Sukta 43

43.1

7 purumilahajamilahau sauhotrau, ashvinau, trishtup

क उ॑ श्रवत्कत॒मो य॒ज्ञिया॑नां व॒न्दारु॑ दे॒वः क॑त॒मो जु॑षाते ।
कस्ये॒मां दे॒वीम॒मृते॑षु॒ प्रेष्ठां॑ हृ॒दि श्रे॑षाम सुष्टु॒तिं सु॑ह॒व्याम् ॥१॥

Ka u shravatkatamo yagyiyanam vandaru devah katamo jushate
Kasyemam devimamriteshu preshtham hridi shreshama sushtutim suhavyam

43.2

को मृ॑ळाति कत॒म आग॑मिष्ठो दे॒वाना॑मु कत॒मः शम्भ॑विष्ठः ।
रथं॒ कमा॑हुर्द्र॒वद॑श्वमा॒शुं यं सूर्य॑स्य दुहि॒तावृ॑णीत ॥२॥

Ko mrilati katama agamishtho devanamu katamah shambhavishthah
Ratham kamahurdravadashvamashum yam suryasya duhitavrinita

43.3

म॒क्षू हि ष्मा॒ गच्छ॑थ॒ ईव॑तो॒ द्यूनिन्द्रो॒ न श॒क्तिं परि॑तक्म्यायाम् ।
दि॒व आजा॑ता दि॒व्या सु॑प॒र्णा कया॒ शची॑नां भवथ॒ः शचि॑ष्ठा ॥३॥

Makshu hi shma gachchhatha ivato dyunindro na shaktim paritakmyayam
Diva ajata divya suparna kaya shachinam bhavathah shachishtha

43.4

का वां॑ भू॒दुप॑माति॒ः कया॑ न॒ आश्वि॑ना गमथो हू॒यमा॑ना ।
को वां॑ म॒हश्चि॒त् त्यज॑सो अ॒भीक॑ उरु॒ष्यतं॑ माध्वी दस्रा न ऊ॒ती ॥४॥

Ka vam bhudupamatih kaya na ashvina gamatho huyamana
Ko vam mahashchit tyajaso abhika urushyatam madhvi dasra na uti

43.5

उ॒रु वां॒ रथ॒ः परि॑ नक्षति॒ द्यामा यत् स॑मु॒द्राद॒भि वर्त॑ते वाम् ।
मध्वा॑ माध्वी॒ मधु॑ वां प्रुषाय॒न् यत् सीं॑ वां॒ पृक्षो॑ भु॒रज॑न्त प॒क्वाः ॥५॥

Uru vam rathah pari nakshati dyama yat samudradabhi vartate vam
Madhva madhvi madhu vam prushayan yat sim vam priksho bhurajanta pakvah

43.6

सिन्धु॑र्ह वां र॒सया॑ सिञ्च॒दश्वा॑न् घृ॒णा वयो॑ऽरु॒षास॒ः परि॑ ग्मन् ।
तदू॒ षु वा॑मजि॒रं चे॑ति॒ यानं॒ येन॒ पती॒ भव॑थः सू॒र्याया॑ः ॥६॥

Sindhurha vam rasaya sinchadashvan ghrina vayorushasah pari gman
Tadu shu vamajiram cheti yanam yena pati bhavathah suryayah

43.7

इ॒हेह॒ यद् वां॑ सम॒ना प॑पृ॒क्षे सेयम॒स्मे सु॑म॒तिर्वा॑जरत्ना ।
उ॒रु॒ष्यतं॑ जरि॒तारं॑ यु॒वं ह॑ श्रि॒तः कामो॑ नासत्या युव॒द्रिक् ॥७॥

Iheha yad vam samana paprikshe seyamasme sumatirvajaratna
Urushyatam jaritaram yuvam ha shritah kamo nasatya yuvadrik