Sukta 16

16.1

5 pururatreyah, agnih, anushtup, 5 panktih

बृ॒हद् वयो॒ हि भा॒नवेऽर्चा॑ दे॒वाया॒ग्नये॑ ।
यं मि॒त्रं न प्रश॑स्तिभि॒र्मर्ता॑सो दधि॒रे पु॒रः ॥१॥

Brihad vayo hi bhanavercha devayagnaye
Yam mitram na prashastibhirmartaso dadhire purah

16.2

स हि द्युभि॒र्जना॑नां॒ होता॒ दक्ष॑स्य बा॒ह्वोः ।
वि ह॒व्यम॒ग्निरा॑नु॒षग्भगो॒ न वार॑मृण्वति ॥२॥

Sa hi dyubhirjananam hota dakshasya bahvoh
Vi havyamagniranushagbhago na varamrinvati

16.3

अ॒स्य स्तोमे॑ म॒घोन॑ः स॒ख्ये वृ॒द्धशो॑चिषः ।
विश्वा॒ यस्मि॑न् तुवि॒ष्वणि॒ सम॒र्ये शुष्म॑माद॒धुः ॥३॥

Asya stome maghonah sakhye vriddhashochishah
Vishva yasmin tuvishvani samarye shushmamadadhuh

16.4

अधा॒ ह्य॑ग्न एषां सु॒वीर्य॑स्य मं॒हना॑ ।
तमिद् य॒ह्वं न रोद॑सी॒ परि॒ श्रवो॑ बभूवतुः ॥४॥

Adha hyagna esham suviryasya manhana
Tamid yahvam na rodasi pari shravo babhuvatuh

16.5

नू न॒ एहि॒ वार्य॒मग्ने॑ गृणा॒न आ भ॑र ।
ये व॒यं ये च॑ सू॒रय॑ः स्व॒स्ति धाम॑हे॒ सचो॒तैधि॑ पृ॒त्सु नो॑ वृ॒धे ॥५॥

Nu na ehi varyamagne grinana a bhara
Ye vayam ye cha surayah svasti dhamahe sachotaidhi pritsu no vridhe