সূক্ত 46

46.1

১৫ প্রস্কণ্বঃ কাণ্বঃ। অশ্বিনৌ। গায়ত্রী।

এষো উষা অপূর্ব্যা ব্যুচ্ছতি প্রিয়া দিবঃ । স্তুষে বামশ্বিনা বৃহৎ ॥১॥

যা দস্রা সিন্ধুমাতরা মনোতরা রয়ীণাম্ । ধিয়া দেবা বসুবিদা ॥২॥

বচ্যন্তে বাং ককুহাসো জূর্ণায়ামধি বিষ্টপি । যদ্ বাং রথো বিভিষ্পতাৎ ॥৩॥

হবিষা জারো অপাং পিপর্তি পপুরির্নরা । পিতা কুটস্য চর্ষণিঃ ॥৪॥

আদারো বাং মতীনাং নাসত্যা মতবচসা । পাতং সোমস্য ধৃষ্ণুয়া ॥৫॥

যা নঃ পীপরদশ্বিনা জ্যোতিষ্মতী তমস্তিরঃ । তামস্মে রাসাথামিষম্ ॥৬॥

আ নো নাবা মতীনাং যাতং পারায় গন্তবে । যুঞ্জাথামশ্বিনা রথম্ ॥৭॥

অরিত্রং বাং দিবস্পৃথু তীর্থে সিন্ধূনাং রথঃ । ধিয়া যুয়ুজ্র ইন্দবঃ ॥৮॥

দিবস্কণ্বাস ইন্দবো বসু সিন্ধূনাং পদে । স্বং বব্রিং কুহ ধিত্সথঃ ॥৯॥

অভূদু ভা উ অংশবে হিরণ্যং প্রতি সূর্যঃ । ব্যখ্যজ্জিহ্বয়াসিতঃ ॥১০॥

অভূদু পারমেতবে পন্থা ঋতস্য সাধুয়া । অদর্শি বি স্রুতির্দিবঃ ॥১১॥

তত্তদিদশ্বিনোরবো জরিতা প্রতি ভূষতি । মদে সোমস্য পিপ্রতোঃ ॥১২॥

বাবসানা বিবস্বতি সোমস্য পীত্যা গিরা । মনুষ্বচ্ছম্ভূ আ গতম্ ॥১৩॥

যুবোরুষা অনু শ্রিয়ং পরিজ্মনোরুপাচরৎ । ঋতা বনথো অক্তুভিঃ ॥১৪॥

উভা পিবতমশ্বিনোভা নঃ শর্ম যচ্ছতম্ । অবিদ্রিয়াভিরূতিভিঃ ॥১৫॥