সূক্ত 45

45.1

১০ প্রস্কণ্বঃ কাণ্বঃ। অগ্নিঃ, ১০ (উত্তরার্ধস্য) দেবাঃ। অনুষ্টুপ্।

ত্বমগ্নে বসূঁরিহ রুদ্রাঁ আদিত্যাঁ উত । যজা স্বধ্বরং জনং মনুজাতং ঘৃতপ্রুষম্ ॥১॥

45.2

শ্রুষ্টীবানো হি দাশুষে দেবা অগ্নে বিচেতসঃ । তান্ রোহিদশ্ব গির্বণস্ ত্রয়স্ত্রিংশতমা বহ ॥২॥

45.3

প্রিয়মেধবদত্রিবজ্ জাতবেদো বিরূপবৎ । অঙ্গিরস্বন্মহিব্রত প্রস্কণ্বস্য শ্রুধী হবম্ ॥৩॥

45.4

মহিকেরব ঊতয়ে প্রিয়মেধা অহূষত । রাজন্তমধ্বরাণামগ্নিং শুক্রেণ শোচিষা ॥৪॥

45.5

ঘৃতাহবন সন্ত্যেমা উ ষু শ্রুধী গিরঃ । যাভিঃ কণ্বস্য সূনবো হবন্তেঽবসে ত্বা ॥৫॥

45.6

ত্বাং চিত্রশ্রবস্তম হবন্তে বিক্ষু জন্তবঃ । শোচিষ্কেশং পুরুপ্রিয়াগ্নে হব্যায় বোহ্লবে ॥৬॥

45.7

নি ত্বা হোতারমৃত্বিজং দধিরে বসুবিত্তমম্ । শ্রুত্কর্ণং সপ্রথস্তমং বিপ্রা অগ্নে দিবিষ্টিষু ॥৭॥

45.8

আ ত্বা বিপ্রা অচুচ্যবুঃ সুতসোমা অভি প্রয়ঃ । বৃহদ্ ভা বিভ্রতো হবিরগ্নে মর্তায় দাশুষে ॥৮॥

45.9

প্রাতর্যাব্ণঃ সহস্কৃত সোমপেয়ায় সন্ত্য । ইহাদ্য দৈব্যং জনং বর্হিরা সাদয়া বসো ॥৯॥

45.10

অর্বাঞ্চং দৈব্যং জনমগ্নে যক্ষ্ব সহূতিভিঃ । অয়ং সোমঃ সুদানবস্ তং পাত তিরোঅহ্ন্যম্ ॥১০॥