Sukta 6

6.1

11 vamadevo gautamah, agnih, trishtup

ऊ॒र्ध्व ऊ॒ षु णो॑ अध्वरस्य होत॒रग्ने॒ तिष्ठ॑ दे॒वता॑ता॒ यजी॑यान् ।
त्वं हि विश्व॑म॒भ्यसि॒ मन्म॒ प्र वे॒धस॑श्चित् तिरसि मनी॒षाम् ॥१॥

Urdhva u shu no adhvarasya hotaragne tishtha devatata yajiyan
Tvam hi vishvamabhyasi manma pra vedhasashchit tirasi manisham

अमू॑रो॒ होता॒ न्य॑सादि वि॒क्ष्व१ग्निर्म॒न्द्रो वि॒दथे॑षु॒ प्रचे॑ताः ।
ऊ॒र्ध्वं भा॒नुं स॑वि॒तेवा॑श्रे॒न्मेते॑व धू॒मं स्त॑भाय॒दुप॒ द्याम् ॥२॥

Amuro hota nyasadi vikshva1gnirmandro vidatheshu prachetah
Urdhvam bhanum savitevashrenmeteva dhumam stabhayadupa dyam

य॒ता सु॑जू॒र्णी रा॒तिनी॑ घृ॒ताची॑ प्रदक्षि॒णिद् दे॒वता॑तिमुरा॒णः ।
उदु॒ स्वरु॑र्नव॒जा नाक्रः प॒श्वो अ॑नक्ति॒ सुधि॑तः सु॒मेक॑ः ॥३॥

Yata sujurni ratini ghritachi pradakshinid devatatimuranah
Udu svarurnavaja nakrah pashvo anakti sudhitah sumekah

स्ती॒र्णे ब॒र्हिषि॑ समिधा॒ने अ॒ग्ना ऊ॒र्ध्वो अ॑ध्व॒र्युर्जु॑जुषा॒णो अ॑स्थात् ।
पर्य॒ग्निः प॑शु॒पा न होता॑ त्रिवि॒ष्ट्ये॑ति प्र॒दिव॑ उरा॒णः ॥४॥

Stirne barhishi samidhane agna urdhvo adhvaryurjujushano asthat
Paryagnih pashupa na hota trivishtyeti pradiva uranah

परि॒ त्मना॑ मि॒तद्रु॑रेति॒ होता॒ ऽग्निर्म॒न्द्रो मधु॑वचा ऋ॒तावा॑ ।
द्रव॑न्त्यस्य वा॒जिनो॒ न शोका॒ भय॑न्ते॒ विश्वा॒ भुव॑ना॒ यदभ्रा॑ट् ॥५॥

Pari tmana mitadrureti hota gnirmandro madhuvacha ritava
Dravantyasya vajino na shoka bhayante vishva bhuvana yadabhrat

भ॒द्रा ते॑ अग्ने स्वनीक सं॒दृग्घो॒रस्य॑ स॒तो विषु॑णस्य॒ चारु॑ः ।
न यत्ते॑ शो॒चिस्तम॑सा॒ वर॑न्त॒ न ध्व॒स्मान॑स्त॒न्वी॒३ रेप॒ आ धु॑ः ॥६॥

Bhadra te agne svanika sandrigghorasya sato vishunasya charuh
Na yatte shochistamasa varanta na dhvasmanastanvi3 repa a dhuh

न यस्य॒ सातु॒र्जनि॑तो॒रवा॑रि॒ न मा॒तरा॑पि॒तरा॒ नू चि॑दि॒ष्टौ ।
अधा॑ मि॒त्रो न सुधि॑तः पाव॒को॒३ऽग्निर्दी॑दाय॒ मानु॑षीषु वि॒क्षु ॥७॥

Na yasya saturjanitoravari na matarapitara nu chidishtau
Adha mitro na sudhitah pavako3gnirdidaya manushishu vikshu

द्विर्यं पञ्च॒ जीज॑नन् त्सं॒वसा॑ना॒ः स्वसा॑रो अ॒ग्निं मानु॑षीषु वि॒क्षु ।
उ॒ष॒र्बुध॑मथ॒र्यो॒३ न दन्तं॑ शु॒क्रं स्वासं॑ पर॒शुं न ति॒ग्मम् ॥८॥

Dviryam pancha jijanan tsanvasanah svasaro agnim manushishu vikshu
Usharbudhamatharyo3 na dantam shukram svasam parashum na tigmam

तव॒ त्ये अ॑ग्ने ह॒रितो॑ घृत॒स्ना रोहि॑तास ऋ॒ज्वञ्च॒ः स्वञ्च॑ः ।
अ॒रु॒षासो॒ वृष॑ण ऋजुमु॒ष्का आ दे॒वता॑तिमह्वन्त द॒स्माः ॥९॥

Tava tye agne harito ghritasna rohitasa rijvanchah svanchah
Arushaso vrishana rijumushka a devatatimahvanta dasmah

ये ह॒ त्ये ते॒ सह॑माना अ॒यास॑स्त्वे॒षासो॑ अग्ने अ॒र्चय॒श्चर॑न्ति ।
श्ये॒नासो॒ न दु॑वस॒नासो॒ अर्थं॑ तुविष्व॒णसो॒ मारु॑तं॒ न शर्ध॑ः ॥१०॥

Ye ha tye te sahamana ayasastveshaso agne archayashcharanti
Shyenaso na duvasanaso artham tuvishvanaso marutam na shardhah

अका॑रि॒ ब्रह्म॑ समिधान॒ तुभ्यं॒ शंसा॑त्यु॒क्थं यज॑ते॒ व्यू॑ धाः ।
होता॑रम॒ग्निं मनु॑षो॒ नि षे॑दुर्नम॒स्यन्त॑ उ॒शिज॒ः शंस॑मा॒योः ॥११॥

Akari brahma samidhana tubhyam shansatyuktham yajate vyu dhah
Hotaramagnim manusho ni shedurnamasyanta ushijah shansamayoh