Sukta 17

17.1

5 kato vaishvamitrah, agnih, trishtup

स॒मि॒ध्यमा॑नः प्रथ॒मानु॒ धर्मा॒ सम॒क्तुभि॑रज्यते वि॒श्ववा॑रः ।
शो॒चिष्के॑शो घृ॒तनि॑र्णिक् पाव॒कः सु॑य॒ज्ञो अ॒ग्निर्य॒जथा॑य दे॒वान् ॥१॥

Samidhyamanah prathamanu dharma samaktubhirajyate vishvavarah
Shochishkesho ghritanirnik pavakah suyagyo agniryajathaya devan

17.2

यथाय॑जो हो॒त्रम॑ग्ने पृथि॒व्या यथा॑ दि॒वो जा॑तवेदश्चिकि॒त्वान् ।
ए॒वानेन॑ ह॒विषा॑ यक्षि दे॒वान् म॑नु॒ष्वद् य॒ज्ञं प्र ति॑रे॒मम॒द्य ॥२॥

Yathayajo hotramagne prithivya yatha divo jatavedashchikitvan
Evanena havisha yakshi devan manushvad yagyam pra tiremamadya

17.3

त्रीण्यायूं॑षि॒ तव॑ जातवेदस्ति॒स्र आ॒जानी॑रु॒षस॑स्ते अग्ने ।
ताभि॑र्दे॒वाना॒मवो॑ यक्षि वि॒द्वानथा॑ भव॒ यज॑मानाय॒ शं योः ॥३॥

Trinyayunshi tava jatavedastisra ajanirushasaste agne
Tabhirdevanamavo yakshi vidvanatha bhava yajamanaya sham yoh

17.4

अ॒ग्निं सु॑दी॒तिं सु॒दृशं॑ गृ॒णन्तो॑ नम॒स्याम॒स्त्वेड्यं॑ जातवेदः ।
त्वां दू॒तम॑र॒तिं ह॑व्य॒वाहं॑ दे॒वा अ॑कृण्वन्न॒मृत॑स्य॒ नाभि॑म् ॥४॥

Agnim suditim sudrisham grinanto namasyamastvedyam jatavedah
Tvam dutamaratim havyavaham deva akrinvannamritasya nabhim

17.5

यस्त्वद्धोता॒ पूर्वो॑ अग्ने॒ यजी॑यान् द्वि॒ता च॒ सत्ता॑ स्व॒धया॑ च श॒म्भुः ।
तस्यानु॒ धर्म॒ प्र य॑जा चिकि॒त्वोऽथ॑ नो धा अध्व॒रं दे॒ववी॑तौ ॥५॥

Yastvaddhota purvo agne yajiyan dvita cha satta svadhaya cha shambhuh
Tasyanu dharma pra yaja chikitvotha no dha adhvaram devavitau