Sukta 43

43.1

9 kanvo ghaurah, rudrah, mitravarunau cha, 7-9 somah, gayatri, 9 anushtap

कद् रु॒द्राय॒ प्रचे॑तसे मी॒ह्ळुष्ट॑माय॒ तव्य॑से । वो॒चेम॒ शंत॑मं हृ॒दे ॥१॥

Kad rudraya prachetase mihlushtamaya tavyase, vochema shantamam hride

यथा॑ नो॒ अदि॑ति॒ः कर॒त् पश्वे॒ नृभ्यो॒ यथा॒ गवे॑ । यथा॑ तो॒काय॑ रु॒द्रिय॑म् ॥२॥

Yatha no aditih karat pashve nribhyo yatha gave, yatha tokaya rudriyam

यथा॑ नो मि॒त्रो वरु॑णो॒ यथा॑ रु॒द्रश्चिके॑तति । यथा॒ विश्वे॑ स॒जोष॑सः ॥३॥

Yatha no mitro varuno yatha rudrashchiketati, yatha vishve sajoshasah

गा॒थप॑तिं मे॒धप॑तिं रु॒द्रं जला॑षभेषजम् । तच्छं॒योः सु॒म्नमी॑महे ॥४॥

Gathapatim medhapatim rudram jalashabheshajam, tachchhanyoh sumnamimahe

यः शु॒क्र इ॑व॒ सूर्यो॒ हिर॑ण्यमिव॒ रोच॑ते । श्रेष्ठो॑ दे॒वानां॒ वसु॑ः ॥५॥

Yah shukra iva suryo hiranyamiva rochate, shreshtho devanam vasuh

शं न॑ः कर॒त्यर्व॑ते सु॒गं मे॒षाय॑ मे॒ष्ये॑ । नृभ्यो॒ नारि॑भ्यो॒ गवे॑ ॥६॥

Sham nah karatyarvate sugam meshaya meshye, nribhyo naribhyo gave

अ॒स्मे सो॑म॒ श्रिय॒मधि॒ नि धे॑हि श॒तस्य॑ नृ॒णाम् । महि॒ श्रव॑स्तुविनृ॒म्णम् ॥७॥

Asme soma shriyamadhi ni dhehi shatasya nrinam, mahi shravastuvinrimnam

मा न॑ः सोमपरि॒बाधो॒ मारा॑तयो जुहुरन्त । आ न॑ इन्दो॒ वाजे॑ भज ॥८॥

Ma nah somaparibadho maratayo juhuranta, a na indo vaje bhaja

यास्ते॑ प्र॒जा अ॒मृत॑स्य॒ पर॑स्मि॒न्धाम॑न्नृ॒तस्य॑ ।
मू॒र्धा नाभा॑ सोम वेन आ॒भूष॑न्तीः सोम वेदः ॥९॥

Yaste praja amritasya parasmindhamannritasya
Murdha nabha soma vena abhushantih soma vedah