Sukta 10

10.1

7 gaya atreyah, agnih, anushtup, 4-7 panktih

अग्न॒ ओजि॑ष्ठ॒मा भ॑र द्यु॒म्नम॒स्मभ्य॑मध्रिगो ।
प्र नो॑ रा॒या परी॑णसा॒ रत्सि॒ वाजा॑य॒ पन्था॑म् ॥१॥

Agna ojishthama bhara dyumnamasmabhyamadhrigo
Pra no raya parinasa ratsi vajaya pantham

10.2

त्वं नो॑ अग्ने अद्भुत॒ क्रत्वा॒ दक्ष॑स्य मं॒हना॑ ।
त्वे अ॑सु॒र्य१मारु॑हत् क्रा॒णा मि॒त्रो न य॒ज्ञिय॑ः ॥२॥

Tvam no agne adbhuta kratva dakshasya manhana
Tve asurya1maruhat krana mitro na yagyiyah

10.3

त्वं नो॑ अग्न एषां॒ गयं॑ पु॒ष्टिं च॑ वर्धय ।
ये स्तोमे॑भि॒ः प्र सू॒रयो॒ नरो॑ म॒घान्या॑न॒शुः ॥३॥

Tvam no agna esham gayam pushtim cha vardhaya
Ye stomebhih pra surayo naro maghanyanashuh

10.4

ये अ॑ग्ने चन्द्र ते॒ गिर॑ः शु॒म्भन्त्यश्व॑राधसः ।
शुष्मे॑भिः शु॒ष्मिणो॒ नरो॑ दि॒वश्चि॒द् येषां॑ बृ॒हत् सु॑की॒र्तिर्बोध॑ति॒ त्मना॑ ॥४॥

Ye agne chandra te girah shumbhantyashvaradhasah
Shushmebhih shushmino naro divashchid yesham brihat sukirtirbodhati tmana

10.5

तव॒ त्ये अ॑ग्ने अ॒र्चयो॒ भ्राज॑न्तो यन्ति धृष्णु॒या ।
परि॑ज्मानो॒ न वि॒द्युत॑ः स्वा॒नो रथो॒ न वा॑ज॒युः ॥५॥

Tava tye agne archayo bhrajanto yanti dhrishnuya
Parijmano na vidyutah svano ratho na vajayuh

10.6

नू नो॑ अग्न ऊ॒तये॑ स॒बाध॑सश्च रा॒तये॑ ।
अ॒स्माका॑सश्च सू॒रयो॒ विश्वा॒ आशा॑स्तरी॒षणि॑ ॥६॥

Nu no agna utaye sabadhasashcha rataye
Asmakasashcha surayo vishva ashastarishani

10.7

त्वं नो॑ अग्ने अङ्गिरः स्तु॒तः स्तवा॑न॒ आ भ॑र ।
होत॑र्विभ्वा॒सहं॑ र॒यिंः स्तो॒तृभ्य॒ः स्तव॑से च न उ॒तैधि॑ पृ॒त्सु नो॑ वृ॒धे ॥७॥

Tvam no agne angirah stutah stavana a bhara
Hotarvibhvasaham rayinh stotribhyah stavase cha na utaidhi pritsu no vridhe