Sukta 44

44.1

14 praskanvah kanvah, agnih, 1-2 agnih, ashvinau, ushashcha, pragathah – vishama brihatyah, samah satobrihatyah

अग्ने॒ विव॑स्वदु॒षस॑श् चि॒त्रं राधो॑ अमर्त्य ।
आ दा॒शुषे॑ जातवेदो वहा॒ त्वम॒द्या दे॒वाँ उ॑ष॒र्बुध॑ः ॥१॥

Agne vivasvadushasash chitram radho amartya
A dashushe jatavedo vaha tvamadya devam usharbudhah

जुष्टो॒ हि दू॒तो असि॑ हव्य॒वाह॒नो ऽग्ने॑ र॒थीर॑ध्व॒राणा॑म् ।
स॒जूर॒श्विभ्या॑मु॒षसा॑ सु॒वीर्य॑म॒स्मे धे॑हि॒ श्रवो॑ बृ॒हत् ॥२॥

Jushto hi duto asi havyavahano gne rathiradhvaranam
Sajurashvibhyamushasa suviryamasme dhehi shravo brihat

अ॒द्या दू॒तं वृ॑णीमहे॒ वसु॑म॒ग्निं पु॑रुप्रि॒यम् ।
धू॒मके॑तुं॒ भाऋ॑जीकं॒ व्यु॑ष्टिषु य॒ज्ञाना॑मध्वर॒श्रिय॑म् ॥३॥

Adya dutam vrinimahe vasumagnim purupriyam
Dhumaketum bharijikam vyushtishu yagyanamadhvarashriyam

श्रेष्ठं॒ यवि॑ष्ठ॒मति॑थिं॒ स्वा॑हुतं॒ जुष्टं॒ जना॑य दा॒शुषे॑ ।
दे॒वाँ अच्छा॒ यात॑वे जा॒तवे॑दसम॒ग्निमी॑ळे॒ व्यु॑ष्टिषु ॥४॥

Shreshtham yavishthamatithim svahutam jushtam janaya dashushe
Devam achchha yatave jatavedasamagnimile vyushtishu

स्त॒वि॒ष्यामि॒ त्वाम॒हं विश्व॑स्यामृत भोजन ।
अग्ने॑ त्रा॒तार॑म॒मृतं॑ मियेध्य॒ यजि॑ष्ठं हव्यवाहन ॥५॥

Stavishyami tvamaham vishvasyamrita bhojana
Agne trataramamritam miyedhya yajishtham havyavahana

सु॒शंसो॑ बोधि गृण॒ते य॑विष्ठ्य॒ मधु॑जिह्व॒ः स्वा॑हुतः ।
प्रस्क॑ण्वस्य प्रति॒रन्नायु॑र्जी॒वसे॑ नम॒स्या दैव्यं॒ जन॑म् ॥६॥

Sushanso bodhi grinate yavishthya madhujihvah svahutah
Praskanvasya pratirannayurjivase namasya daivyam janam

होता॑रं वि॒श्ववे॑दसं॒ सं हि त्वा॒ विश॑ इ॒न्धते॑ ।
स आ व॑ह पुरुहूत॒ प्रचे॑त॒सो ऽग्ने॑ दे॒वाँ इ॒ह द्र॒वत् ॥७॥

Hotaram vishvavedasam sam hi tva visha indhate
Sa a vaha puruhuta prachetaso gne devam iha dravat

स॒वि॒तार॑मु॒षस॑म॒श्विना॒ भग॑म॒ग्निं व्यु॑ष्टिषु॒ क्षप॑ः ।
कण्वा॑सस्त्वा सु॒तसो॑मास इन्धते हव्य॒वाहं॑ स्वध्वर ॥८॥

Savitaramushasamashvina bhagamagnim vyushtishu kshapah
Kanvasastva sutasomasa indhate havyavaham svadhvara

पति॒र्ह्य॑ध्व॒राणा॒मग्ने॑ दू॒तो वि॒शामसि॑ ।
उ॒ष॒र्बुध॒ आ व॑ह॒ सोम॑पीतये दे॒वाँ अ॒द्य स्व॒र्दृश॑ः ॥९॥

Patirhyadhvaranamagne duto vishamasi
Usharbudha a vaha somapitaye devam adya svardrishah

अग्ने॒ पूर्वा॒ अनू॒षसो॑ विभावसो दी॒देथ॑ वि॒श्वद॑र्शतः ।
असि॒ ग्रामे॑ष्ववि॒ता पु॒रोहि॒तो ऽसि॑ य॒ज्ञेषु॒ मानु॑षः ॥१०॥

Agne purva anushaso vibhavaso didetha vishvadarshatah
Asi grameshvavita purohito si yagyeshu manushah

नि त्वा॑ य॒ज्ञस्य॒ साध॑न॒मग्ने॒ होता॑रमृ॒त्विज॑म् ।
म॒नु॒ष्वद् दे॑व धीमहि॒ प्रचे॑तसं जी॒रं दू॒तमम॑र्त्यम् ॥११॥

Ni tva yagyasya sadhanamagne hotaramritvijam
Manushvad deva dhimahi prachetasam jiram dutamamartyam

यद् दे॒वानां॑ मित्रमहः पु॒रोहि॒तो ऽन्त॑रो॒ यासि॑ दू॒त्य॑म् ।
सिन्धो॑रिव॒ प्रस्व॑नितास ऊ॒र्मयो॒ ऽग्नेर्भ्रा॑जन्ते अ॒र्चय॑ः ॥१२॥

Yad devanam mitramahah purohito ntaro yasi dutyam
Sindhoriva prasvanitasa urmayo gnerbhrajante archayah

श्रु॒धि श्रु॑त्कर्ण॒ वह्नि॑भिर्दे॒वैर॑ग्ने स॒याव॑भिः ।
आ सी॑दन्तु ब॒र्हिषि॑ मि॒त्रो अ॑र्य॒मा प्रा॑त॒र्यावा॑णो अध्व॒रम् ॥१३॥

Shrudhi shrutkarna vahnibhirdevairagne sayavabhih
A sidantu barhishi mitro aryama prataryavano adhvaram

शृ॒ण्वन्तु॒ स्तोमं॑ म॒रुत॑ः सु॒दान॑वो ऽग्निजि॒ह्वा ऋ॑ता॒वृध॑ः ।
पिब॑तु॒ सोमं॒ वरु॑णो धृ॒तव्र॑तो॒ ऽश्विभ्या॑मु॒षसा॑ स॒जूः ॥१४॥

Shrinvantu stomam marutah sudanavo gnijihva ritavridhah
Pibatu somam varuno dhritavrato shvibhyamushasa sajuh