Sukta 22

22.1

4 gritsamada (angirasah shaunahotrah pashchad) bhargavah shaunakah, indrah, 1 ashtih, 2-3 atishakvari, 4 ashtih atishakvari va

त्रिक॑द्रुकेषु महि॒षो यवा॑शिरं तुवि॒शुष्म॑स्तृ॒पत् सोम॑मपिब॒द् विष्णु॑ना सु॒तं यथाव॑शत् ।
स ईं॑ ममाद॒ महि॒ कर्म॒ कर्त॑वे म॒हामु॒रुं सैनं॑ सश्चद् दे॒वो दे॒वं स॒त्यमिन्द्रं॑ स॒त्य इन्दु॑ः ॥१॥

Trikadrukeshu mahisho yavashiram tuvishushmastripat somamapibad vishnuna sutam yathavashat
Sa im mamada mahi karma kartave mahamurum sainam sashchad devo devam satyamindram satya induh

22.2

अध॒ त्विषी॑माँ अ॒भ्योज॑सा॒ क्रिविं॑ यु॒धाभ॑व॒दा रोद॑सी अपृणदस्य म॒ज्मना॒ प्र वा॑वृधे ।
अध॑त्ता॒न्यं ज॒ठरे॒ प्रेम॑रिच्यत॒ सैनं॑ सश्चद् दे॒वो दे॒वं स॒त्यमिन्द्रं॑ स॒त्य इन्दु॑ः ॥२॥

Adha tvishimam abhyojasa krivim yudhabhavada rodasi aprinadasya majmana pra vavridhe
Adhattanyam jathare premarichyata sainam sashchad devo devam satyamindram satya induh

22.3

सा॒कं जा॒तः क्रतु॑ना सा॒कमोज॑सा ववक्षिथ सा॒कं वृ॒द्धो वी॒र्यै॑ः सास॒हिर्मृधो॒ विच॑र्षणिः ।
दाता॒ राध॑ः स्तुव॒ते काम्यं॒ वसु॒ सैनं॑ सश्चद् दे॒वो दे॒वं स॒त्यमिन्द्रं॑ स॒त्य इन्दु॑ः ॥३॥

Sakam jatah kratuna sakamojasa vavakshitha sakam vriddho viryaih sasahirmridho vicharshanih
Data radhah stuvate kamyam vasu sainam sashchad devo devam satyamindram satya induh

22.4

तव॒ त्यन्नर्यं॑ नृ॒तोऽप॑ इन्द्र प्रथ॒मं पू॒र्व्यं दि॒वि प्र॒वाच्यं॑ कृ॒तम् ।
यद् दे॒वस्य॒ शव॑सा॒ प्रारि॑णा॒ असुं॑ रि॒णन्न॒पः ।
भुव॒द् विश्व॑म॒भ्यादे॑व॒मोज॑सा वि॒दादूर्जं॑ श॒तक्र॑तुर्वि॒दादिष॑म् ॥४॥

Tava tyannaryam nritopa indra prathamam purvyam divi pravachyam kritam
Yad devasya shavasa prarina asum rinannapah
Bhuvad vishvamabhyadevamojasa vidadurjam shatakraturvidadisham