Sukta 41

41.1

11 vamadevo gautamah, indravarunau, trishtup

इन्द्रा॒ को वां॑ वरुणा सु॒म्नमा॑प॒ स्तोमो॑ ह॒विष्माँ॑ अ॒मृतो॒ न होता॑ ।
यो वां॑ हृ॒दि क्रतु॑माँ अ॒स्मदु॒क्तः प॒स्पर्श॑दिन्द्रावरुणा॒ नम॑स्वान् ॥१॥

Indra ko vam varuna sumnamapa stomo havishmam amrito na hota
Yo vam hridi kratumam asmaduktah pasparshadindravaruna namasvan

41.2

इन्द्रा॑ ह॒ यो वरु॑णा च॒क्र आ॒पी दे॒वौ मर्त॑ः स॒ख्याय॒ प्रय॑स्वान् ।
स ह॑न्ति वृ॒त्रा स॑मि॒थेषु॒ शत्रू॒नवो॑भिर्वा म॒हद्भि॒ः स प्र शृ॑ण्वे ॥२॥

Indra ha yo varuna chakra api devau martah sakhyaya prayasvan
Sa hanti vritra samitheshu shatrunavobhirva mahadbhih sa pra shrinve

41.3

इन्द्रा॑ ह॒ रत्नं॒ वरु॑णा॒ धेष्ठे॒त्था नृभ्य॑ः शशमा॒नेभ्य॒स्ता ।
यदी॒ सखा॑या स॒ख्याय॒ सोमै॑ः सु॒तेभि॑ः सुप्र॒यसा॑ मा॒दयै॑ते ॥३॥

Indra ha ratnam varuna dheshthettha nribhyah shashamanebhyasta
Yadi sakhaya sakhyaya somaih sutebhih suprayasa madayaite

41.4

इन्द्रा॑ यु॒वं व॑रुणा दि॒द्युम॑स्मि॒न्नोजि॑ष्ठमुग्रा॒ नि व॑धिष्टं॒ वज्र॑म् ।
यो नो॑ दु॒रेवो॑ वृ॒कति॑र्द॒भीति॒स्तस्मि॑न् मिमाथाम॒भिभू॒त्योज॑ः ॥४॥

Indra yuvam varuna didyumasminnojishthamugra ni vadhishtam vajram
Yo no durevo vrikatirdabhitistasmin mimathamabhibhutyojah

41.5

इन्द्रा॑ यु॒वं व॑रुणा भू॒तम॒स्या धि॒यः प्रे॒तारा॑ वृष॒भेव॑ धे॒नोः ।
सा नो॑ दुहीय॒द् यव॑सेव ग॒त्वी स॒हस्र॑धारा॒ पय॑सा म॒ही गौः ॥५॥

Indra yuvam varuna bhutamasya dhiyah pretara vrishabheva dhenoh
Sa no duhiyad yavaseva gatvi sahasradhara payasa mahi gauh

41.6

तो॒के हि॒ते तन॑य उ॒र्वरा॑सु॒ सूरो॒ दृशी॑के॒ वृष॑णश्च॒ पौंस्ये॑ ।
इन्द्रा॑ नो॒ अत्र॒ वरु॑णा स्याता॒मवो॑भिर्द॒स्मा परि॑तक्म्यायाम् ॥६॥

Toke hite tanaya urvarasu suro drishike vrishanashcha paunsye
Indra no atra varuna syatamavobhirdasma paritakmyayam

41.7

यु॒वामिद्ध्यव॑से पू॒र्व्याय॒ परि॒ प्रभू॑ती ग॒विष॑ः स्वापी ।
वृ॒णी॒महे॑ स॒ख्याय॑ प्रि॒याय॒ शूरा॒ मंहि॑ष्ठा पि॒तरे॑व श॒म्भू ॥७॥

Yuvamiddhyavase purvyaya pari prabhuti gavishah svapi
Vrinimahe sakhyaya priyaya shura manhishtha pitareva shambhu

41.8

ता वां॒ धियोऽव॑से वाज॒यन्ती॑रा॒जिं न ज॑ग्मुर्युव॒यूः सु॑दानू ।
श्रि॒ये न गाव॒ उप॒ सोम॑मस्थु॒रिन्द्रं॒ गिरो॒ वरु॑णं मे मनी॒षाः ॥८॥

Ta vam dhiyovase vajayantirajim na jagmuryuvayuh sudanu
Shriye na gava upa somamasthurindram giro varunam me manishah

41.9

इ॒मा इन्द्रं॒ वरु॑णं मे मनी॒षा अग्म॒न्नुप॒ द्रवि॑णमि॒च्छमा॑नाः ।
उपे॑मस्थुर्जो॒ष्टार॑ इव॒ वस्वो॑ र॒घ्वीरि॑व॒ श्रव॑सो॒ भिक्ष॑माणाः ॥९॥

Ima indram varunam me manisha agmannupa dravinamichchhamanah
Upemasthurjoshtara iva vasvo raghviriva shravaso bhikshamanah

41.10

अश्व्य॑स्य॒ त्मना॒ रथ्य॑स्य पु॒ष्टेर्नित्य॑स्य रा॒यः पत॑यः स्याम ।
ता च॑क्रा॒णा ऊ॒तिभि॒र्नव्य॑सीभिरस्म॒त्रा रायो॑ नि॒युत॑ः सचन्ताम् ॥१०॥

Ashvyasya tmana rathyasya pushternityasya rayah patayah syama
Ta chakrana utibhirnavyasibhirasmatra rayo niyutah sachantam

41.11

आ नो॑ बृहन्ता बृह॒तीभि॑रू॒ती इन्द्र॑ या॒तं व॑रुण॒ वाज॑सातौ ।
यद् दि॒द्यव॒ः पृत॑नासु प्र॒क्रीळा॒न् तस्य॑ वां स्याम सनि॒तार॑ आ॒जेः ॥११॥

A no brihanta brihatibhiruti indra yatam varuna vajasatau
Yad didyavah pritanasu prakrilan tasya vam syama sanitara ajeh