Sukta 38

38.1

15 kanvo ghaurah, marutah, gayatri

कद्ध॑ नू॒नं क॑धप्रियः पि॒ता पु॒त्रं न हस्त॑योः । द॒धि॒ध्वे वृ॑क्तबर्हिषः ॥१॥

Kaddha nunam kadhapriyah pita putram na hastayoh, dadhidhve vriktabarhishah

क्व॑ नू॒नं कद् वो॒ अर्थं॒ गन्ता॑ दि॒वो न पृ॑थि॒व्याः । क्व॑ वो॒ गावो॒ न र॑ण्यन्ति ॥२॥

Kva nunam kad vo artham ganta divo na prithivyah, kva vo gavo na ranyanti

क्व॑ वः सु॒म्ना नव्यां॑सि॒ मरु॑त॒ः क्व॑ सुवि॒ता । क्वो॒३ विश्वा॑नि॒ सौभ॑गा ॥३॥

Kva vah sumna navyansi marutah kva suvita, kvo3 vishvani saubhaga

यद् यू॒यं पृ॑श्निमातरो॒ मर्ता॑स॒ः स्यात॑न । स्तो॒ता वो॑ अ॒मृत॑ः स्यात् ॥४॥

Yad yuyam prishnimataro martasah syatana, stota vo amritah syat

मा वो॑ मृ॒गो न यव॑से जरि॒ता भू॒दजो॑ष्यः । प॒था य॒मस्य॑ गा॒दुप॑ ॥५॥

Ma vo mrigo na yavase jarita bhudajoshyah, patha yamasya gadupa

मो षु ण॒ः परा॑परा॒ निऋ॑तिर्दु॒र्हणा॑ वधीत् । प॒दी॒ष्ट तृष्ण॑या स॒ह ॥६॥

Mo shu nah parapara niritirdurhana vadhit, padishta trishnaya saha

स॒त्यं त्वे॒षा अम॑वन्तो॒ धन्व॑ञ्चि॒दा रु॒द्रिया॑सः । मिहं॑ कृण्वन्त्यवा॒ताम् ॥७॥

Satyam tvesha amavanto dhanvanchida rudriyasah, miham krinvantyavatam

वा॒श्रेव॑ वि॒द्युन्मि॑माति व॒त्सं न मा॒ता सि॑षक्ति । यदे॑षां वृ॒ष्टिरस॑र्जि ॥८॥

Vashreva vidyunmimati vatsam na mata sishakti, yadesham vrishtirasarji

दिवा॑ चि॒त्तम॑ः कृण्वन्ति प॒र्जन्ये॑नोदवा॒हेन॑ । यत्पृ॑थि॒वीं व्यु॒न्दन्ति॑ ॥९॥

Diva chittamah krinvanti parjanyenodavahena, yatprithivim vyundanti

अध॑ स्व॒नान्म॒रुतां॒ विश्व॒मा सद्म॒ पार्थि॑वम् । अरे॑जन्त॒ प्र मानु॑षाः ॥१०॥

Adha svananmarutam vishvama sadma parthivam, arejanta pra manushah

मरु॑तो वीळुपा॒णिभि॑श् चि॒त्रा रोध॑स्वती॒रनु॑ । या॒तेमखि॑द्रयामभिः ॥११॥

Maruto vilupanibhish chitra rodhasvatiranu, yatemakhidrayamabhih

स्थि॒रा व॑ः सन्तु ने॒मयो॒ रथा॒ अश्वा॑स एषाम् । सुसं॑स्कृता अ॒भीश॑वः ॥१२॥

Sthira vah santu nemayo ratha ashvasa esham, susanskrita abhishavah

अच्छा॑ वदा॒ तना॑ गि॒रा ज॒रायै॒ ब्रह्म॑ण॒स्पति॑म् । अ॒ग्निं मि॒त्रं न द॑र्श॒तम् ॥१३॥

Achchha vada tana gira jarayai brahmanaspatim, agnim mitram na darshatam

मि॒मी॒हि श्लोक॑मा॒स्ये॑ प॒र्जन्य॑ इव ततनः । गाय॑ गाय॒त्रमु॒क्थ्य॑म् ॥१४॥

Mimihi shlokamasye parjanya iva tatanah, gaya gayatramukthyam

वन्द॑स्व॒ मारु॑तं ग॒णं त्वे॒षं प॑न॒स्युम॒र्किण॑म् । अ॒स्मे वृ॒द्धा अ॑सन्नि॒ह ॥१५॥

Vandasva marutam ganam tvesham panasyumarkinam, asme vriddha asanniha