Sukta 11

11.1

6 sutambhara atreyah, agnih, jagati

जन॑स्य गो॒पा अ॑जनिष्ट॒ जागृ॑विर॒ग्निः सु॒दक्ष॑ः सुवि॒ताय॒ नव्य॑से ।
घृ॒तप्र॑तीको बृह॒ता दि॑वि॒स्पृशा॑ द्यु॒मद् वि भा॑ति भर॒तेभ्य॒ः शुचि॑ः ॥१॥

Janasya gopa ajanishta jagriviragnih sudakshah suvitaya navyase
Ghritapratiko brihata divisprisha dyumad vi bhati bharatebhyah shuchih

11.2

य॒ज्ञस्य॑ के॒तुं प्र॑थ॒मं पु॒रोहि॑तम॒ग्निं नर॑स्त्रिषध॒स्थे समी॑धिरे ।
इन्द्रे॑ण दे॒वैः स॒रथं॒ स ब॒र्हिषि॒ सीद॒न्नि होता॑ य॒जथा॑य सु॒क्रतु॑ः ॥२॥

Yagyasya ketum prathamam purohitamagnim narastrishadhasthe samidhire
Indrena devaih saratham sa barhishi sidanni hota yajathaya sukratuh

11.3

अस॑म्मृष्टो जायसे मा॒त्रोः शुचि॑र्म॒न्द्रः क॒विरुद॑तिष्ठो वि॒वस्व॑तः ।
घृ॒तेन॑ त्वावर्धयन्नग्न आहुत धू॒मस्ते॑ के॒तुर॑भवद् दि॒वि श्रि॒तः ॥३॥

Asammrishto jayase matroh shuchirmandrah kavirudatishtho vivasvatah
Ghritena tvavardhayannagna ahuta dhumaste keturabhavad divi shritah

11.4

अ॒ग्निर्नो॑ य॒ज्ञमुप॑ वेतु साधु॒या ऽग्निं नरो॒ वि भ॑रन्ते गृ॒हेगृ॑हे ।
अ॒ग्निर्दू॒तो अ॑भवद्धव्य॒वाह॑नो॒ऽग्निं वृ॑णा॒ना वृ॑णते क॒विक्र॑तुम् ॥४॥

Agnirno yagyamupa vetu sadhuya gnim naro vi bharante grihegrihe
Agnirduto abhavaddhavyavahanognim vrinana vrinate kavikratum

11.5

तुभ्ये॒दम॑ग्ने॒ मधु॑मत्तमं॒ वच॒स्तुभ्यं॑ मनी॒षा इ॒यम॑स्तु॒ शं हृ॒दे ।
त्वां गिर॒ः सिन्धु॑मिवा॒वनी॑र्म॒हीरा पृ॑णन्ति॒ शव॑सा व॒र्धय॑न्ति च ॥५॥

Tubhyedamagne madhumattamam vachastubhyam manisha iyamastu sham hride
Tvam girah sindhumivavanirmahira prinanti shavasa vardhayanti cha

11.6

त्वाम॑ग्ने॒ अङ्गि॑रसो॒ गुहा॑ हि॒तमन्व॑विन्दञ्छिश्रिया॒णं वने॑वने ।
स जा॑यसे म॒थ्यमा॑न॒ः सहो॑ म॒हत् त्वामा॑हु॒ः सह॑सस्पु॒त्रम॑ङ्गिरः ॥६॥

Tvamagne angiraso guha hitamanvavindanchhishriyanam vanevane
Sa jayase mathyamanah saho mahat tvamahuh sahasasputramangirah