Sukta 18

18.1

5 kato vaishvamitrah, agnih, trishtup

भवा॑ नो अग्ने सु॒मना॒ उपे॑तौ॒ सखे॑व॒ सख्ये॑ पि॒तरे॑व सा॒धुः ।
पु॒रु॒द्रुहो॒ हि क्षि॒तयो॒ जना॑नां॒ प्रति॑ प्रती॒चीर्द॑हता॒दरा॑तीः ॥१॥

Bhava no agne sumana upetau sakheva sakhye pitareva sadhuh
Purudruho hi kshitayo jananam prati pratichirdahatadaratih

तपो॒ ष्व॑ग्ने॒ अन्त॑राँ अ॒मित्रा॒न् तपा॒ शंस॒मर॑रुष॒ः पर॑स्य ।
तपो॑ वसो चिकिता॒नो अ॒चित्ता॒न् वि ते॑ तिष्ठन्ताम॒जरा॑ अ॒यास॑ः ॥२॥

Tapo shvagne antaram amitran tapa shansamararushah parasya
Tapo vaso chikitano achittan vi te tishthantamajara ayasah

इ॒ध्मेना॑ग्न इ॒च्छमा॑नो घृ॒तेन॑ जु॒होमि॑ ह॒व्यं तर॑से॒ बला॑य ।
याव॒दीशे॒ ब्रह्म॑णा॒ वन्द॑मान इ॒मां धियं॑ शत॒सेया॑य दे॒वीम् ॥३॥

Idhmenagna ichchhamano ghritena juhomi havyam tarase balaya
Yavadishe brahmana vandamana imam dhiyam shataseyaya devim

उच्छो॒चिषा॑ सहसस्पुत्र स्तु॒तो बृ॒हद् वय॑ः शशमा॒नेषु॑ धेहि ।
रे॒वद॑ग्ने वि॒श्वामि॑त्रेषु॒ शं योर्म॑र्मृ॒ज्मा ते॑ त॒न्वं१ भूरि॒ कृत्व॑ः ॥४॥

Uchchhochisha sahasasputra stuto brihad vayah shashamaneshu dhehi
Revadagne vishvamitreshu sham yormarmrijma te tanvan1 bhuri kritvah

कृ॒धि रत्नं॑ सुसनित॒र्धना॑नां॒ स घेद॑ग्ने भवसि॒ यत् समि॑द्धः ।
स्तो॒तुर्दु॑रो॒णे सु॒भग॑स्य रे॒वत् सृ॒प्रा क॒रस्ना॑ दधिषे॒ वपूं॑षि ॥५॥

Kridhi ratnam susanitardhananam sa ghedagne bhavasi yat samiddhah
Stoturdurone subhagasya revat sripra karasna dadhishe vapunshi