Sukta 42

42.1

10 trasadasyuh paurukutsyah, trasadasyuh, 7-10 indravarunau, trishtup

मम॑ द्वि॒ता रा॒ष्ट्रं क्ष॒त्रिय॑स्य वि॒श्वायो॒र्विश्वे॑ अ॒मृता॒ यथा॑ नः ।
क्रतुं॑ सचन्ते॒ वरु॑णस्य दे॒वा राजा॑मि कृ॒ष्टेरु॑प॒मस्य॑ व॒व्रेः ॥१॥

Mama dvita rashtram kshatriyasya vishvayorvishve amrita yatha nah
Kratum sachante varunasya deva rajami krishterupamasya vavreh

42.2

अ॒हं राजा॒ वरु॑णो॒ मह्यं॒ तान्य॑सु॒र्या॑णि प्रथ॒मा धा॑रयन्त ।
क्रतुं॑ सचन्ते॒ वरु॑णस्य दे॒वा राजा॑मि कृ॒ष्टेरु॑प॒मस्य॑ व॒व्रेः ॥२॥

Aham raja varuno mahyam tanyasuryani prathama dharayanta
Kratum sachante varunasya deva rajami krishterupamasya vavreh

42.3

अ॒हमिन्द्रो॒ वरु॑ण॒स्ते म॑हि॒त्वोर्वी ग॑भी॒रे रज॑सी सु॒मेके॑ ।
त्वष्टे॑व॒ विश्वा॒ भुव॑नानि वि॒द्वान् त्समै॑रयं॒ रोद॑सी धा॒रयं॑ च ॥३॥

Ahamindro varunaste mahitvorvi gabhire rajasi sumeke
Tvashteva vishva bhuvanani vidvan tsamairayam rodasi dharayam cha

42.4

अ॒हम॒पो अ॑पिन्वमु॒क्षमा॑णा धा॒रयं॒ दिवं॒ सद॑न ऋ॒तस्य॑ ।
ऋ॒तेन॑ पु॒त्रो अदि॑तेर्ऋ॒तावो॒त त्रि॒धातु॑ प्रथय॒द्वि भूम॑ ॥४॥

Ahamapo apinvamukshamana dharayam divam sadana ritasya
Ritena putro aditerritavota tridhatu prathayadvi bhuma

42.5

मां नर॒ः स्वश्वा॑ वा॒जय॑न्तो॒ मां वृ॒ताः स॒मर॑णे हवन्ते ।
कृ॒णोम्या॒जिं म॒घवा॒हमिन्द्र॒ इय॑र्मि रे॒णुम॒भिभू॑त्योजाः ॥५॥

Mam narah svashva vajayanto mam vritah samarane havante
Krinomyajim maghavahamindra iyarmi renumabhibhutyojah

42.6

अ॒हं ता विश्वा॑ चकरं॒ नकि॑र्मा॒ दैव्यं॒ सहो॑ वरते॒ अप्र॑तीतम् ।
यन्मा॒ सोमा॑सो म॒मद॒न्यदु॒क्थोभे भ॑येते॒ रज॑सी अपा॒रे ॥६॥

Aham ta vishva chakaram nakirma daivyam saho varate apratitam
Yanma somaso mamadanyadukthobhe bhayete rajasi apare

42.7

वि॒दुष्टे॒ विश्वा॒ भुव॑नानि॒ तस्य॒ ता प्र ब्र॑वीषि॒ वरु॑णाय वेधः ।
त्वं वृ॒त्राणि॑ शृण्विषे जघ॒न्वान् त्वं वृ॒ताँ अ॑रिणा इन्द्र॒ सिन्धू॑न् ॥७॥

Vidushte vishva bhuvanani tasya ta pra bravishi varunaya vedhah
Tvam vritrani shrinvishe jaghanvan tvam vritam arina indra sindhun

42.8

अ॒स्माक॒मत्र॑ पि॒तर॒स्त आ॑सन् त्स॒प्त ऋष॑यो दौर्ग॒हे ब॒ध्यमा॑ने ।
त आय॑जन्त त्र॒सद॑स्युमस्या॒ इन्द्रं॒ न वृ॑त्र॒तुर॑मर्धदे॒वम् ॥८॥

Asmakamatra pitarasta asan tsapta rishayo daurgahe badhyamane
Ta ayajanta trasadasyumasya indram na vritraturamardhadevam

42.9

पु॒रु॒कुत्सा॑नी॒ हि वा॒मदा॑शद्ध॒व्येभि॑रिन्द्रावरुणा॒ नमो॑भिः ।
अथा॒ राजा॑नं त्र॒सद॑स्युमस्या वृत्र॒हणं॑ ददथुरर्धदे॒वम् ॥९॥

Purukutsani hi vamadashaddhavyebhirindravaruna namobhih
Atha rajanam trasadasyumasya vritrahanam dadathurardhadevam

42.10

रा॒या व॒यं स॑स॒वांसो॑ मदेम ह॒व्येन॑ दे॒वा यव॑सेन॒ गाव॑ः ।
तां धे॒नुमि॑न्द्रावरुणा यु॒वं नो॑ वि॒श्वाहा॑ धत्त॒मन॑पस्फुरन्तीम् ॥१०॥

Raya vayam sasavanso madema havyena deva yavasena gavah
Tam dhenumindravaruna yuvam no vishvaha dhattamanapasphurantim