Sukta 167

167.1

4 vishvamitra-jamadagni, indrah, 3 soma-varuna-brihaspati-anumati-maghavat-dhatri-vidhatarah, jagati

तुभ्ये॒दमि॑न्द्र॒ परि॑ षिच्यते॒ मधु॒ त्वं सु॒तस्य॑ क॒लश॑स्य राजसि ।
त्वं र॒यिं पु॑रु॒वीरा॑मु नस्कृधि॒ त्वं तप॑ः परि॒तप्या॑जय॒ः स्व॑ः ॥१॥

Tubhyedamindra pari shichyate madhu tvam sutasya kalashasya rajasi
Tvam rayim puruviramu naskridhi tvam tapah paritapyajayah svah

167.2

स्व॒र्जितं॒ महि॑ मन्दा॒नमन्ध॑सो॒ हवा॑महे॒ परि॑ श॒क्रं सु॒ताँ उप॑ ।
इ॒मं नो॑ य॒ज्ञमि॒ह बो॒ध्या ग॑हि॒ स्पृधो॒ जय॑न्तं म॒घवा॑नमीमहे ॥२॥

Svarjitam mahi mandanamandhaso havamahe pari shakram sutam upa
Imam no yagyamiha bodhya gahi spridho jayantam maghavanamimahe

167.3

सोम॑स्य॒ राज्ञो॒ वरु॑णस्य॒ धर्म॑णि॒ बृह॒स्पते॒रनु॑मत्या उ॒ शर्म॑णि ।
तवा॒हम॒द्य म॑घव॒न्नुप॑स्तुतौ॒ धात॒र्विधा॑तः क॒लशाँ॑ अभक्षयम् ॥३॥

Somasya ragyo varunasya dharmani brihaspateranumatya u sharmani
Tavahamadya maghavannupastutau dhatarvidhatah kalasham abhakshayam

167.4

प्रसू॑तो भ॒क्षम॑करं च॒रावपि॒ स्तोमं॑ चे॒मं प्र॑थ॒मः सू॒रिरुन्मृ॑जे ।
सु॒ते सा॒तेन॒ यद्याग॑मं वां॒ प्रति॑ विश्वामित्रजमदग्नी॒ दमे॑ ॥४॥

Prasuto bhakshamakaram charavapi stomam chemam prathamah surirunmrije
Sute satena yadyagamam vam prati vishvamitrajamadagni dame