Sukta 11

11.1

6 vamadevo gautamah, agnih, trishtup

भ॒द्रं ते॑ अग्ने सहसि॒न्ननी॑कमुपा॒क आ रो॑चते॒ सूर्य॑स्य ।
रुश॑द् दृ॒शे द॑दृशे नक्त॒या चि॒दरू॑क्षितं दृ॒श आ रू॒पे अन्न॑म् ॥१॥

Bhadram te agne sahasinnanikamupaka a rochate suryasya
Rushad drishe dadrishe naktaya chidarukshitam drisha a rupe annam

वि षा॑ह्यग्ने गृण॒ते म॑नी॒षां खं वेप॑सा तुविजात॒ स्तवा॑नः ।
विश्वे॑भि॒र्यद् वा॒वन॑ः शुक्र दे॒वैस्तन्नो॑ रास्व सुमहो॒ भूरि॒ मन्म॑ ॥२॥

Vi shahyagne grinate manisham kham vepasa tuvijata stavanah
Vishvebhiryad vavanah shukra devaistanno rasva sumaho bhuri manma

त्वद॑ग्ने॒ काव्या॒ त्वन्म॑नी॒षास्त्वदु॒क्था जा॑यन्ते॒ राध्या॑नि ।
त्वदे॑ति॒ द्रवि॑णं वी॒रपे॑शा इ॒त्थाधि॑ये दा॒शुषे॒ मर्त्या॑य ॥३॥

Tvadagne kavya tvanmanishastvaduktha jayante radhyani
Tvadeti dravinam virapesha itthadhiye dashushe martyaya

त्वद् वा॒जी वा॑जम्भ॒रो विहा॑या अभिष्टि॒कृज्जा॑यते स॒त्यशु॑ष्मः ।
त्वद् र॒यिर्दे॒वजू॑तो मयो॒भुस्त्वदा॒शुर्जू॑जु॒वाँ अ॑ग्ने॒ अर्वा॑ ॥४॥

Tvad vaji vajambharo vihaya abhishtikrijjayate satyashushmah
Tvad rayirdevajuto mayobhustvadashurjujuvam agne arva

त्वाम॑ग्ने प्रथ॒मं दे॑व॒यन्तो॑ दे॒वं मर्ता॑ अमृत म॒न्द्रजि॑ह्वम् ।
द्वे॒षो॒युत॒मा वि॑वासन्ति धी॒भिर्दमू॑नसं गृ॒हप॑ति॒ममू॑रम् ॥५॥

Tvamagne prathamam devayanto devam marta amrita mandrajihvam
Dveshoyutama vivasanti dhibhirdamunasam grihapatimamuram

आ॒रे अ॒स्मदम॑तिमा॒रे अंह॑ आ॒रे विश्वां॑ दुर्म॒तिं यन्नि॒पासि॑ ।
दो॒षा शि॒वः स॑हसः सूनो अग्ने॒ यं दे॒व आ चि॒त् सच॑से स्व॒स्ति ॥६॥

Are asmadamatimare anha are vishvam durmatim yannipasi
Dosha shivah sahasah suno agne yam deva a chit sachase svasti