সূক্ত 42

42.1

১০ কণ্বো ঘৌরঃ। পূষা। গায়ত্রী।

সং পূষন্নধ্বনস্তির ব্যংহো বিমুচো নপাৎ । সক্ষ্বা দেব প্র ণস্পুরঃ ॥১॥

42.2

যো নঃ পূষন্নঘো বৃকো দুঃশেব আদিদেশতি । অপ স্ম তং পথো জহি ॥২॥

42.3

অপ ত্যং পরিপন্থিনং মুষীবাণং হুরশ্চিতম্ । দূরমধি স্রুতেরজ ॥৩॥

42.4

ত্বং তস্য দ্বয়াবিনো ঽঘশংসস্য কস্য চিৎ । পদাভি তিষ্ঠ তপুষিম্ ॥৪॥

42.5

আ তত্তে দস্র মন্তুমঃ পূষন্নবো বৃণীমহে । যেন পিতৄনচোদয়ঃ ॥৫॥

42.6

অধা নো বিশ্বসৌভগ হিরণ্যবাশীমত্তম । ধনানি সুষণা কৃধি ॥৬॥

42.7

অতি নঃ সশ্চতো নয় সুগা নঃ সুপথা কৃণু । পূষন্নিহ ক্রতুং বিদঃ ॥৭॥

42.8

অভি সূয়বসং নয় ন নবজ্বারো অধ্বনে । পূষন্নিহ ক্রতুং বিদঃ ॥৮॥

42.9

শগ্ধি পূর্ধি প্র যংসি চ শিশীহি প্রাস্যুদরম্ । পূষন্নিহ ক্রতুং বিদঃ ॥৯॥

42.10

ন পূষণং মেথামসি সূক্তৈরভি গৃণীমসি । বসূনি দস্মমীমহে ॥১০॥