Sukta 10

10.1

8 vamadevo gautamah, agnih, padapanktih, 4, 6, 7, ushnigva, 5 mahapadapanktih, 8 trishtup

अग्ने॒ तम॒द्याऽश्वं॒ न स्तोमै॒ः क्रतुं॒ न भ॒द्रं हृ॑दि॒स्पृश॑म् । ऋ॒ध्यामा॑ त॒ ओहै॑ः ॥१॥

Agne tamadyashvam na stomaih kratum na bhadram hridisprisham, ridhyama ta ohaih

अधा॒ ह्य॑ग्ने॒ क्रतो॑र्भ॒द्रस्य॒ दक्ष॑स्य सा॒धोः । र॒थीर्ऋ॒तस्य॑ बृह॒तो ब॒भूथ॑ ॥२॥

Adha hyagne kratorbhadrasya dakshasya sadhoh, rathirritasya brihato babhutha

ए॒भिर्नो॑ अ॒र्कैर्भवा॑ नो अ॒र्वाङ्स्व१र्ण ज्योति॑ः । अग्ने॒ विश्वे॑भिः सु॒मना॒ अनी॑कैः ॥३॥

Ebhirno arkairbhava no arvansva1rna jyotih, agne vishvebhih sumana anikaih

आ॒भिष्टे॑ अ॒द्य गी॒र्भिर्गृ॒णन्तोऽग्ने॒ दाशे॑म । प्र ते॑ दि॒वो न स्त॑नयन्ति॒ शुष्मा॑ः ॥४॥

Abhishte adya girbhirgrinantogne dashema, pra te divo na stanayanti shushmah

तव॒ स्वादि॒ष्ठा ऽग्ने॒ संदृ॑ष्टिरि॒दा चि॒दह्न॑ इ॒दा चि॑द॒क्तोः । श्रि॒ये रु॒क्मो न रो॑चत उपा॒के ॥५॥

Tava svadishtha gne sandrishtirida chidahna ida chidaktoh, shriye rukmo na rochata upake

घृ॒तं न पू॒तं त॒नूर॑रे॒पाः शुचि॒ हिर॑ण्यम् । तत् ते॑ रु॒क्मो न रो॑चत स्वधावः ॥६॥

Ghritam na putam tanurarepah shuchi hiranyam, tat te rukmo na rochata svadhavah

कृ॒तं चि॒द्धि ष्मा॒ सने॑मि॒ द्वेषोऽग्न॑ इ॒नोषि॒ मर्ता॑त् । इ॒त्था यज॑मानादृतावः ॥७॥

Kritam chiddhi shma sanemi dveshogna inoshi martat, ittha yajamanadritavah

शि॒वा न॑ः स॒ख्या सन्तु॑ भ्रा॒त्रा ऽग्ने॑ दे॒वेषु॑ यु॒ष्मे । सा नो॒ नाभि॒ः सद॑ने॒ सस्मि॒न्नूध॑न् ॥८॥

Shiva nah sakhya santu bhratra gne deveshu yushme, sa no nabhih sadane sasminnudhan