Sukta 39

39.1

10 kanvau ghaurah, marutah, pragathah – vishama brihatyah, samah satobrihatyah

प्र यदि॒त्था प॑रा॒वत॑ः शो॒चिर्न मान॒मस्य॑थ ।
कस्य॒ क्रत्वा॑ मरुत॒ः कस्य॒ वर्प॑सा॒ कं या॑थ॒ कं ह॑ धूतयः ॥१॥

Pra yadittha paravatah shochirna manamasyatha
Kasya kratva marutah kasya varpasa kam yatha kam ha dhutayah

स्थि॒रा व॑ः स॒न्त्वायु॑धा परा॒णुदे॑ वी॒ळू उ॒त प्र॑ति॒ष्कभे॑ ।
यु॒ष्माक॑मस्तु॒ तवि॑षी॒ पनी॑यसी॒ मा मर्त्य॑स्य मा॒यिन॑ः ॥२॥

Sthira vah santvayudha paranude vilu uta pratishkabhe
Yushmakamastu tavishi paniyasi ma martyasya mayinah

परा॑ ह॒ यत् स्थि॒रं ह॒थ नरो॑ व॒र्तय॑था गु॒रु ।
वि या॑थन व॒निन॑ः पृथि॒व्या व्याशा॒ः पर्व॑तानाम् ॥३॥

Para ha yat sthiram hatha naro vartayatha guru
Vi yathana vaninah prithivya vyashah parvatanam

न॒हि व॒ः शत्रु॑र्विवि॒दे अधि॒ द्यवि॒ न भूम्यां॑ रिशादसः ।
यु॒ष्माक॑मस्तु॒ तवि॑षी॒ तना॑ यु॒जा रुद्रा॑सो॒ नू चि॑दा॒धृषे॑ ॥४॥

Nahi vah shatrurvivide adhi dyavi na bhumyam rishadasah
Yushmakamastu tavishi tana yuja rudraso nu chidadhrishe

प्र वे॑पयन्ति॒ पर्व॑ता॒न्वि वि॑ञ्चन्ति॒ वन॒स्पती॑न् ।
प्रो आ॑रत मरुतो दु॒र्मदा॑ इव॒ देवा॑स॒ः सर्व॑या वि॒शा ॥५॥

Pra vepayanti parvatanvi vinchanti vanaspatin
Pro arata maruto durmada iva devasah sarvaya visha

उपो॒ रथे॑षु॒ पृष॑तीरयुग्ध्वं॒ प्रष्टि॑र्वहति॒ रोहि॑तः ।
आ वो॒ यामा॑य पृथि॒वी चि॑दश्रो॒दबी॑भयन्त॒ मानु॑षाः ॥६॥

Upo ratheshu prishatirayugdhvam prashtirvahati rohitah
A vo yamaya prithivi chidashrodabibhayanta manushah

आ वो॑ म॒क्षू तना॑य॒ कं रुद्रा॒ अवो॑ वृणीमहे ।
गन्ता॑ नू॒नं नोऽव॑सा॒ यथा॑ पु॒रेत्था कण्वा॑य बि॒भ्युषे॑ ॥७॥

A vo makshu tanaya kam rudra avo vrinimahe
Ganta nunam novasa yatha purettha kanvaya bibhyushe

यु॒ष्मेषि॑तो मरुतो॒ मर्त्ये॑षित॒ आ यो नो॒ अभ्व॒ ईष॑ते ।
वि तं यु॑योत॒ शव॑सा॒ व्योज॑सा॒ वि यु॒ष्माका॑भिरू॒तिभि॑ः ॥८॥

Yushmeshito maruto martyeshita a yo no abhva ishate
Vi tam yuyota shavasa vyojasa vi yushmakabhirutibhih

असा॑मि॒ हि प्र॑यज्यव॒ः कण्वं॑ द॒द प्र॑चेतसः ।
असा॑मिभिर्मरुत॒ आ न॑ ऊ॒तिभि॒र्गन्ता॑ वृ॒ष्टिं न वि॒द्युत॑ः ॥९॥

Asami hi prayajyavah kanvam dada prachetasah
Asamibhirmaruta a na utibhirganta vrishtim na vidyutah

असा॒म्योजो॑ बिभृथा सुदान॒वो ऽसा॑मि धूतय॒ः शव॑ः ।
ऋ॒षि॒द्विषे॑ मरुतः परिम॒न्यव॒ इषुं॒ न सृ॑जत॒ द्विष॑म् ॥१०॥

Asamyojo bibhritha sudanavo sami dhutayah shavah
Rishidvishe marutah parimanyava ishum na srijata dvisham