সূক্ত 41

41.1

১১ বামদেবো গৌতমঃ। ইন্দ্রাবরুণৌ। ত্রিষ্টুপ্।

ইন্দ্রা কো বাং বরুণা সুম্নমাপ স্তোমো হবিষ্মাঁ অমৃতো ন হোতা ।
যো বাং হৃদি ক্রতুমাঁ অস্মদুক্তঃ পস্পর্শদিন্দ্রাবরুণা নমস্বান্ ॥১॥

41.2

ইন্দ্রা হ যো বরুণা চক্র আপী দেবৌ মর্তঃ সখ্যায় প্রয়স্বান্ ।
স হন্তি বৃত্রা সমিথেষু শত্রূনবোভির্বা মহদ্ভিঃ স প্র শৃণ্বে ॥২॥

41.3

ইন্দ্রা হ রত্নং বরুণা ধেষ্ঠেত্থা নৃভ্যঃ শশমানেভ্যস্তা ।
যদী সখায়া সখ্যায় সোমৈঃ সুতেভিঃ সুপ্রয়সা মাদয়ৈতে ॥৩॥

41.4

ইন্দ্রা যুবং বরুণা দিদ্যুমস্মিন্নোজিষ্ঠমুগ্রা নি বধিষ্টং বজ্রম্ ।
যো নো দুরেবো বৃকতির্দভীতিস্তস্মিন্ মিমাথামভিভূত্যোজঃ ॥৪॥

41.5

ইন্দ্রা যুবং বরুণা ভূতমস্যা ধিয়ঃ প্রেতারা বৃষভেব ধেনোঃ ।
সা নো দুহীয়দ্ যবসেব গত্বী সহস্রধারা পয়সা মহী গৌঃ ॥৫॥

41.6

তোকে হিতে তনয় উর্বরাসু সূরো দৃশীকে বৃষণশ্চ পৌংস্যে ।
ইন্দ্রা নো অত্র বরুণা স্যাতামবোভির্দস্মা পরিতক্ম্যায়াম্ ॥৬॥

41.7

যুবামিদ্ধ্যবসে পূর্ব্যায় পরি প্রভূতী গবিষঃ স্বাপী ।
বৃণীমহে সখ্যায় প্রিয়ায় শূরা মংহিষ্ঠা পিতরেব শম্ভূ ॥৭॥

41.8

তা বাং ধিয়োঽবসে বাজয়ন্তীরাজিং ন জগ্মুর্যুবয়ূঃ সুদানূ ।
শ্রিয়ে ন গাব উপ সোমমস্থুরিন্দ্রং গিরো বরুণং মে মনীষাঃ ॥৮॥

41.9

ইমা ইন্দ্রং বরুণং মে মনীষা অগ্মন্নুপ দ্রবিণমিচ্ছমানাঃ ।
উপেমস্থুর্জোষ্টার ইব বস্বো রঘ্বীরিব শ্রবসো ভিক্ষমাণাঃ ॥৯॥

41.10

অশ্ব্যস্য ত্মনা রথ্যস্য পুষ্টের্নিত্যস্য রায়ঃ পতয়ঃ স্যাম ।
তা চক্রাণা ঊতিভির্নব্যসীভিরস্মত্রা রায়ো নিয়ুতঃ সচন্তাম্ ॥১০॥

41.11

আ নো বৃহন্তা বৃহতীভিরূতী ইন্দ্র যাতং বরুণ বাজসাতৌ ।
যদ্ দিদ্যবঃ পৃতনাসু প্রক্রীলান্ তস্য বাং স্যাম সনিতার আজেঃ ॥১১॥