Sukta 7

7.1

15 vamadevo gautamah, agnih, trishtup, 1 jagati, 2-6 anushtup

अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्य॑ः ।
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॑ वि॒शेवि॑शे ॥१॥

Ayamiha prathamo dhayi dhatribhirhota yajishtho adhvareshvidyah
Yamapnavano bhrigavo viruruchurvaneshu chitram vibhvam vishevishe

7.2

अग्ने॑ क॒दा त॑ आनु॒षग् भुव॑द् दे॒वस्य॒ चेत॑नम् ।
अधा॒ हि त्वा॑ जगृभ्रि॒रे मर्ता॑सो वि॒क्ष्वीड्य॑म् ॥२॥

Agne kada ta anushag bhuvad devasya chetanam
Adha hi tva jagribhrire martaso vikshvidyam

7.3

ऋ॒तावा॑नं॒ विचे॑तसं॒ पश्य॑न्तो॒ द्यामि॑व॒ स्तृभि॑ः ।
विश्वे॑षामध्व॒राणां॑ हस्क॒र्तारं॒ दमे॑दमे ॥३॥

Ritavanam vichetasam pashyanto dyamiva stribhih
Vishveshamadhvaranam haskartaram damedame

7.4

आ॒शुं दू॒तं वि॒वस्व॑तो॒ विश्वा॒ यश्च॑र्ष॒णीर॒भि ।
आ ज॑भ्रुः के॒तुमा॒यवो॒ भृग॑वाणं वि॒शेवि॑शे ॥४॥

Ashum dutam vivasvato vishva yashcharshanirabhi
A jabhruh ketumayavo bhrigavanam vishevishe

7.5

तमीं॒ होता॑रमानु॒षक् चि॑कि॒त्वांसं॒ नि षे॑दिरे ।
र॒ण्वं पा॑व॒कशो॑चिषं॒ यजि॑ष्ठं स॒प्त धाम॑भिः ॥५॥

Tamim hotaramanushak chikitvansam ni shedire
Ranvam pavakashochisham yajishtham sapta dhamabhih

7.6

तं शश्व॑तीषु मा॒तृषु॒ वन॒ आ वी॒तमश्रि॑तम् ।
चि॒त्रं सन्तं॒ गुहा॑ हि॒तं सु॒वेदं॑ कूचिद॒र्थिन॑म् ॥६॥

Tam shashvatishu matrishu vana a vitamashritam
Chitram santam guha hitam suvedam kuchidarthinam

7.7

स॒सस्य॒ यद् वियु॑ता॒ सस्मि॒न्नूध॑न्नृ॒तस्य॒ धाम॑न् र॒णय॑न्त दे॒वाः ।
म॒हाँ अ॒ग्निर्नम॑सा रा॒तह॑व्यो॒ वेर॑ध्व॒राय॒ सद॒मिदृ॒तावा॑ ॥७॥

Sasasya yad viyuta sasminnudhannritasya dhaman ranayanta devah
Maham agnirnamasa ratahavyo veradhvaraya sadamidritava

7.8

वेर॑ध्व॒रस्य॑ दू॒त्या॑नि वि॒द्वानु॒भे अ॒न्ता रोद॑सी संचिकि॒त्वान् ।
दू॒त ई॑यसे प्र॒दिव॑ उरा॒णो वि॒दुष्ट॑रो दि॒व आ॒रोध॑नानि ॥८॥

Veradhvarasya dutyani vidvanubhe anta rodasi sanchikitvan
Duta iyase pradiva urano vidushtaro diva arodhanani

7.9

कृ॒ष्णं त॒ एम॒ रुश॑तः पु॒रो भाश्च॑रि॒ष्ण्व१र्चिर्वपु॑षा॒मिदेक॑म् ।
यदप्र॑वीता॒ दध॑ते ह॒ गर्भं॑ स॒द्यश्चि॑ज्जा॒तो भव॒सीदु॑ दू॒तः ॥९॥

Krishnam ta ema rushatah puro bhashcharishnva1rchirvapushamidekam
Yadapravita dadhate ha garbham sadyashchijjato bhavasidu dutah

7.10

स॒द्यो जा॒तस्य॒ ददृ॑शान॒मोजो॒ यद॑स्य॒ वातो॑ अनु॒वाति॑ शो॒चिः ।
वृ॒णक्ति॑ ति॒ग्माम॑त॒सेषु॑ जि॒ह्वां स्थि॒रा चि॒दन्ना॑ दयते॒ वि जम्भै॑ः ॥१०॥

Sadyo jatasya dadrishanamojo yadasya vato anuvati shochih
Vrinakti tigmamataseshu jihvam sthira chidanna dayate vi jambhaih

7.11

तृ॒षु यदन्ना॑ तृ॒षुणा॑ व॒वक्ष॑ तृ॒षुं दू॒तं कृ॑णुते य॒ह्वो अ॒ग्निः ।
वात॑स्य मे॒ळिं स॑चते नि॒जूर्व॑न्ना॒शुं न वा॑जयते हि॒न्वे अर्वा॑ ॥११॥

Trishu yadanna trishuna vavaksha trishum dutam krinute yahvo agnih
Vatasya melim sachate nijurvannashum na vajayate hinve arva