Sukta 42

42.1

10 kanvo ghaurah, pusha, gayatri

सं पू॑ष॒न्नध्व॑नस्तिर॒ व्यंहो॑ विमुचो नपात् । सक्ष्वा॑ देव॒ प्र ण॑स्पु॒रः ॥१॥

Sam pushannadhvanastira vyanho vimucho napat, sakshva deva pra naspurah

यो न॑ः पूषन्न॒घो वृको॑ दु॒ःशेव॑ आ॒दिदे॑शति । अप॑ स्म॒ तं प॒थो ज॑हि ॥२॥

Yo nah pushannagho vriko duhsheva adideshati, apa sma tam patho jahi

अप॒ त्यं प॑रिप॒न्थिनं॑ मुषी॒वाणं॑ हुर॒श्चित॑म् । दू॒रमधि॑ स्रु॒तेर॑ज ॥३॥

Apa tyam paripanthinam mushivanam hurashchitam, duramadhi sruteraja

त्वं तस्य॑ द्वया॒विनो॒ ऽघशं॑सस्य॒ कस्य॑ चित् । प॒दाभि ति॑ष्ठ॒ तपु॑षिम् ॥४॥

Tvam tasya dvayavino ghashansasya kasya chit, padabhi tishtha tapushim

आ तत्ते॑ दस्र मन्तुम॒ः पूष॒न्नवो॑ वृणीमहे । येन॑ पि॒तॄनचो॑दयः ॥५॥

A tatte dasra mantumah pushannavo vrinimahe, yena pitrinachodayah

अधा॑ नो विश्वसौभग॒ हिर॑ण्यवाशीमत्तम । धना॑नि सु॒षणा॑ कृधि ॥६॥

Adha no vishvasaubhaga hiranyavashimattama, dhanani sushana kridhi

अति॑ नः स॒श्चतो॑ नय सु॒गा न॑ः सु॒पथा॑ कृणु । पूष॑न्नि॒ह क्रतुं॑ विदः ॥७॥

Ati nah sashchato naya suga nah supatha krinu, pushanniha kratum vidah

अ॒भि सू॒यव॑सं नय॒ न न॑वज्वा॒रो अध्व॑ने । पूष॑न्नि॒ह क्रतुं॑ विदः ॥८॥

Abhi suyavasam naya na navajvaro adhvane, pushanniha kratum vidah

श॒ग्धि पू॒र्धि प्र यं॑सि च शिशी॒हि प्रास्यु॒दर॑म् । पूष॑न्नि॒ह क्रतुं॑ विदः ॥९॥

Shagdhi purdhi pra yansi cha shishihi prasyudaram, pushanniha kratum vidah

न पू॒षणं॑ मेथामसि सू॒क्तैर॒भि गृ॑णीमसि । वसू॑नि द॒स्ममी॑महे ॥१०॥

Na pushanam methamasi suktairabhi grinimasi, vasuni dasmamimahe