সূক্ত 44

44.1

১৪ প্রস্কণ্বঃ কাণ্বঃ। অগ্নিঃ, ১-২ অগ্নিঃ, অশ্বিনৌ, উষাশ্চ। প্রগাথঃ – বিষমা বৃহত্যঃ, সমাঃ সতোবৃহত্যঃ।

অগ্নে বিবস্বদুষসশ্ চিত্রং রাধো অমর্ত্য ।
আ দাশুষে জাতবেদো বহা ত্বমদ্যা দেবাঁ উষর্বুধঃ ॥১॥

জুষ্টো হি দূতো অসি হব্যবাহনো ঽগ্নে রথীরধ্বরাণাম্ ।
সজূরশ্বিভ্যামুষসা সুবীর্যমস্মে ধেহি শ্রবো বৃহৎ ॥২॥

অদ্যা দূতং বৃণীমহে বসুমগ্নিং পুরুপ্রিয়ম্ ।
ধূমকেতুং ভাঋজীকং ব্যুষ্টিষু যজ্ঞানামধ্বরশ্রিয়ম্ ॥৩॥

শ্রেষ্ঠং যবিষ্ঠমতিথিং স্বাহুতং জুষ্টং জনায় দাশুষে ।
দেবাঁ অচ্ছা যাতবে জাতবেদসমগ্নিমীলে ব্যুষ্টিষু ॥৪॥

স্তবিষ্যামি ত্বামহং বিশ্বস্যামৃত ভোজন ।
অগ্নে ত্রাতারমমৃতং মিয়েধ্য যজিষ্ঠং হব্যবাহন ॥৫॥

সুশংসো বোধি গৃণতে যবিষ্ঠ্য মধুজিহ্বঃ স্বাহুতঃ ।
প্রস্কণ্বস্য প্রতিরন্নায়ুর্জীবসে নমস্যা দৈব্যং জনম্ ॥৬॥

হোতারং বিশ্ববেদসং সং হি ত্বা বিশ ইন্ধতে ।
স আ বহ পুরুহূত প্রচেতসো ঽগ্নে দেবাঁ ইহ দ্রবৎ ॥৭॥

সবিতারমুষসমশ্বিনা ভগমগ্নিং ব্যুষ্টিষু ক্ষপঃ ।
কণ্বাসস্ত্বা সুতসোমাস ইন্ধতে হব্যবাহং স্বধ্বর ॥৮॥

পতির্হ্যধ্বরাণামগ্নে দূতো বিশামসি ।
উষর্বুধ আ বহ সোমপীতয়ে দেবাঁ অদ্য স্বর্দৃশঃ ॥৯॥

অগ্নে পূর্বা অনূষসো বিভাবসো দীদেথ বিশ্বদর্শতঃ ।
অসি গ্রামেষ্ববিতা পুরোহিতো ঽসি যজ্ঞেষু মানুষঃ ॥১০॥

নি ত্বা যজ্ঞস্য সাধনমগ্নে হোতারমৃত্বিজম্ ।
মনুষ্বদ্ দেব ধীমহি প্রচেতসং জীরং দূতমমর্ত্যম্ ॥১১॥

যদ্ দেবানাং মিত্রমহঃ পুরোহিতো ঽন্তরো যাসি দূত্যম্ ।
সিন্ধোরিব প্রস্বনিতাস ঊর্ময়ো ঽগ্নের্ভ্রাজন্তে অর্চয়ঃ ॥১২॥

শ্রুধি শ্রুত্কর্ণ বহ্নিভির্দেবৈরগ্নে সয়াবভিঃ ।
আ সীদন্তু বর্হিষি মিত্রো অর্যমা প্রাতর্যাবাণো অধ্বরম্ ॥১৩॥

শৃণ্বন্তু স্তোমং মরুতঃ সুদানবো ঽগ্নিজিহ্বা ঋতাবৃধঃ ।
পিবতু সোমং বরুণো ধৃতব্রতো ঽশ্বিভ্যামুষসা সজূঃ ॥১৪॥