সূক্ত 39

39.1

১০ কণ্বৌ ঘৌরঃ। মরুতঃ। প্রগাথঃ – বিষমা বৃহত্যঃ, সমাঃ সতোবৃহত্যঃ।

প্র যদিত্থা পরাবতঃ শোচির্ন মানমস্যথ ।
কস্য ক্রত্বা মরুতঃ কস্য বর্পসা কং যাথ কং হ ধূতয়ঃ ॥১॥

39.2

স্থিরা বঃ সন্ত্বায়ুধা পরাণুদে বীলূ উত প্রতিষ্কভে ।
যুষ্মাকমস্তু তবিষী পনীয়সী মা মর্ত্যস্য মায়িনঃ ॥২॥

39.3

পরা হ যৎ স্থিরং হথ নরো বর্তয়থা গুরু ।
বি যাথন বনিনঃ পৃথিব্যা ব্যাশাঃ পর্বতানাম্ ॥৩॥

39.4

নহি বঃ শত্রুর্বিবিদে অধি দ্যবি ন ভূম্যাং রিশাদসঃ ।
যুষ্মাকমস্তু তবিষী তনা যুজা রুদ্রাসো নূ চিদাধৃষে ॥৪॥

39.5

প্র বেপয়ন্তি পর্বতান্বি বিঞ্চন্তি বনস্পতীন্ ।
প্রো আরত মরুতো দুর্মদা ইব দেবাসঃ সর্বয়া বিশা ॥৫॥

39.6

উপো রথেষু পৃষতীরয়ুগ্ধ্বং প্রষ্টির্বহতি রোহিতঃ ।
আ বো যামায় পৃথিবী চিদশ্রোদবীভয়ন্ত মানুষাঃ ॥৬॥

39.7

আ বো মক্ষূ তনায় কং রুদ্রা অবো বৃণীমহে ।
গন্তা নূনং নোঽবসা যথা পুরেত্থা কণ্বায় বিভ্যুষে ॥৭॥

39.8

যুষ্মেষিতো মরুতো মর্ত্যেষিত আ যো নো অভ্ব ঈষতে ।
বি তং যুয়োত শবসা ব্যোজসা বি যুষ্মাকাভিরূতিভিঃ ॥৮॥

39.9

অসামি হি প্রয়জ্যবঃ কণ্বং দদ প্রচেতসঃ ।
অসামিভির্মরুত আ ন ঊতিভির্গন্তা বৃষ্টিং ন বিদ্যুতঃ ॥৯॥

39.10

অসাম্যোজো বিভৃথা সুদানবো ঽসামি ধূতয়ঃ শবঃ ।
ঋষিদ্বিষে মরুতঃ পরিমন্যব ইষুং ন সৃজত দ্বিষম্ ॥১০॥