्ते॒ शुचि॑भि॒र्गोभि॑र॒ग्निः । आद् दक्षि॑णा युज्यते वाज॒यन्त्यु॑त्ता॒नामू॒र्ध्वो अ॑धयज्जु॒हूभि॑ः ॥३॥
Yadim ganasya rashanamajigah shuchirankte shuchibhirgobhiragnih, ad dakshina yujyate vajayantyuttanamurdhvo adhayajjuhubhih
1.4
अ॒ग्निमच्छा॑ देवय॒तां मनां॑सि॒ चक्षूं॑षीव॒ सूर्ये॒ सं च॑रन्ति । यदीं॒ सुवा॑ते उ॒षसा॒ विरू॑पे श्वे॒तो वा॒जी जा॑यते॒ अग्रे॒ अह्ना॑म् ॥४॥
Agnimachchha devayatam manansi chakshunshiva surye sam charanti, yadim suvate ushasa virupe shveto vaji jayate agre ahnam
1.5
जनि॑ष्ट॒ हि जेन्यो॒ अग्रे॒ अह्नां॑ हि॒तो हि॒तेष्व॑रु॒षो वने॑षु । दमे॑दमे स॒प्त रत्ना॒ दधा॑नो॒ऽग्निर्होता॒ नि ष॑सादा॒ यजी॑यान् ॥५॥
Janishta hi jenyo agre ahnam hito hiteshvarusho vaneshu, damedame sapta ratna dadhanognirhota ni shasada yajiyan
1.6
अ॒ग्निर्होता॒ न्य॑सीद॒द् यजी॑यानु॒पस्थे॑ मा॒तुः सु॑र॒भा उ॑ लो॒के । युवा॑ क॒विः पु॑रुनि॒ष्ठ ऋ॒तावा॑ ध॒र्ता कृ॑ष्टी॒नामु॒त मध्य॑ इ॒द्धः ॥६॥
Agnirhota nyasidad yajiyanupasthe matuh surabha u loke, yuva kavih purunishtha ritava dharta krishtinamuta madhya iddhah
1.7
प्र णु त्यं विप्र॑मध्व॒रेषु॑ सा॒धुम॒ग्निं होता॑रमीळते॒ नमो॑भिः । आ यस्त॒तान॒ रोद॑सी ऋ॒तेन॒ नित्यं॑ मृजन्ति वा॒जिनं॑ घृ॒तेन॑ ॥७॥
Pra nu tyam vipramadhvareshu sadhumagnim hotaramilate namobhih, a yastatana rodasi ritena nityam mrijanti vajinam ghritena
1.8
मा॒र्जा॒ल्यो॑ मृज्यते॒ स्वे दमू॑नाः कविप्रश॒स्तो अति॑थिः शि॒वो न॑ः । स॒हस्र॑शृङ्गो वृष॒भस्तदो॑जा॒ विश्वाँ॑ अग्ने॒ सह॑सा॒ प्रास्य॒न्यान् ॥८॥
Marjalyo mrijyate sve damunah kaviprashasto atithih shivo nah, sahasrashringo vrishabhastadoja vishvam agne sahasa prasyanyan
1.9
प्र स॒द्यो अ॑ग्ने॒ अत्ये॑ष्य॒न्याना॒विर्यस्मै॒ चारु॑तमो ब॒भूथ॑ । ई॒ळेन्यो॑ वपु॒ष्यो॑ वि॒भावा॑ प्रि॒यो वि॒शामति॑थि॒र्मानु॑षीणाम् ॥९॥
Pra sadyo agne atyeshyanyanaviryasmai charutamo babhutha, ilenyo vapushyo vibhava priyo vishamatithirmanushinam
1.10
तुभ्यं॑ भरन्ति क्षि॒तयो॑ यविष्ठ ब॒लिम॑ग्ने॒ अन्ति॑त॒ ओत दू॒रात् । आ भन्दि॑ष्ठस्य सुम॒तिं चि॑किद्धि बृ॒हत् ते॑ अग्ने॒ महि॒ शर्म॑ भ॒द्रम् ॥१०॥
Tubhyam bharanti kshitayo yavishtha balimagne antita ota durat, a bhandishthasya sumatim chikiddhi brihat te agne mahi sharma bhadram
1.11
आद्य रथं॑ भानुमो भानु॒मन्त॒मग्ने॒ तिष्ठ॑ यज॒तेभि॒ः सम॑न्तम् । वि॒द्वान् प॑थी॒नामु॒र्व१न्तरि॑क्ष॒मेह दे॒वान् ह॑वि॒रद्या॑य वक्षि ॥११॥
Adya ratham bhanumo bhanumantamagne tishtha yajatebhih samantam, vidvan pathinamurva1ntarikshameha devan haviradyaya vakshi
1.12
अवो॑चाम क॒वये॒ मेध्या॑य॒ वचो॑ व॒न्दारु॑ वृष॒भाय॒ वृष्णे॑ । गवि॑ष्ठिरो॒ नम॑सा॒ स्तोम॑म॒ग्नौ दि॒वी॑व रु॒क्ममु॑रु॒व्यञ्च॑मश्रेत् ॥१२॥
Avochama kavaye medhyaya vacho vandaru vrishabhaya vrishne, gavishthiro namasa stomamagnau diviva rukmamuruvyanchamashret