Sukta 21

21.1

6 gritsamada (angirasah shaunahotrah pashchad) bhargavah shaunakah, indrah, jagati, 6 trishtup

वि॒श्व॒जिते॑ धन॒जिते॑ स्व॒र्जिते॑ सत्रा॒जिते॑ नृ॒जित॑ उर्वरा॒जिते॑ ।
अ॒श्व॒जिते॑ गो॒जिते॑ अ॒ब्जिते॑ भ॒रेन्द्रा॑य॒ सोमं॑ यज॒ताय॑ हर्य॒तम् ॥१॥

Vishvajite dhanajite svarjite satrajite nrijita urvarajite
Ashvajite gojite abjite bharendraya somam yajataya haryatam

21.2

अ॒भि॒भुवे॑ऽभिभ॒ङ्गाय॑ वन्व॒ते ऽषा॑ळहाय॒ सह॑मानाय वे॒धसे॑ ।
तु॒वि॒ग्रये॒ वह्न॑ये दु॒ष्टरी॑तवे सत्रा॒साहे॒ नम॒ इन्द्रा॑य वोचत ॥२॥

Abhibhuvebhibhangaya vanvate shalahaya sahamanaya vedhase
Tuvigraye vahnaye dushtaritave satrasahe nama indraya vochata

21.3

स॒त्रा॒सा॒हो ज॑नभ॒क्षो ज॑नंस॒हश्च्यव॑नो यु॒ध्मो अनु॒ जोष॑मुक्षि॒तः ।
वृ॒तं॒च॒यः सहु॑रिर्वि॒क्ष्वा॑रि॒त इन्द्र॑स्य वोचं॒ प्र कृ॒तानि॑ वी॒र्या॑ ॥३॥

Satrasaho janabhaksho janansahashchyavano yudhmo anu joshamukshitah
Vritanchayah sahurirvikshvarita indrasya vocham pra kritani virya

21.4

अ॒ना॒नु॒दो वृ॑ष॒भो दोध॑तो व॒धो ग॑म्भी॒र ऋ॒ष्वो अस॑मष्टकाव्यः ।
र॒ध्र॒चो॒दः श्नथ॑नो वीळि॒तस्पृ॒थुरिन्द्र॑ः सुय॒ज्ञ उ॒षस॒ः स्व॑र्जनत् ॥४॥

Ananudo vrishabho dodhato vadho gambhira rishvo asamashtakavyah
Radhrachodah shnathano vilitasprithurindrah suyagya ushasah svarjanat

21.5

य॒ज्ञेन॑ गा॒तुम॒प्तुरो॑ विविद्रिरे॒ धियो॑ हिन्वा॒ना उ॒शिजो॑ मनी॒षिण॑ः ।
अ॒भि॒स्वरा॑ नि॒षदा॒ गा अ॑व॒स्यव॒ इन्द्रे॑ हिन्वा॒ना द्रवि॑णान्याशत ॥५॥

Yagyena gatumapturo vividrire dhiyo hinvana ushijo manishinah
Abhisvara nishada ga avasyava indre hinvana dravinanyashata

21.6

इन्द्र॒ श्रेष्ठा॑नि॒ द्रवि॑णानि धेहि॒ चित्तिं॒ दक्ष॑स्य सुभग॒त्वम॒स्मे ।
पोषं॑ रयी॒णामरि॑ष्टिं त॒नूनां॑ स्वा॒द्मानं॑ वा॒चः सु॑दिन॒त्वमह्ना॑म् ॥६॥

Indra shreshthani dravinani dhehi chittim dakshasya subhagatvamasme
Posham rayinamarishtim tanunam svadmanam vachah sudinatvamahnam